اسلام آباد۔29مارچ(اے پی پی سرائیکی نیوز)سرائیکی وسیب دے بزرگ ترقی پسند رہنما، دانشور سیاسی سماجی شخصیت میاں منصور کریم سیال گزریل رات اللہ کوں پیارے تھی ڳئن ۔ انہاں دی عمر 76 سال ہئی تے او کئی سال توں فالج دے مرض دا شکار ہن ۔ کجھ ݙینھ توں دل دے دورے دے بعد انہاں دی طبیعت خراب ہئی جئیں توں او جانبر نہ تھی سڳیے۔ انہاں دی نماز جنازہ اڄ 29 مارچ بروز ہفتہ بعد نماز عصر ابدالی مسجد نواں شہر اچ ادا کیتی ویسی ۔ منصور کریم سرائیکی خطے دی سیاست، ثقافت اتے تہذیب دا ھک تکڑا حوالہ ہن ۔ بالخصوص ملتان شہر اچ ادب و مکالمہ اتے مجلسی زندگی دا تذکرہ منصور کریم دے ذکر دے بغیر ادھورا رہندے۔ 70 دے ݙھاکے اچ ولی خان دی نیشنل عوامی پارٹی توں گھن تے تاج لنگاہ دی سرائیکی پارٹی تئیں خطے اچ ترقی پسندانہ سیاسی روایت دے امین رہیے۔ انہاں دا گھر ہمیشہ وسیب توں آوݨ آلے نظریاتی سیاسی کارکناں دا مرکز و محور سمجھا ویندا ہئی۔(ڈاکٹر سعدیہ کمال)
