اسلام آباد۔4اپریل(اے پی پی) وفاقی وزیر منصوبہ بندی، ترقی و اصلاحات احسن اقبال دی صدارت اچ سول سروسز ریفارم کمیٹی دا اجلاس تھئے۔ اے کمیٹی وزیراعظم شہباز شریف دی ہدایت تے بݨائی ڳئی اے ۔ کمیٹی دا مقصد پاکستان دی بیوروکریسی دی ہمہ گیر اصلاح اتے ایں کوں جدید تقاضیں نال ہم آہنگ کرݨا اے ۔ اجلاس اچ وزارت منصوبہ بندی، اقتصادی امور ڈویژن اتے کابینہ سیکرٹریٹ دے اعلیٰ حکام شرکت کیتی۔ اجلاس اچ کمیٹی سول سروسز دے ڈھانچے اچ “کلسٹر بیسڈ سسٹم” دے نفاذ دی حمایت کیتی تے ایں ڳالھ تے زور ݙتے جو سرکاری شعبے اچ پیشہ ور لوکاں دی شمولیت دے حوالے نال پیش آندے چیلنجز کوں مؤثر انداز اچ حل کرݨا ہوسی ۔ وفاقی وزیر احسن اقبال نشاندہی کیتی جو ٻہوں سارے سرکاری افسراں دیاں مہارتاں انھاں دے عہدیں دی موجودہ تقاضیں نال ہم آہنگ نی ہوندیاں ، انہاں سرکاری اداریں دی کارکردگی بہتر بݨاوݨ سانڳے کارپوریٹ سیکٹر دی بہترین حکمت عملیاں کوں اپناوݨ ضروری اے۔وفاقی وزیر مختلف وزارتاں اچ تکنیکی ماہرین دی شدید قلت دی نشاندہی کیتی تے آکھیے ایں کمی کوں دور کرݨ ٻہوں ضروری اے تاں جو سرکاری ادارے مطلوبہ مہارتاں نال لیس تھی سڳن ۔ انہاں انجینئرنگ تے انفارمیشن ٹیکنالوجی سودھے ٻئے تکنیکی شعبیں اچ پیشہ وارانہ گروپس دے دائرہ کار کوں وسعت ݙیوݨ دی اہمیت تے زور ݙتے تاں جو سول سروس اچ تکنیکی صلاحیتاں دی بنیاد مستحکم کیتی ونڄ سڳے ۔احسن اقبال سول سروس اچ داخلے سانڳے انگریزی زبان کوں لازمی مضمون بݨاوݨ دے فیصلے تے نظرِ ثانی دی لوڑھ تے زور ݙتا انہاں آکھیے ہر سال کئی باصلاحیت طلبہ صرف انگریزی دے پرچے اچ ناکامی پاروں مقابلے دے امتحان توں ٻاہر تھی ویندن جے انگریزی قابلیت دا معیار ہوندی تاں ساݙی سول سروس دنیا دی بہترین سول سروس ہوندی۔ انگریزی کوں عام شہری اتے اکثریتی آبادی دے خلاف امتیازی ہتھیار دے طور تے استعمال کیتا ڳئے انہاں تجویز ݙتی جو اردو زبان کوں وی سی ایس ایس امتحان اچ لازمی مضمون دے طور تے اختیار کرݨ دا موقع ݙتا ونڄے تاں جو قومی زبان کوں تقویت ملے اتے قومی تشخص کوں اجاگر کیتا ونڄ سڳے۔ اجلاس مُکݨ تے وفاقی وزیر احسن اقبال آکھیے اساکوں 1973 دے سول سروس ماڈل تے نویں سروں غور کرݨا ہوسی ہݨ زمانہ تے تقاضے یکسر بدل چکئن ، اڄ دا شہری زیادہ باخبر تے بااختیار اے تے ایں دی توقعات وی کتھائیں ودھ ہن ایں سانڳے اساکوں ایجھی سول سروس درکار اے جیڑھی جدید تقاضیں موجب چُست، فعال، کارکردگی تے مبنی اتے عوام سانڳے موثر تے جوابدہ ہووے۔
