اسلام آباد۔25اپریل (اے پی پی) پاکستان انسٹیٹیوٹ آف میڈیکل سائنسز (پمز) دے ایگزیکٹوڈائریکٹر ڈاکٹر عمران سکندر آکھیا جو پمز ہسپتال اچ ہر ݙینھ آوݨ آلے ست ہزار مریضاں دا او پی ڈی، ݙو ہزار ایمرجنسی اچ معائنہ کیتا ویندے، ہسپتال دی اپ گریڈیشن دے منصوبے تے کم تھیندا پئے۔ اے ڳالھیں انہاں اے پی پی کوں خصوصی انٹرویو ݙیندیں ہوئیں آکھی۔ ڈاکٹر عمران سکندر آکھیا جو پمز ہسپتال وفاقی دارالحکومت اسلام آباد اچ 1985 اچ ٻݨایا ڳئیا جتھ پورے ملک توں لوکاں کوں صحت دی سہولتاں ݙتی ویندن۔ بیڈز تے مشتمل اے ہسپتال سرجیکل اتے میڈیکل دی ساری سہولتاں ݙیندے۔ ٻالاں کیتے خصوصی ہسپتال ، کارڈیک سنٹر، زچہ بچہ سنٹر ، برن سنٹر سودھے ٻئے شعبے صحت دی سہولتاں ݙیندے پئن۔ انہاں آکھیا جو ویلھے دے نال ایندا سٹیٹس بدلدا رہندے۔ اڄ کل اے فیڈرل گورنمنٹ ادارہ اے۔ خالی آسامیاں بارے سوال دے ولدے اچ انہاں آکھیا جو پمز اچ کل 4500 آسامیاں خالی ہن جئیں اچ ڈاکٹرز، پیرامیڈیکل سٹاف ، سپورٹ سٹاف شامل اے۔ جݙاں میں ذمہ واریاں سنبھالی تاں اوں ویلھے 1400 دے نیڑے سیٹاں خالی ہن جئیں اچون تقریباً اݙھائی سو آسامیاں تے گریڈ ہک توں 15 تئیں دے ملازماں کوں ہائر کیتا ڳئے اتے 130 پوسٹاں فیڈرل پبلک سروس کمیشن دے تحت پر کیتی ڳئن۔ اے سارے لوک میرٹ تے رکھیے ڳئن۔ انہاں آکھیا جو اساں ہسپتال کیتے ہک منصوبہ جاپان دی کمپنی جائیکا دے تعاون نال پورا کیتے جتھ ٻالاں کوں علاج دی سہولتاں ݙتی ویندی پئن۔ سپیشلسٹ دی 130 توں ودھ خالی آسامیاں چھیکڑی مرحلے اچ ہن جݙاں اے پوری تھی ویسن تاں مریضاں کوں ہسپتال اچ کوئی اوکھ نہ تھیسی۔ انہاں آکھیا جو شام ویلھے وی او پی ڈی شروع کیتی ڳئی اے تانجو سویلے دے رش کوں ڳھٹ کیتا ونڄ سڳے۔ اڄوکے وفاقی وزیر سید مصطفیٰ کمال دی ہدایت تے علاج معالجے دی بہتر سہولتاں ݙتی ویندی پئن۔ انہاں آکھیا جو ہسپتال اچ ہیلپ لائن شروع کیتی ڳئی اے تانجو لوک آپݨے مسئلیاں دا ݙسا سڳن۔ ہسپتال دی صفائی بارے ڳالھ کریندیں ہوئیں انہاں آکھیا جو اساں کئی اقدامات کر تے ہسپتال اچ صفائی دے نظام کوں بہتر کیتے۔ ساریاں توں وݙا مسئلہ ودھ مریضاں دا ٻوجھ اے ہݨ اے مسئلہ جلدی حل تھی ویسی۔ پمزاچ وݙی اپ گریڈیشن دی لوڑھ اے۔ ایں بارے ہک پی سی ون ٻݨایا ڳئے جو پلاننگ اچ جمع کرایا ڳئے اتے وفاقی وزیر احسن اقبال ہک کمیٹی ٻݨائی اے اتے آکھیا جو پی سی ٹو فزیبلٹی سٹڈی ٻݨاڳھدی ونڄے اتے مکمل پلان ٻݨایا ونڄے جئیں دی منظوری مل ڳئی اے۔ انہاں آکھیا جو وفاقی وزیر سید مصطفیٰ کمال دی ہدایت تے ٹیلی میڈیسن بارے اقدامات کیتے ویسن۔ ہسپتال اچ ایں ویلھے ترائے سی ٹی سکین لڳین جو کم کریندے پئن۔ ہک ایم آر آئی مشین کم کریندی پئی اے ݙوجھی ایم آر آئی مشین جاپان ولوں تحفہ ݙتا ڳئے او جلدی آویسی۔ ایکسرے ، الٹراسائونڈ ، سی ٹی سکین ، ایم آر ائی ساری مشیناں کم کریندی پئن۔ انہاں آکھیا جو ایمرجنسی اچ آوݨ آلے کہیں وی مریض کوں واپسی نی ٻھیجا ویندا اگر اینویں تھیوے تاں اوندے خلاف کاروائی کیتی ویندی اے۔ صحت سہولت پروگرام بارے انہاں آکھیا جو ایں پروگرام کوں بند کر ݙتا ڳئے مگر آئی سی یو ، کارڈیک اتے ڈائیلاسز سنٹر اچ ایندے نال سہولت ݙتی ویندی پئی اے۔ صحت سہولت پروگرام سٹیٹ لائف دے ذریعے چلدا پئے۔ اساں سٹیٹ لائف کوں خط لکھیے جو ایں کوں درجہ بدرجہ مختلف شعبیاں اچ شروع کیتا ونڄے۔ ایں بارے ݙوہیں اداریاں دا آپت اچ معاہدہ تھی ڳئے۔ گائنی دے شعبہ اچ روزانہ 50 نویں کیسز رجسٹرڈ کیتے ویندن جڈانجو برن سنٹر اتے پلاسٹک سرجری دے شعبے کوں کٹھا کر ݙتا ڳئے۔ ایں ویلھے برن سنٹر اچ ݙو آپریشن تھیٹر کم کریندے پئن۔ اساں کوشش کریندے پئیوں جو مریضاں کوں ہر شعبے اچ صحت دی بہترین سہولتاں ݙے سڳوں۔
