راولپنڈی۔27 اپریل(اے پی پی)سکیورٹی فورسز افغانستان سرحد توں دراندازی دی کوشش ناکام ٻݨیدے ہوئے سارے 54 دہشت گرد ہلاک کر ݙتن۔ پاک فوج دے شعبہ تعلقات عامہ (آئی ایس پی آر) آکھیے جو 25 ، 26 اپریل اتے 27 اپریل دی وچلی رات، شمالی وزیرستان دے علاقے حسن خیل اچ پاکستان-افغانستان سرحد توں دراندازی دی کوشش کرݨ آلے خوارج گروپاں دی نقل و حرکت کوں سیکیورٹی فورسز ویلھے تے پکڑ ڳھدے اتے پاک فوج دے جواناں فوری اتے مؤثر کارروائی کریندے دراندازی دی کوشش ناکام ٻݨا ݙتی، شدید فائرنگ دے تبادلے اچ سارے 54 خوارج واصلِ جہنم کرݙتن۔ اے خوارج “اپݨے غیر ملکی آقاواں” دے اشارے تے پاکستان اچ وݙی دہشت گرد کارروائی دی کوشش اچ ہن۔ فتنہ الخوارج اے کوشش اوں ویلھے کیتی اے ڄݙاں بھارت پاکستان تے بے بنیاد الزامات لیندا کھڑے، اے اشارہ اے جو فتنہ الخوارج کیندی تݙ تے کم کریندے پین، اینڄھی کارروائی ریاست اتے عوام نال غداری آلی ڳالھ اے۔ آئی ایس پی آر آکھیے جو پاکستانی سیکیورٹی فورسز غیر معمولی پیشہ ورانہ مہارت، مستعدی اتے تیاری ݙیکھیندے ہک وݙا سانحہ ویلھے تے روک ݙتے، اے دہشت گردی دے خلاف جاری مہم اچ کہین ہک کارروائی اچ وب توں ودھ خوارج کوں ہلاک کرݨ دا ریکارڈ اے۔ پاکستان دی سیکیورٹی فورسز قوم دی سرحداں دے دفاع اتے دہشت گردی کوں مکاوݨ کیتے پرعزم ہین، اینڄھی جرات مندانہ اتے فیصلہ کن کارروائیاں ساݙے قومی عزم کوں ٻیا تکڑا کریندن اتے ثبوت ہین جو پاکستان دہشت گردی دے خلاف جنگ اچ وݙیاں کامیابیاں ڳھندا پئے۔
