لاہور۔27اپریل(اے پی پی)وفاقی وزیر داخلہ محسن نقوی آکھیے جو پاکستان دی سکیورٹی فورسز افغانستان توں خوارج دی دراندازی ناکام ٻݨیدے 54 خوارج ہلاک کرݙتن، بیرونی آقاواں خوارج کوں پاکستان اچ دہشتگردی کیتے ٻھیڄے، دشمن دی ہر سازش کوں ناکام ٻݨیسوں۔ پریس کانفرنس اچ انہاں آکھیا جو اڄ وݙا ݙینھ اے جو سکیورٹی فورسز شمالی وزیرستان دے علاقے اچ افغان سرحد پار توں دراندازی دی کوشش ناکام ٻݨیدے ہوئے سارے 54 دہشت گرد ہلاک کر ݙتن جو فورسز کوں ایندی ویلھے تے ݙس مل ڳئی ہئی، ایں سانڳے سکیورٹی فورسز بہتر حکمت عملی نال دہشتگرداں کوں 3 پاسو گھیر تے چݨ چݨ تے ماریے، اے ہݨ تئیں ماریے ونڄݨِ آلے خوارجیاں دی سب توں وݙی تعداد اے۔ انہاں آکھیا جو کڄھ ݙینھ توں اطلاع ہئی جو خوارج بیرونی آقاواں دے دبائو تے پاکستان وڑ تے کوئی دہشت گردانہ سرگرمی کرݨ دی کوشش اچ ہین۔ فورسز انہاں خفیہ اطلاعواں تے سرحداں تے نگرانی اتے چیکنگ سخت کرݙتی ہئی اتے ایں دوران انہاں خوارجیاں دی نشاندہی تھی گئی۔ انہاں آکھیا جو ماریے ڳئے خوارجیاں توں بھاری اسلحہ اتے بارودی مواد ملیے اتے ایویں لڳدے ڄیویں او پاکستان نال جنگ کرݨ کیتے پوری تیاری نال آئے ہن۔ محسن نقوی اللہ دا شکر ادا کیتے جو ٻھارت ڄیڑھا وی قدم چیندے پکڑیا ویندے، فتنہ خوارج وی (بھارت) دی تݙ تے آوݨ دی کوشش کیتی اے ٻھل ناکام تھئین، آئی ایس پی آر 54 دہشتگرداں دیان لاشاں دی تصاویر وی شیئر کر ݙتن، اے وݙا ثبوت اے جو ڄڳ ڄاݨ ڳھنے جو انہاں دہشت گرداں کوں کیندی تݙ اے، اڄ یقین ودھ ڳئے جو ایں دہشتگردی دا مقصد کیا اے اتے پاکستان کوں کیوں نقصان پڄدا پئے۔ وفاقی وزیرداخلہ آکھیا جو کڄھ عرصے توں دہشتگرداں دے پیر مسلسل اکھڑدے پین، انہاں دی کوشش اے جو ول اپݨی ڄاہ ٻݨاوݨ دی مہلت ملے تہوں پچھلے ݙو ہفتے اچ مارے اتے گرفتار تھیوݨ آلے دہشت گرداں دی تعداد ودھی اے، پاک افواج ہر ویلھے تیار اے، ڄیکر ول کوئی اینجھی کوشش تھئی تاں بھارت کوں پتا لڳ ویسی جو ولدا کیویں ݙویندے، ہر کہیں کوں پتے جو دہشت گرداں کوں فنڈنگ کون کریندا پئے، ڄیکر پہلگام واقعہ دی انکوائری کوئی نیوٹرل ادارہ کریندے تاں پاکستان پورا ہتھ ونݙیسی جو ساکوں بھارت تے بالکل کوئی اعتبار کائنی۔
