اسلام آباد۔29اپریل (اے پی پی) سعودی وزارت داخلہ دا حج قوانین دی خلاف ورزیاں تے سخت سزائیں، جرمانیاں دا اعلان کیتے۔ قوامین دی خلاف ورزی کرݨ آلیاں، سہولت کاراں کوں ڈی پورٹ اتے ݙاہ سال تئیں سعودی عرب اچ داخلے تے پابندی لاتی ویسی۔ منگل کوں وزارت مذہبی امور تے بین المذاہب ہم آہنگی توں جاری بیان موجب سعودی وزارت داخلہ بغیر اجازت حج کرݨ یا کوشش کرݨ دی صورت اچ 20 ہزار ریال تئیں جرمانے دا اعلان کیتے۔ حج موسم اچ مکہ یا مقدس جہیں اچ وزٹ ویزے نال داخل تھیوݨ دی صورت اچ 20 ہزار ریال تئیں جرمانہ ہوسی۔ وزٹ ویزہ ہولڈر کوں مخصوص حج زون اچ داخلے کیتے ٹرانسپورٹ یا مدد ݙیوݨ آلیاں تے ہک لکھ ریال تئیں جرمانہ لاتا ویسی۔ غیر مجاز زائرین کوں ہوٹل یا نجی گھراں اچ رہائش ݙیوݨ تے ہک لکھ ریال تئیں جرمانہ لاتا ویسی۔ قوانین دی خلاف ورزی کرݨ آلے، سہولت کاراں کوں ڈی پورٹ اتے ݙاہ سال تئیں سعودی عرب اچ داخلے تے پابندی لاتی ویسی۔ زائرین دی غیر قانونی نقل و حمل دی صورت اچ ڳاݙی ضبط کیتی ونڄ سڳدی اے۔ قوانین اتے سزائیں دا اطلاق یکم ذی القعدہ توں 14 ذو الحجہ تئیں ہوسی۔
