بھارت ولوں پاکستان تے لائے گئے کوڑے الزام کوئی نویں گال نئیں، بھارت دا دہشت گردی دے خیالی کیمپاں دا کوڑا پروپیگنڈا ناکام تھی ڳئے، لائن آف کنٹرول دے پاسے سارے علاقیاں اچ زندگی معمول وانگوں ہے،” عطاء اللہ تارڑ

اسلام آباد۔۵ مئی (اے پی پی) بھارت ولوں پاکستان تے کوڑے الزام لاوݨ دی ریت کوئی نویں نئیں۔ بھارت ہمیشہ پاکستان کوں بدنام کرݨ کیتے کوڑے قصے گھڑیندا ریہے۔ پر پاکستان ہر موقع تے سنجیدگی، صاف گوئی اتے سچائی نال جواب ݙتے۔ اڄ اساں میڈیا کوں لائن آف کنٹرول دے انہاں علاقیاں دا دورہ کروائے جتھاں بارے بھارت دہشت گردی دے فرضی کیمپاں دا کوڑا پروپیگنڈا کریندا ریہے۔ لائن آف کنٹرول دے نال سارے رہائشی علاقیاں اتے آلے دوالے زندگی معمول دے مطابق اے۔ اے ڳالھ وفاقی وزیر اطلاعات تے نشریات عطاء اللہ تارڑ کنٹرول لائن دے دورے دے موقع میڈیا نال ڳالھ مہاڑ کریندیں ہوئیں آکھی۔

عطاء اللہ تارڑ آکھیا جو آزاد کشمیر دے علاقے بیلا نور شاہ اتے پیر چناسی بارے بھارتی الزام من گھڑت اتے بے بنیاد ہن۔ اتھاں نہ صرف مقامی لوک اپݨی عام زندگی ڳزاریندے پئے ہن بلکہ تعلیمی ادارے وی موجود ہن اتے سیاحت وی معمول دے مطابق جاری ہے۔ انہاں آکھیا جو انہاں علاقیاں اچ نہ کوئی دہشت گردی دا کیمپ ہے اتے نہ ای کوئی اینجھی سرگرمی ہے جیندے بارے بھارت دعویٰ کریندا پئے۔ وفاقی وزیر اطلاعات آکھیا جو بھارت ولوں 2019 اچ پلوامہ واقعے دے بعد وی بالاکوٹ اچ فرضی ٹریننگ کیمپاں دا ڈرامہ رچایا ڳیا ہئی جیندے دا اساں زمینی حقائق اتے ثبوت نال جواب ڈتا ہئی۔ ایں واری وی بھارت نقشے دی بنیاد تے کوڑا پروپیگنڈا کیتے پر اساں کھلے دل نال میڈیا کوں موقع ݙتے جو او خود آ کے ݙیکھے جو اے الزام کتنے بے بنیاد ہن۔

عطاء اللہ تارڑ آکھیا جو پاکستان دہشت گردی دے خلاف جنگ اچ 90 ہزار توں ودھ قیمتی جاناں قربان کیتیاں ہن اتے اج وی مغربی سرحد تے دہشت گرد عناصر دے خلاف بھرپور کارروائیاں جاری ہن۔ انہاں آکھیا جو پاکستان ہک ذمہ دار ریاست ہے جیڑھی امن چاہندی ہے پر اپݨی سلامتی اتے خودمختاری دے دفاع توں غافل کائنی۔ انہاں آکھیا جو پاکستان کول بھارت دے دہشت گردی اچ ملوث ہووݨ دے پکے ثبوت موجود ہن۔ کلبھوشن یادیو ہک جیندی مثال ہے جیڑھا پاکستان اچ تخریبی سرگرمیاں اچ ملوث پاتا ڳیا اتے گرفتار تھیا۔ جعفر ایکسپریس حملے دے بعد بھارتی میڈیا ولوں نہ صرف دہشت گرداں توں فوٹیج حاصل کیتی ڳئی بلکہ ایں کوں نشر کر تے خوشی منائی ڳئی حالانکہ اے واقعہ دنیا دے سنگین ترین دہشت گردی دے واقعیاں اچوں ہک ہئی۔ انہاں آکھیا جو بی ایل اے ولوں پاکستان اچ دہشت گردی دے واقعیاں دے بعد بھارتی چینلز تے انہاں دے انٹرویوز اتے بیانات نشر تھیوݨ ایں ڳالھ دا ثبوت ہے جو انہاں عناصر کوں بھارتی سرپرستی حاصل اے۔ انہاں آکھیا جو پہلگام واقعہ جیندا پاکستان نال کوئی تعلق کائنی، ایں کوں بنیاد بݨا تے پاکستان تے الزام تراشی کیتی ڳئی حالانکہ ایف آئی آر واقعے دے صرف ݙاہ منٹ بعد درج کیتی ڳئی اتے بین الاقوامی میڈیا وی ݙکھیندا پئے جو پہلگام واقعے دیاں کوڑیاں ویڈیو چلائیاں ڳئین۔

وزیر اطلاعات آکھیا جو بھارت دی نو لکھ قابض فوج بھارت دے غیر قانونی زیر تسلط جموں و کشمیر اچ موجود اے، کیا او صرف کشمیری عوام تے ظلم کرݨ کیتے تعینات اے؟ پہلگام واقعہ درحقیقت بھارتی سکیورٹی اداریاں دی ناکامی اے۔ انہاں آکھیا جو پاکستان تے ایں فالس فلیگ آپریشن دا الزام لاوݨ دی کوشش ناکام تھئی کیوں جو پاکستان واقعے دی صاف تحقیقات دی پیشکش کیتی جیڑھی ایں ڳالھ دا ثبوت اے جو ساݙے ہتھ صاف ہن۔ انہاں آکھیا جو ساݙی امن دی خواہش کوں کمزوری نہ سمجھیا ونڄے، اساں اپݨا دفاع کرݨ ڄاݨدے ہئیں۔ انہاں آکھیا جو پلوامہ واقعے دے بعد بھارت جݙاں حملہ کیتا ہئی تاں اساں ݙو بھارتی طیارے مار ڳھتیے ہن اتے انہاں دا پائلٹ وی گرفتار کیتا ہئی، اگر بھارت پاکستان دی طرف میلی اکھ نال ݙیکھسی تاں دفاع اینجھے بھرپور انداز اچ کریسوں جو بھارت دیاں نسلاں یاد رکھیسن۔

عطاء اللہ تارڑ آکھیا جو بھارت نہ صرف خطے بلکہ دنیا بھر اچ دہشت گردی دے واقعیاں اچ ملوث پاتا ڳئے۔ امریکا اتے کینیڈا اچ سکھ رہنماواں دے قتل دی منصوبہ بندی اچ وی بھارتی کردار سامݨے آئے ۔ کینیڈا دے وزیراعظم واضح لفظاں اچ آکھیا جو ہردیپ سنگھ نجر دے قتل اچ بھارت ملوث ہے۔ وفاقی وزیر اطلاعات واضح کیتا جو لائن آف کنٹرول دے نال سارے علاقے پرامن ہن اتے اتھاں نہ کوئی دہشت گردی دا کیمپ اے نہ کوئی غیر معمولی سرگرمی۔ بھارت دا پروپیگنڈا صرف دنیا دیاں اکھیاں اچ مٹی پاوݨ دی کوشش ہے جیڑھی ہݨ مزید کامیاب نئیں تھی سڳدی۔