وفاقی وزیرپٹرولیم علی پرویز ملک نال پاکستان دی ریفائنریز دے سی ای اوز دی ملاقات

اسلام آباد۔5 مئی (اے پی پی) وفاقی وزیر پٹرولیم علی پرویز ملک نال پاکستان دی مشہور ریفائنریز دے چیف ایگزیکٹو افسراں (سی ای اوز) تے مشتمل ہک اعلیٰ سطحی وفد ملاقات کیتی۔ ملاقات اچ حکومت اتے ریفائننگ سیکٹر دے وچال تعاون ودھاوݨ، پائیدارتوانائی ݙیوݨ یقینی بݨاوݨ، ریفائنریز دی کارکردگی بہتر بݨاوݨ اتے ریفائنریز دے اہم مسئلیں تے ڳالھ مہاڑ کیتی ڳئی۔ ترجمان پٹرولیم ڈویژن ولوں جاری بیان موجب وزارت پٹرولیم اچ تھیوݨ آلی ایں ملاقات اچ ریفائنریز دی اپ گریڈیشن، ایندھن دے معیاراں، اتے پٹرولیم سیکٹر کوں پاکستان دی معیشت اچ ودھ موثر بݨاوݨ کیتے پالیسیاں جیھے اہم معاملیں تے ڳالھ مہاڑ کیتی ڳئی۔ وزیرعلی پرویز ملک ریفائننگ انڈسٹری دی ترقی کوں سپورٹ کرݨ اتے صارفین کیتے سستی اتے پائیدار توانائی ݙیوݨ تے حکومتی عزم دا اعادہ کیتا۔ بھارت نال اڄوکی کشیدگی دے تناظر اچ، پاکستانی ریفائنریز دے سی ای اوز وفاقی وزیر کوں یقین ݙیوائے جو او پاکستان مسلح افواج دی ایندھن دی لوڑھ پوری کرݨ سانڳے مکمل طور تے تیار ہن۔ انہاں زور ݙتے جو سارے ضروری انتظامات، بشمول سٹریٹجک ایندھن دے ذخیرے اتے بلا تعطل پیداواری صلاحیت، قومی دفاعی ضرورتاں کوں کہیں وی صورت حال اچ سپورٹ کرݨ کیتے موجود ہن۔ وزیر علی پرویز ملک ریفائنریز دے پیشگی اقدامات دی تعریف کیتی اتے شہری اتے فوجی ݙوہیں شعبیاں سانڳے توانائی دی سلامتی یقینی بݨاوݨ اچ حکومت دی مکمل سپورٹ دا اعادہ کیتا۔ وفاقی وزیر علی پرویز ملک آکھیے ریفائنریزدا پاکستان دی توانائی سپلائی چین اچ اہم کردار اے۔ اساں اپ گریڈیشن، ایندھن دے معیار کوں بہتر بݨاوݨ اتے وݙی مدت استحکام یقینی بݨاوݨ کیتے سازگار پالیسی ماحول ݙیوݨ سانڳے کم کریندے پیوں ۔اے تعاون توانائی دی سلامتی اتے معاشی ترقی دے گھنݨ کیتے ٻہوں اہم اے، جیڑھا ملک کوں مستقبل اچ ہک تکڑا اتے پائیدار پٹرولیم سیکٹر ݙیسی۔ ریفائنریز دے سی ای اوز وفاقی وزیر دی سپورٹ دی تعریف کیتی اتے اپ گریڈیشن، فنانشل اصلاحات اچ حکومتی تعاون اتے شعبے دے عملی چیلنجز تے ڳالھ مہاڑ کیتی۔ ݙوہیں فریقین ایں شعبے کوں اڳوں ودھاوݨ کیتے باقاعدہ مشاورت جاری رکھݨ تے اتفاق کیتا۔ وفد اچ پاکستان ریفائنری لمیٹڈ دے سی ای او زاہد میر، پارکو دے منیجنگ ڈائریکٹر ارتضیٰ قریشی، اٹک ریفائنری لمیٹڈ دے سی ای او عادل خٹک، سائنرجیکو دے سی ای او عامر عباسی اتے نیشنل ریفائنری لمیٹڈ دے سی ای او اسد حسن شامل ہن۔ ایں موقع تے سیکرٹری پٹرولیم مومن آغا، ایڈیشنل سیکرٹری ظفر عباس، اتے ڈائریکٹر جنرل آئل عمران احمد وی موجود ہن۔