وفاقی وزیرتجارت جام کمال خان نال جاپان دے سفیر دی ملاقات

اسلام آباد۔ 5 مئی (اے پی پی) وفاقی وزیر تجارت جام کمال خان جاپان دے سفیر نال ملاقات کیتی جئیں اچ ݙوطرفہ تجارتی تعلقات کوں تکڑا بݨاوݨ اتے ٻہوں عرصے توں موجود ٹیرف نال متعلق مسئلیں دے حل تے ڳالھ مہاڑ کیتی ڳئی۔ وزیر تجارت تجویز ݙتی جو پاکستان اتے جاپان وچال تجارتی تعلقات مزید ودھاوݨ کیتے خصوصی بزنس فورم منعقد کیتا ونڄے۔ جام کمال خان آکھیے جو جاپان کوں پاکستان دی برآمدات اچ وختی ودھارا ضروری اے کیوں جو اے ٻہوں عرصے توں جمود دا شکار ہن۔ انہاں آکھیے جو مالی سال 24-2023 دے دوران ݙوہیں ملکاں وچال تجارتی حجم 1.33 ارب ڈالر رہیے جیندے اچ پاکستان دی برآمدات صرف 19 کروڑ 40 لکھ ڈالر جݙاں جو جاپان توں درآمدات 1.137 ارب ڈالر ہن۔ ملاقات اچ سیکرٹری تجارت جواد پال جاپان دے نال ترجیحی تجارتی معاہدے دی لوڑھ تے زور ݙتے تاں جو منصفانہ مسابقت اتے متوازن ٹیرف کوں یقینی بݨایا ونڄ سڳے۔ انہاں نشاندہی کیتی جو پاکستانی مصنوعات کوں جاپانی منڈی اچ اُچیاں ٹیرف رکاوٹاں دا سامݨا اے جیندے نال انہاں دی مسابقتی صلاحیت متاثر تھی رہی اے۔ جاپان دے جنرلائزڈ سسٹم آف پریفرنسز دے تحت پاکستان دی ٹیکسٹائل مصنوعات تے اوسطاً 5.36 فیصد جݙاں جو چمڑے دی مصنوعات تے ٹیرف ریٹ کوٹہ دے تحت اوسطاً 16 فیصد ڈیوٹی عائد اے۔ جاپانی سفیر بزنس فورم دی تجویز دا خیر مقدم کیتا اتے پاکستانی برآمدات کوں درپیش اُچیاں ٹیرف متعلق خدشات کوں منیندے ہوئیں یقین ݙیوائے جو انہاں مسئلیں کوں مکایا ویسی ۔ وزیر تجارت کاروباری سفر کوں سوکھا بݨاوݨ کیتے کئی واری داخلے آلے ویزیاں دی اہمیت تے زور ݙتا اتے جاپانی سرمایہ کاراں کوں پاکستان دے ٹیکسٹائل، چمڑے، سرجیکل اتے سمندری خوراک دے شعبیاں اچ سرمایہ کاری دی دعوت ݙتی۔ انہاں ݙسایا جو اوساکا ایکسپو 2025 اچ پاکستان دے ٹائپ سی پویلین کوں دنیا توں آوݨ آلے سرمایہ کاراں دی طرفوں ٻہوں تعریف کیتی ویندی پئی اے ۔ انہاں آکھیا جو وزیراعظم شہباز شریف وختی جاپانی سفیر اتے جاپانی کمپنیاں دے نمائندیاں نال ملاقات دی میزبانی کریسن تاں جو تجارتی اتے سرمایہ کاری دے موقعیں تے ڳالھ مہاڑ کیتی ونڄ سڳے اتے سانجھے اقتصادی تعاون کوں ودھایا ونڄ سڳے۔