کشمیر توں فلسطین تئیں پُراݨے حل طلب مسئلے علاقائی تے بین الاقوامی امن تے سلامتی کیتے مسلسل خطرہ ہن، نائب وزیراعظم اسحاق ڈار دا سالانہ ریجنل ڈائیلاگ 2025 نال خطاب

اسلام آباد۔ 5 مئی (اے پی پی) نائب وزیر اعظم / وزیر خارجہ سینیٹر محمد اسحاق ڈار آکھیے کشمیر توں فلسطین تئیں پُراݨے حل طلب مسئلے علاقائی تے بین الاقوامی امن تے سلامتی کیتے مسلسل خطرہ ہن، موسمیاتی تبدیلیاں دے منفی اثرات تے آب و ہوا توں پیدا تھیوݨ آلیاں آفتاں دے اثرات نہ صرف سرحداں توں ٻاہر بلکہ نسلاں تئیں وی محسوس کیتے ویندے پئن ، بین الاقوامی برادری دا ہک ذمہ دار رکن ہووݨ دی حیثیت نال پاکستان علاقائی امن تے استحکام کیتے پرعزم اے، کشیدگی کوں گھٹ کرݨ آلیاں ساریاں کوششاں دی حمایت کریسوں۔ اے ڳالھ انہاں اتھاں انسٹیٹیوٹ آف ریجنل اسٹڈیز دے زیر اہتمام چوتھے سالانہ ریجنل ڈائیلاگ 2025 وچ مہمان خصوصی دی حیثیت نال خطاب کریندے آکھئن ۔ انہاں آکھیا جو دنیا درحقیقت ہنگامہ خیز دور توں گزردی پئی اے، اساکوں ٻہوں سارے ھک ݙوجھے نال جڑیے ہوئے بحراناں دا سامݨا اے جیڑھا بین الاقوامی امن تے سلامتی، اقتصادی استحکام تے پائیدار ترقی کیتے خطرہ ہن۔ نائب وزیر اعظم آکھیے جھیڑیں تے مسلسل غیر ملکی قبضے آوݨ آلیاں نسلاں کوں جنگ دی لعنت توں بچاوݨ تے خود ارادیت دی ضمانت ݙیوݨ دے اقوام متحدہ دے وعدے دی نفی کیتی اے۔ سینیٹر محمد اسحاق ڈار آکھیے بین الاقوامی مالیاتی نظام وچ ساختی خامیاں کوں مکاوݨ وچ ساڈی ناکامی عالمی عدم مساوات تے غربت کوں ودھیندی پئی اے، نفرت تے امتیازی سلوک زینو فوبیا تے اسلامو فوبیا دی شکل وچ ودھدا پئے۔ انہاں آکھیا بدقسمتی نال ساݙا خطہ ہک واری ول ہک ٻئے جھیڑے دے دہانے تے کھڑے، پچھلے کجھ ہفتے دے دوران، بے بنیاد الزامات دے نال نال بھارت دی طرفوں یکطرفہ، سیاسی طور تے محرک تے ٻہوں اشتعال انگیز اقدامات علاقائی تے بین الاقوامی امن تے سلامتی کیتے سنگین خطرہ ہن، علاقائی کشیدگی کوں ودھاوݨ دی ہک منظم تے سوچی سمجھی کوشش کیتی ویندی پئی اے، ہک مانوس انداز تے عمل کریندے بغیر ثبوت دے پاکستان دے خلاف سطحی الزامات، اشتعال انگیز بیان بازی تے جنگی جنون کوں ہوا ݙے تے اینکوں جارحیت تے یکطرفہ کارروائیاں دے بہانے دے طور تے استعمال کرݨ دی کوشش کیتی ویندی پئی اے۔ انہاں آکھیا جو ایں جنگ دے پچھوں واحد مقصد بھارت دے اندرلے چیلنجز، ریاستی سرپرستی وچ تھیوݨ آلی دہشت گردی، بھارت دے غیر قانونی طور تے مقبوضہ جموں و کشمیر وچ جاری انسانی حقوق دی خلاف ورزیاں توں توجہ ہٹاوݨ تے ملکی سطح تے سیاسی مقاصد حاصل کرݨا اے۔ نائب وزیراعظم آکھیے ایندے ایجھے نتیجے برآمد تھیندے پئن جیڑھے بھارت دیاں سرحداں توں ٻہوں اڳوں کھنڈئے پئن ، علاقائی تے بین الاقوامی امن تے سلامتی کوں انتخابی فیدیں تے قربان نی کیتیا ونڄ سڳدا ۔ اے ھک خطرناک سیاسی جوا اے جیڑے خطے وچ لکھاں لوکاں دیاں زندگیاں داؤ تے لا ݙتن۔ سینیٹر محمد اسحاق ڈار آکھیے کہیں وی جارحیت دی صورت وچ پاکستان اپݨی خودمختاری تے علاقائی سالمیت دا پرعزم طریقے نال دفاع کریسی جیویں جو اقوام متحدہ دے چارٹر دے آرٹیکل 51 وچ درج اے۔ انہاں آکھیے پاکستان موجودہ صورتحال دے پس منظر وچ کشمیریاں دے نال نال بھارتی مسلماناں دے خلاف اشتعال انگیز تے اسلاموفوبک بیانیے تے وی فکر مند اے تے اے سلسلہ فوراً ختم تھیوݨا چاہیدے۔ نائب وزیراعظم آکھیے ایں پس منظر وچ سندھ طاس معاہدے کوں روکݨ دا بھارت دا غیر قانونی تے یکطرفہ فیصلہ دنیا کیتے تشویشناک ہووݨا چاہیدے، اے معاہدہ ایجھے یکطرفہ اقدامات دی کوئی بنیاد نی ݙیندا ، بھارت دی کارروائی علاقائی استحکام دے بنیادی ستون کوں ضیان پُڄیندی اے جیندے اہم مشترکہ وسائل دے پرامن انتظام تے گھاٹے اثرات مرتب تھیندن۔ انہاں آکھیے پاکستان دی قومی سلامتی کمیٹی 24 اپریل کوں اے واضح کر ݙتے جو سندھ طاس معاہدے موجب پاکستان دے پاݨی دے وہݨ کوں روکݨ یا ایندا رُخ موڑݨ دی کہیں وی کوشش کوں ”جنگ دا ہک عمل“ تصور کیتا ویسی۔ انہاں آکھیے بین الاقوامی برادری کوں ایندا سنجیدگی نال نوٹس گھنݨا چاہیدے، ایجھے ویلھے جݙاں خطے کوں تعاون تے تحمل دی لوڑھ اے، کوئی وی مہم جوئی مزید عدم استحکام کوں ہوا ݙیسی۔ انہاں آکھیے اساکوں اے نی بھُلݨا چاہیدا جو جموں و کشمیر دا حل طلب جھیڑا جنوبی ایشیا وچ کشیدگی دی بنیادی وجہ اے، اقوام متحدہ دی سلامتی کونسل دیاں متعلقہ قرارداداں تے کشمیری عوام دیاں امنگاں موجب جھیڑے دے منصفانہ، دیرپا تے پرامن حل کیتے اقوام متحدہ دی سرپرستی وچ نویں سرے توں تے مربوط کوششاں دی ٻہوں لوڑھ اے۔