اسلام آباد۔ 5 مئی (اے پی پی) وزیراعظم محمد شہباز شریف آکھیے جو پاکستان دی بہادر فوج دشمن دے خلاف ہر ویلھے تیار اے، کہیں وی بھارتی جارحیت دے خلاف پوری قوم سیسہ پلائی دیوار وانڳوں پاک فوج دے نال کھڑی اے، پاکستان خطے وچ امن تے استحکام چاہندے، اپݨے دفاع دی حفاظت کیتے منہ بھن جواب ݙیوݨ دی صلاحیت وی رکھیندے۔ بھارتی آبی جارحیت ناقابل قبول اے، پاݨی پاکستانی عوام کیتے ریڈ لائن اے، پاکستان اقوام متحدہ دی سیکورٹی کونسل وچ ایں مسئلے کوں بھرپور طریقے نال چیسی، دنیا کوں بھارت دا مکروہ چہرہ ݙکھایا ویسی۔ اے ڳالھیں انہاں چیئرمین پاکستان پیپلز پارٹی بلاول بھٹو زرداری دی اڳواݨی وچ پاکستان پیپلز پارٹی دے وفد نال ملاقات دے اچ آکھئن ۔ وزیراعظم دفتر دے پریس ونگ ولوں جاری اعلامیہ موجب پیپلز پارٹی دے وفد وچ راجہ پرویز اشرف، نوید قمر، گورنر کے پی فیصل کریم کنڈی، وزیراعلیٰ سندھ مراد علی شاہ، وزیراعلیٰ بلوچستان سرفراز بگٹی تے سینیٹر سلیم مانڈوی والا شامل ہن۔ ملاقات اچ ڳالھ مہاڑ کریندے وزیراعظم محمد شہباز شریف آکھیے جو پاکستان دی بہادر فوج دشمن دے خلاف ہر ویلھے تیار اے، بھارت ولوں کہیں وی جارحیت دے خلاف پوری قوم سیسہ پلائی دیوار وانگوں پاک فوج دے نال کھڑی اے۔ انہاں آکھیے جو پاکستان خطے وچ امن تے استحکام چاہندے لیکن اپݨے دفاع دی حفاظت کیتے منہ بھن جواب ݙیوݨ دی صلاحیت وی رکھیندے۔ وزیراعظم آکھیے جو پہلگام واقعے دے بعد بھارت دا اشتعال انگیز رویہ ٻہوں افسوسناک اے، پاکستان نہ صرف پہلگام واقعے تے تشویش کیتی بلکہ واقعے دی غیر جانبدارانہ تے آزادانہ تحقیقات دا مطالبہ وی کیتے۔ وزیراعظم آکھیے جو بغیر کہیں ثبوت دے پاکستان کوں پہلگام واقعے نال جوڑݨ دی بھارتی کوششاں کوں واضح طور تے رد کریندے ہیسے ۔ انہاں آکھیے جو بھارت ولوں سندھ طاس معاہدے کوں غیر قانونی طور معطل کرݨ تے ایں کوں آبی جارحیت دے طور تے ورتݨ ناقابل قبول اے کیوں جو پاݨی پاکستانی عوام کیتے ریڈ لائن دی حیثیت رکھیندے۔ وزیراعظم محمد شہباز شریف آکھیے جو بھارتی جارحیت بے نقاب کرݨ دے حوالے نال پاکستان بھرپور سفارتی کوششاں کریندا پئے تے دنیا کوں پاکستان دا نقطہ نظر ݙساوݨ کیتے میݙی کئی ملکاں دے سفیراں نال ملاقاتاں وی تھئن ۔ انہاں مزید آکھیے جو پاکستان اقوام متحدہ دی سیکورٹی کونسل وچ وی ایں مسئلے کوں بھرپور طریقے نال چیسی تاں جو دنیا کوں بھارت دا مکروہ چہرہ ݙکھایا ونڄے تے عالمی برادری کوں بھارتی عزائم دا ݙسایا ونڄے۔ ملاقات دے موقع تے ڳالھ مہاڑ کریندے پاکستان پیپلز پارٹی دے وفد آکھیے جو پاکستان پیپلز پارٹی سودھے ملک دیاں ساریاں سیاسی جماعتاں پاکستان دے دفاع تے حفاظت سانڳے ھک مٹھ ہن تے وطن عزیز دے دفاع دی خاطر اساں پاکستان دی بہادر فوج دے مونڈھے نال مونڈھا رلا تے کھڑوں۔ وفد بھارتی جنگی عزائم دنیا دے سامݨے رکھݨ تے وفاقی حکومت دی سفارتی کوششاں دی وی تعریف کیتی۔ واضح رہے جو حکومت ساریں توں وݙی اتحادی جماعت نال وفاقی بجٹ تے مشاورت دا آغاز کر ݙتے۔ ایں حوالے نال وزیراعظم محمد شہباز شریف آکھیا جو اساں سارے معاملیں وچ مشاورت کوں ترجیح ݙیندوں ۔ ملاقات اچ پاکستان پیپلز پارٹی دے وفد وفاقی بجٹ مالی سال 2025-2026 دے حوالے نال تجویزاں ݙتیاں۔ بجٹ تے مشاورت دا پہلا دور ہئی۔ پریس ریلیز موجب حکومت دی بݨائی ڳئی کمیٹی پیپلز پارٹی نال مشاورت جاری رکھیسی۔ پاکستان پیپلز پارٹی دے وفد حکومت دی توانائی دے شعبے وچ اصلاحات تے مکمل اعتماد دا اظہار کیتے۔ ملاقات وچ بجلی دی تقسیم کار کمپنیاں کوں صوبیاں دے حوالے کرݨ تے وی ڳالھ مہاڑ تھئی تے فیصلہ کیتا ڳئے جو ݙو مہینے اچ تقسیم کار کمپنیاں صوبائی حکومتاں دے حوالے کر ݙتیاں ویسن۔ ملاقات وچ نائب وزیراعظم تے وزیر خارجہ سینیٹر محمد اسحاق ڈار، وفاقی وزراء احد خان چیمہ، محمد اورنگزیب، احسن اقبال، اعظم نذیر تارڑ، عطاء اللہ تارڑ، علی پرویز ملک، ڈاکٹر طارق فضل چوہدری، رانا مبشر اقبال، مشیر وزیراعظم رانا ثناء اللہ، ڈاکٹر توقیر شاہ، وزیر مملکت عبدالرحمن کانجو تے وزیراعظم دے معاون خصوصی طلحہ برکی وی موجود ہن۔
