اسلام آباد۔6 مئی (اے پی پی) وفاقی وزیر قومی غذائی تحفظ و تحقیق رانا تنویر حسین دی صدارت اچ ہک اعلیٰ سطحی اجلاس منعقد تھیا جیندے اچ چاول تے کپاہ دے بجاں دی دستیابی اتے انہاں دے ضابطہ کار دا جائزہ گھدا ڳئے۔ غیر قانونی بجاں دی فروخت اتے زرعی پیداوار اچ بہتری کیتے اقدامات تے تفصیلی غور کیتا ڳئے۔ ایں موقع تے ݙسایا ڳیا جو آوݨ آلے کاشت دے سیزن کیتے کپاہ دے بجاں دی مجموعی لوڑھ53,796 میٹرک ٹن اے جݙاں جو 50,000 میٹرک ٹن توں ودھ بج پہلے توں موجود ہن، پورے ملک اچ کپاہ دے بجاں دی کہیں قسم دی کمی کائناں ہوسی۔ وفاقی وزیر غیر مصدقہ بجاں دی فروخت تے سخت تشویش دا اظہار کیتا اتے آکھیا جو مارکیٹ اچ غیر معیاری اتے نقلی بجاں دی دستیابی عام اے۔ اجلاس کوں ݙسایا ڳیا جو کئی کمپنیاں ایں غیر قانونی کاروبار اچ ملوث پاتیاں ڳئن۔ ایں سلسلے اچ وزارت 392 کمپنیاں تے پابندی لا ݙتی اے جیڑھیاں غیر مصدقہ اتے نقلی بج ݙیندیاں پئن ۔ وفاقی وزیر مقامی سطح تے بجاں دی تیاری دی اہمیت تے زور ݙیندے آکھیے جو درآمدی بجاں تے انحصار گھٹ کرݨ اتے مقامی قسماں دے معیار کوں بہتر بݨاوݨ کیتے اقدامات جاری ہن۔ انہاں آکھیا جو مصدقہ بجاں دے استعمال کوں ودھا تے اساں فی ایکڑ پیداوار اچ چنڳاں ودھارا اتے زرعی شعبے اچ پائیداری گھن آسڳدوں ۔ انہاں آکھیے جو پاکستان جیڑھا کݙاہیں زرعی جدت طرازی اچ بھارت توں اڳوں ہئی، اے افسوسناک ڳالھ اے جو اڄ اساں بجاں دے معیار اتے پیداوار دے معاملے اچ بھارت دیاں مثالاں ݙیندے پیوں ۔ انہاں بھارتی بجاں دی سمگلنگ اتے سوشل میڈیا تے انہاں دی کھلی تشہیر تے وی تشویش دا اظہار کیتا اتے آکھیا جو وزارت متعلقہ اداریاں نال رل تے ایں غیر قانونی کاروبار اچ ملوث لوکاں دے خلاف سخت کارروائی کریندی پئی اے۔ قیمتاں اچ غیر ضروری الہہ چڑھ تے قابو پاوݨ کیتے وفاقی وزیر چنڳے بجاں اتے جدید کاشت کاری دے طریقیں دے ذریعے زرعی پیداوار اچ ودھارے تے زور ݙتا۔ انہاں ݙسایا جو نیشنل سیڈ ڈویلپمنٹ اتھارٹی بݨا ݙتی ڳئی اے، جیڑھی بجاں دے معیار دی نگرانی، نقلی بجاں دی وکامت روکݨ اتے سخت قوانین دے نفاذ کوں یقینی بݨیسی۔ نویں ضوابط دے تحت، بیج ݙیوݨ آلیاں کمپنیاں کوں پنج سال کیتے رجسٹر کیتا ویسی جیندے بعد انہاں دی کارکردگی اتے معیار دی بنیاد تے رجسٹریشن اچ توسیع ݙتی ویسی۔ وفاقی وزیر کساناں دے حقوق دے تحفظ، غذائی تحفظ دے قیام اتے شفافیت، ضابطہ کاری اتے جدت دے ذریعے زرعی شعبے دی بہتری دے عزم دا اعادہ کیتے۔
