ڈاکٹر مصدق ملک این ڈی ایم اے دے اہتمام نال منعقدہ ݙوجھی پاکستان ایکسپو آفات توں بچاؤ دا افتتاح کرݙتا

اسلام آباد۔6 مئی (اے پی پی) وفاقی وزیر موسمیاتی تبدیلی اتے ماحولیاتی رابطہ ڈاکٹر مصدق ملک اتھاں نیشنل ڈیزاسٹر مینجمنٹ اتھارٹی (این ڈی ایم اے) دے اہتمام نال منعقدہ “ݙوجھی پاکستان ایکسپو آفات توں بچاؤ” دا افتتاح کیتا اتے پاکستان دے آفتاں توں بچاؤ اتے موسمیاتی ریزیلینس کیتے تکڑا عزم کیتے۔ ڈاکٹر مصدق ملک سفیراں، پارلیمنٹیرینز، اقوام متحدہ دے نمائندگان، انسانی ہمدردی دے اداریاں، ماہرین تعلیم اتے نجی شعبے دے رہنماواں تے مشتمل شرکاء نال خطاب کریندے پاکستان دے آفتاں نال نبݨݨ اچ قائدانہ کردار دا ذکر کیتا اتے آکھیے جو پاکستان دنیا دے موسمیاتی لحاظ نال ساریں توں ودھ متاثرہ ملکاں اچ شامل اے۔ وفاقی وزیر آکھیے جو اے ایکسپو پاکستان دے ایں غیر متزلزل عزم کوں ظاہر کریندی اے جو اساں ابتدائی وارننگ سسٹمز، مقامی سطح دے ردعمل دے طریقہ کار اتے بین الاقوامی تعاون دے ذریعے آفات نال نبݨݨ دیاں صلاحیتاں کوں تکڑا بݨیسوں۔ پاکستان چیلنجز کوں موقعیں اچ بدل تے این ای او سی جیھے مقامی ادارے بݨائے اتے علاقائی شراکت داراں نال تکنیکی مہارت دا تبادلہ کرتے خیر سگالی اتے سفارتی اثر و رسوخ حاصل کیتے۔ وفاقی وزیر 2022ء دے تباہ کن چھل جیھے موسمیاتی آفتاں دے اثرات دا ذکر کریندے سول اتے عسکری اداریاں، این جی اوز اتے ترقیاتی شراکت داراں دیاں سانجھیاں کوششاں دی تعریف کیتی۔ انہاں موسمیاتی مالیاتی معاونت اتے کاربن مارکیٹاں تئیں رسائی کیتے عالمی تعاون دی لوڑھ تے وی زور ݙتا تاں جو پاکستان دے گلیشیئرز، خوراک اتے آبی وسائل کوں محفوظ بݨایا ونج سڳے۔ ڈاکٹر مصدق ملک آکھیے اوکھے حالات اچ آفتاں نال نبݨݨ سانڳے ہک ثقافتی طور تے حساس، اعداد و شمار تے مبنی اتے مقامی کمیونٹی کوں رلاوݨ آلا نقطہ نظر لازمی اے۔ انہاں قومی تھنک ٹینک دے قیام اتے بین الاقوامی تعلیمی اداریاں توں علم دے تبادلے کیتے این ڈی ایم اے دے اقدام دی تعریف کیتی۔ وفاقی وزیر آکھیے جو پاکستان دا 2030ء تئیں لچکدار نظام دا وژن جدت، ادارہ جاتی ہم آہنگی اتے شواہد تے مبنی فیصلیں تے منحصر اے۔ انہاں عالمی عطیہ ݙیوݨ آلیں توں اپیل کیتی جو او پاکستان دیاں موافقتی اتے تخفیفی حکمت عملیاں دی حمایت کوں اپݨی ترجیح بݨاون۔