بھارت دی آبی جارحیت دا منہ بھن جواب ݙتا ویسی، وزیرریلوے حنیف عباسی

راولپنڈی۔6 مئی (اے پی پی) وفاقی وزیرریلوے محمد حنیف عباسی آکھیے جو بھارت دی آبی جارحیت دا منہ بھن جواب ݙتا ویسی، پاکستان ہمیشہ امن کوں ترجیح ݙتی اے، پوری پاکستانی قوم جنگ جیھی سنگین صورتحال اچ آپݨی افواج دے نال کھڑی نظر آسی۔ ایں ملک اچ ہک جماعت ایجھا خراب ماحول پیدا کرݨ دی کوشش کیتی تاں جو اے ملک عدم استحکام دے پاسے چلیا ونڄے۔راولپنڈی اچ میڈیا نال ڳالھ مہاڑ کریندے وزیرریلوے حنیف عباسی آکھیے جو اساں جیڑھا پیغام انڈیا کوں ݙتے پاݨی دے معاملے تے او صاف اے، جے تساں پاݨی روکیسو تاں اساں جنگ کیتے تیار ہیسے۔ انڈیا میڈیا چینل پروپیگنڈہ کرݨ اچ ایں ویلھے ہر حد توں ودھ ڳئے۔ ایں اوکھے ویلھے جݙاں اساں حالت جنگ اچ ہیسے تاں ساݙے ملک اچوں ہی ہک جماعت دے لوک سازشاں اچ ملوث نظر آندے پئن ۔ اساں اپݨے ملک اچ تھیوݨ آلی ہر دہشت گردی دا ثبوت انڈیا کوں ݙے چکیوں ۔ دنیا ڄاݨدی اے کون دہشت گرد ملک اے۔ انڈیا کہیں بھل اچ نہ رہے اساں ہمیشہ امن کوں ترجیح ݙتی اے جے کوئی سمجھدے جو جنگ اساں نی لڑ سڳدے تاں اے انڈیا دی بُھل اے۔ انہاں آکھیے جو جنگ لڑݨ دی ساݙی صلاحیت کوں گھٹ سمجھݨ بھارت دی سنگین غلطی ہوسی۔ وزیر ریلوے قومی عزم دا اعادہ کیتا جو پاکستان بھارت دی طرفوں کہیں وی جارحیت دا سوچیسے کائناں بلکہ جواب ݙیسے۔ انہاں مزید آکھیے جو پاکستان پہلگام حملے دی تحقیقات کیتے تعاون کرݨ دا آکھیے پر بھارت فرار تھی ڳئے۔