جے ہندوستان جارحیت دی کوشش کیتی تاں 25 کروڑ عوام اپݨے ملک دے دفاع سانڳے تیار اے، قومی اسمبلی اجلاس اچ پاک بھارت صورتحال تے بحث جاری

اسلام آباد۔6 مئی (اے پی پی) ملک دی مختلف سیاسی جماعتاں نال تعلق رکھݨ آلے ارکان قومی اسمبلی ہندوستان دے فالس فلیگ آپریشن کوں مسترد کریندے ݙو ٹوک انداز اچ واضح کیتے جے ہندوستان جارحیت دی کوشش کیتی تاں 25 کروڑ عوام اپݨے ملک دے دفاع کیتے تیار اے۔ پہلگام دہشت گردی دی ایف آئی آر مودی اتے گودی میڈیا تے بݨدی اے۔ پلوامہ ڈرامہ، مقبوضہ کشمیر دی خصوصی حیثیت ختم کرݨ اتے پہلگام فالس فلیگ دا مقصد پاکستان دا پاݨی روکݨ کیتے ہئی۔ جے ہندوستان مزید کوئی ایجھی حرکت کیتی تاں اے جنگ ہندوستان دے اندر ونڄ تے لڑسوں۔ قومی اسمبلی اجلاس اچ پاک بھارت موجودہ صورتحال تے جاری بحث اچ حصہ گھندے ہوئے ایم این اے اسد نیازی آکھیے جو بھارتی حکومت بھارتی مقبوضہ جموں و کشمیر اچ مسلسل ایجھی کارروائیاں کیتن اتے اڄوکے واقعہ پہلگام وی وزیراعظم مودی دی پاکستان کوں الزام ݙیوݨ دی ہک سیاسی حکمت عملی اے، اے رویہ قابل مذمت اے۔ انہاں آکھیے جو بھارت دی سندھ طاس معاہدے کوں معطل کرݨ دی کوشش بین الاقوامی قانون دی کھلی خلاف ورزی اے، بھارت اپݨی مرضی نال ایں معاہدے کوں معطل نی کر سڳدا، ورلڈ بینک ایں معاہدے دا ہک دستخط کنندہ اے۔ ایم این اے اسد نیازی آکھیے جے بھارت کوئی تجاوز دی کوشش کیتی تاں مسلح افواج جواب ݙیوݨ کیتے مکمل طور تے تیار اے۔ ایم این اے اعجاز الحق ساریاں سیاسی جماعتاں دی وحدت دی تعریف کیتی جݙاں انہاں ہک قرارداد پاس کرتے پہلگام واقعے دی مذمت کیتی اتے قومی سلامتی کمیٹی دے فیصلیاں دی حمایت کیتی۔ انہاں بھارت اتے پاکستان دے وچال لمبے عرصے توں جاری کشیدگی دا ذکر کریندے آکھیے جو بھارت جݙاں وی تجاوز دی کوشش کیتی، پاکستان دی مسلح افواج ہمیشہ مضبوط اتے موثر جواب ݙتے۔ انہاں آکھیے جو ساݙی بہادر افواج ہمیشہ قوم دا دفاع کیتے اتے بھارت دے کہیں وی تجاوز کوں جھکا کیتے ۔ جمعیت علماء اسلام (ف) دے ایم این اے عبدالغفور حیدری آکھیے جو نریندر مودی اڳلے الیکشن دی تیاری کیتے ایجھی حکمت عملی بݨاوݨ ویندا پئٖ کیوں جو او بھارت اچ ہندومت کوں ودھاوے۔ پاکستان پیپلز پارٹی دی رکن قومی اسمبلی شہلا رضا آکھیے جو ہندوستان دا پہلگام فالس فلیگ ماضی دے ایجھے آپریشنز وانڳوں کوڑا ثابت تھی چکیے۔ انہاں آکھیے جو پاݨی کیتے پاکستان ہر حد توں گزر ویسی۔ انہاں آکھیے جو مقبوضہ کشمیر اچ خون دیاں ندیاں وھا تے اسرائیل بݨݨ دی کوشش کریندا پئے ۔ انہاں آکھیے جو پاکستان دیاں ہندوستان نال ہݨ تئیں 4 جنگاں تھئن جیندے پچھوں فالس فلیگ آپریشن شامل ہن۔ انہاں آکھیے جو اقوام متحدہ ایں صورتحال اچ پاکستان دے موقف دی تائید کیتی اے لوڑھ ایں ڳالھ دی اے جو اقوام متحدہ مقبوضہ کشمیر اتے فلسطین اچ وہݨ آلے خون کوں روکݨ کیتے اپݨا کردار ادا کرے۔ پی ٹی آئی دے رکن قومی اسمبلی آکھیے جو اے ویلھا ہک ݙوجھے تے تنقید یا گپ اچھالݨ دا ویلھا کائںی ، حکومت اتے اپوزیشن کوں ایں نازک صورتحال اچ حکمت دا مظاہرہ کرݨا چاہیدے۔ انہاں آکھیے جو 400 کلومیٹر پرے پہاڑ تے ہک دہشت گردی تھیندی اے سکیورٹی فورسز ݙڈھ گھنٹے بعد پڄدی اے تے ایف آئی آر 10 منٹ دے بعد تھی ویندی اے دنیا اچ ایجھی حماقت دی مثال نی ملدی ۔ انہاں ایوان اچ کھڑے تھی تے مودی اتے اوندے وکیے ہوئے میڈیا دے کوڑ کوں مسترد کیتے اتے اعلان کیتا جے پاکستان دا پاݨی نہ کھولیا ڳیا تاں پاک فوج دے نال عوام وی جنگ کیتے تیار اے۔ ایم این اے صبا صدق آکھیے جو مودی اتے اوندے چیلیاں کوں چاہیدے جو او اپݨی ناکامی دا اعتراف کرن۔ انہاں آکھیے جو پاکستان دیاں ترائی مسلح افواج، حکومت اتے سیاسی قیادت ھک مٹھ ہن ۔ انہاں آکھیے جو اپݨے ذاتی مفادات کیتے لوکاں کوں مارݨ تے مودی تے قتل دی ایف آئی آر تھیوݨی چاہیدی اے۔ انہاں آکھیے جو پاکستان دی خارجہ پالیسی ٻہوں تکڑی اے ، وزیراعظم شہباز شریف رُٹھے ہوئے دوست ملکاں کوں منائے اتے اڄ او اوکھے ویلھے اچ ساݙے نال رلے کھڑن ۔پاکستان پیپلز پارٹی دی ایم این اے شرمیلا فاروقی آکھیے جو ہندوستان ہک کوڑ کوں بنیاد بݨا تے پاکستان تے الزام لاتے۔ بھارت دے وکیے ہوئے میڈیا پروپیگنڈے اچ پاکستان کوں مورد الزام ٹھہرایا ڳئے۔ انہاں آکھیے جو پلوامہ ڈرامہ، مقبوضہ کشمیر دی خصوصی حیثیت ختم کرݨ اتے پہلگام فالس فلیگ دا مقصد پاکستان دا پاݨی روکݨ کیتے ہئی۔ پاݨی روکݨ دا مطلب جنگ اے، پاکستان اپݨا پاݨی کہیں کوں روکݨ نہ ݙیسی۔ انہاں آکھیے جو ایں سال دے چھیکڑ اچ الیکشن تھیوݨ آلے ہن او الیکشن جتݨ کیتے اپݨے لوکاں کوں دہشت گردی دا نشانہ بݨیندا پئے۔ ایم کیو ایم دے ایم این اے حفیظ الدین آکھیے جو آرٹیکل 370 اتے 345 دے بعد مقبوضہ کشمیر دی حیثیت بدال تے ہندوستان اپݨا اثرورسوخ ودھاوݨ دی کوشش کیتی پر او اے وی ڄاݨدے جو مقبوضہ کشمیر پاکستان دا اٹوٹ انگ اے۔ انہاں آکھیے جو پاکستان جݙاں بݨیے او کہیں نہ کہیں زاویے توں پاکستان تے جنگ مسلط تھیندی آندی اے۔ جے ہندوستان اے سمجھدے جو او اساکوں مزید آزماوݨ چاہندے تاں او سݨ گھنے جو پاکستان دی 25 کروڑ عوام اپݨے ملک دا تحفظ کرݨ کیتے تیار ٻیٹھی اے۔ انہاں آکھیے جو ہندوستان، اسرائیل دی طرز تے مسلماناں کوں ختم کرݨ چاہندے پر ݙوہیں کݙاہیں کامیاب نہ تھیسن۔ پاکستان مسلم لیگ ن دی ایم این اے طاہرہ اورنگزیب آکھیے جو اڄ ہک واری ول ہندوستان 26 کروڑ پاکستانیاں کوں للکاریے، اے کیجھی دہشت گردی دا واقعہ اے جو سکیورٹی فورسز ݙڈیڑھ گھنٹے بعد پڄدی اے ایف آئی آر بغیر کہیں تحقیق دے 10 منٹ بعد تھی ویندی اے، جے انکوائری تھیندی تاں ایف آئی آر سدھی مودی تے تھیندی کیوں جو اے انہاں دی اپݨی واردات ہئی۔ پی ٹی آئی دے ایم این اے اسلم گھمن آکھیے جو ہندوستان اپݨی سکیورٹی ناکامی دا اعتراف کرݨ دی بجائے ہر واری پاکستان تے الزام لیندا آندے۔ انہاں آکھیے جے ہندوستان مزید کوئی ایجھی حرکت کیتی تاں اے جنگ ہندوستان دے اندر ونڄ تے لڑسوں۔ ہندوستان دے اندر ٻہوں ساریاں تحریکاں چل پئن او ہی انہاں کوں بھنݨ سانڳے کافی ہن ۔ ایم این اے آسیہ اسحاق صدیقی آکھیے جو پاکستان ایٹمی قوت ہووݨ دے باوجود ہمیشہ صبر و تحمل دا مظاہرہ کیتے تے ایں کوں ساݙی کمزوری نہ سمجھیا ونڄے۔ پاکستان دے دفاع، استحکام اتے سلامتی کیتے 25 کروڑ عوام تیار ٻیٹھی اے۔ انہاں آکھیا جو پاکستان ہر عالمی فورم تے بھارتی ریاستی دہشت گردی کوں بے نقاب کیتے اتے کریندا رہسی۔