بھارت کوں بیانیے دی جنگ اچ شکست تھی ڳئی اے، گجرات دے قصائی دیاں ساریاں پالیسیاں ناکام تھی ڳئن، دشمن مکار، بدنیت اتے بے وقوف اے، بے وقوف نہ ہوندا تاں پہلگام فالس فلیگ دی منصوبہ بندی کجھ بہتر کر ڳھندا، عطاء اللہ تارڑ

اسلام آباد۔ ۶ مئی (اے پی پی) وفاقی وزیر اطلاعات تے نشریات عطاء اللہ تارڑ آکھیا اے جو سیاسی اختلافاں دا ملکی دفاع اتے خارجہ پالیسی نال کوئی تعلق کائنی، پاکستان دی سالمیت دا معاملہ ہر قسم دی سیاست توں اُتے اے ، بھارت کوں بیانیے دی جنگ اچ شکست تھی چکی اے، اج گجرات دے قصائی دیاں ساریاں پالیسیاں ناکام تھی ڳئن، دشمن مکار، بد نیت اتے بے وقوف اے، دشمن بے وقوف نہ ہوندا تاں پہلگام فالس فلیگ دی منصوبہ بندی کجھ بہتر کر گھندا، مودی دا مکروہ چہرہ پوری دنیا دے سامھے بے نقاب تھی ڳئے۔ منگل کوں قومی اسمبلی اجلاس اچ ڳالھ مہاڑ کریندیں ہوئیں وفاقی وزیر اطلاعات آکھیا جو دشمن موقعے دی تاک اچ اے جو کڈاں پاکستان تے حملہ کرے۔ انہاں آکھیا جو میݙٰی پاکستانیت اے گوارا نئیں کریندی جو ایں ایوان توں ایجھیں نعرے بلند کیتے ونجن جیڑھے بھارت آپݨے میڈیا تے ڈکھا تے اے تاثر ڈیوے جو پاکستانی قوم داخلی طور تے ونڈی ہوئی اے۔ انہاں آکھیا جو اج معاملہ صرف پاکستان دا اے، آپسی اختلافاں اتے سیاست کیتے بیا وی ویلھا اے۔ انہاں آکھیا جو جنرل ایوب خان دے الفاظ اڄ وی ساڈے دلاں اچ زندہ ہن جو دشمن کوں اندازہ نہ ہئی جو اونہاں کیڑھی قوم کوں للکارے ۔ ایہو او ولولہ اتے جذبہ اے جیڑھا ہمیشہ ایں قوم دی سنڄاݨ رہیا اے۔ عطاء اللہ تارڑ آکھیا جو اج گجرات دے قصائی دیاں ساریاں پالیسیاں ناکام تھی چکیاں ہن۔ گزریل ڈینھ لائن آف کنٹرول دے نیڑے بیلانور شاہ دے مقام تے ملکی اتے غیر ملکی میڈیا کوں دورہ کرایا گیا۔ بھارت اے دعویٰ کریندا رہ گئے جو اتھاں دہشت گرداں دے تربیتی کیمپ موجود ہن اتے پیر چناسی اتے بیلانور شاہ دے ذریعے دہشت گرد سرحد پار ویندن۔ انہاں آکھیا جو ساݙا دشمن صرف مکار ہی نئیں بلکہ بد نیت اتے بے وقوف وی اے۔ ایندی بے وقوفی دی مثال اے اے جو پہلگام دا علاقہ سرحد توں ڈیݙھ سو کلومیٹر پرے اے۔ ایجھے اچ اے دعویٰ کیویں ممکن اے جو کوئی اتھاں ونج تے حملہ کرے۔ بھارت دے غیر قانونی زیر تسلط جموں تے کشمیر اچ بھارت دی نو لکھ فوج تعینات اے، کیا او صرف تماشا ڈیکھݨ کیتے بیٹھی اے؟ انہاں آکھیا جو بے گناہ کشمیریاں کوں جیلاں توں کڈھ تے شہید کیتا ویندا پئے۔ ست ݙھاکیاں توں بھارتی فوج مظلوم کشمیریاں تے ظلم کریندی پئی اے۔ اتھاں پاکستانی پرچم لہراوݨ تے پابندی دے باوجود کشمیری تریمتیں اپݨے شہیداں کوں ساوے ہلالی پرچم اچ دفن کریندیاں ہن۔ اے جذبہ کتھوں آندے؟ “پاکستان دا مطلب کیا، لا الہ الا اللہ” دا نعرہ اج وی وادی اچ گونجدا پئے۔ عطاء اللہ تارڑ آکھیا جو پہلگام پولیس سٹیشن اچ درج کیتی گئی ایف آئی آر خود بھارت دے دعوے کوں بے نقاب کریندی اے۔ واقعے دے صرف ݙاہ منٹ بعد ایف آئی آر درج کیتی گئی جڈاں جو پولیس ڈیݙھ گھنٹے بعد جائے وقوعہ تے پُجی۔ ایں علاقے دے نیڑے فوجی یونٹ موجود اے جیندے سارے توجہ ایں تے اے جو کشمیریاں تے کیویں مظالم ڈھائے ونجن۔ انہاں واضح کیتا جو پہلگام دا واقعہ بھارت دا فالس فلیگ آپریشن ہئی جیڑھا سکیورٹی اتے انٹیلیجنس دی مکمل ناکامی اے۔ اے بی جے پی دے بہار اچ انتخابی عزائم اتے پاکستان دی ودھدی ہوئی معاشی ترقی کوں روکݨ دی سازش اے۔ انہاں دا خیال ہئی جو فالس فلیگ آپریشن توں مقصد حاصل تھی ویسی، مگر ایف آئی آر ہی ساری حقیقت کھول ݙتی۔ انہاں آکھیا جو ویڈیو اچ صاف نظر آندے جو زپ لائن تے ڈکھایا گیا بندہ بے خوفی نال حرکت کریندا پئے، آسے پاسے لوک آزادانہ گھمدے پئے ہن۔ دعویٰ کیتا گیا جو دہشت گرداں بلااشتعال فائرنگ کیتی اتے صرف ہندوواں کوں نشانہ ٻݨایا جیڑھا سراسر کوڑ اے۔ ایں واقعے اچ ہک مسلمان وی جاں بحق تھیا۔ اگر واقعی فائرنگ تھیندی پئی ہوندی تاں زپ لائن تے موجود بندہ اتنا سوکھیں کیویں نکل ویندا؟ وفاقی وزیر آکھیا جو پاکستان بیانیے اتے سفارتی سطح تے بھارت کوں ایجھی شکست ڈتی اے جیڑھی ایندی آوݨ آلیاں نسلاں وی یاد رکھیسن۔ بین الاقوامی میڈیا ادارے جیویں الجزیرہ، نیویارک ٹائمز اتے اکانومسٹ وی اے آکھدے پئے ہن جو بھارت دے کول ایں واقعے اچ پاکستان دے ملوث ہووݨ دا کوئی ثبوت کائنی۔ انہاں آکھیا جو پاکستان صاف موقف اپنائے جو اگر ساݙے پاݨی دا رخ موڑݨ دی کوشش کیتی گئی تاں بھرپور اتے فیصلہ کن ردعمل ڈتا ویسی مگر نال اے وی آکھیا جو ساڈے ہتھ صاف ہن، پہلگام واقعے دی شفاف اتے غیر جانبدارانہ تحقیقات کیتیاں ونجن تاں جو اصل حقائق دنیا دے سامھے آون۔ انہاں ڈسایا جو گزریل اڑتالھی گھنٹیاں اچ پاکستان سفارتی رابطے تکھے کیتے۔ وزیراعظم چین، برطانیہ، ترکیہ، سعودی عرب، یو اے ای اتے کویت دے سفیران نال ملاقاتاں کیتیاں، امیر قطر، ایرانی صدر اتے وزیر خارجہ نال وی گالھ مہاڑ تھئی اتے اقوام متحدہ دے سیکرٹری جنرل نال ٹیلیفون تے گالھ کیتی گئی۔ وفاقی وزیر آکھیا جو پاکستان اے مقدمہ اقوام متحدہ دی سلامتی کونسل اچ چاتا اتے دنیا کوں ڈسایا جو پاکستان کشمیری عوام دی اخلاقی، سیاسی اتے سفارتی حمایت جاری رکھیسی۔ کشمیر ساڈی شہ رگ اے۔ اگر بھارت اے سمجھدے جو ایجھیں کارروائیاں نال عالمی توجہ کشمیر توں ہٹا ڈیسی تاں او غلط فہمی اچ اے۔ وفاقی وزیر اطلاعات آکھیا جو پاکستان دہشت گردی دے خلاف فرنٹ لائن ریاست اے۔ اساں دہشت گردی دے خلاف جنگ لڑی، قربانیاں ڈتیاں اتے اج وی دنیا اتے دہشت گردی وچال ہک کندھ وانڳ کھڑوں۔ دہشت گردی دا نشانہ وی اساں ٻݨیے، جنگ وی اساں لڑی اتے الزام وی اساں تے؟ بھارت کوں شرم آوݨی چاہیدی اے۔ انہاں آکھیا جو بھارت خود ہک ایجھی ریاست اے جیڑھی سکھاں دا قتل کرویندی اے۔ سکھ برادری صاف اعلان کیتے جو او پاکستان دے خلاف نہ لڑسن۔ کینیڈا اچ ہردیپ سنگھ نجر دا قتل، امریکا اتے آسٹریلیا اچ سکھ رہنماواں تے حملے بھارتی ریاستی دہشت گردی نشابر کریندن۔ انہاں آکھیا جو بھارت خود دہشت گردی اچ ملوث اے، پاکستان دے کول بھارتی نیول کمانڈر کلبھوشن یادیو دی شکل اچ ناقابل تردید ثبوت موجود ہن۔ وفاقی وزیر اطلاعات آکھیا جو جعفر ایکسپریس واقعے دی فوٹیج سب توں پہلے بھارتی چینلز کوں کیویں ملی؟ انہاں آکھیا جو بی ایل اے دے تانے بانے بھارت نال جُڑے ہوئے ہن، ایجھے ملک کوں کیا حق اے جو او پاکستان تے دہشت گردی دا الزام لاوے۔ اساں دہشت گردی دے خلاف جنگ اچ نوے ہزار جاناں قربان کیتیاں ہن، دنیا اچ ایندی کوئی مثال کائنی۔ انہاں آکھیا جو پاکستانی قوم عظیم اے، جڈاں اے اٹھدی اے تاں وڈے توں وڈا دشمن وی شکست کھا ویندے۔ بھارت دی ریاستی دہشت گردی کئی ݙھاکیاں توں جاری اے۔ را دے ایجنٹ پاکستان اچ دہشت گردی کرویندے پئے ہن، معصوم جاناں گھدیئاں ویندیاں پئیاں ہن۔ انہاں آکھیا جو پاکستان دی افواج، پولیس، سکیورٹی اداریاں اتے سیاستداناں اپنڑیاں جاناں نچھاور کیتیاں مگر کڈاہیں شکست تسلیم نئیں کیتی۔ ہر طبقے دہشت گردی دے خلاف قربانیاں ڈتیاں۔ ہن بھارتی عوام مودی حکومت توں سوال کریندے پئے ہن جو نو لکھ فوج کشمیر اچ کیوں تعینات اے؟ بھارت دی سفارت کاری کیوں ناکام تھئی؟ انہاں آکھیا جو بھارت بند گلی اچ داخل تھیندا پئے اتے ہر ویلھے پاکستان تے حملے دی منصوبہ بندی کریندا اے۔ اگر ایں واری بھارت کوئی جارحانہ قدم چاتا تاں ایجھا منہ ٻھن جواب ڈتا ویسی جیندے دی تاریخ اچ مثال نئیں ملسی۔ پاکستان کڈاہیں پہل نئیں کیتی، لیکن اگر دشمن پیش قدمی کیتی تاں ول اینکوں ایجھا جواب ڈتا ویسی جو ایندی آوݨ آلیاں نسلاں یاد رکھسن۔ انہاں آکھیا جو پوری قوم افواج پاکستان دے مونڈھے نال مونڈھا جوڑ تے کھڑی اے۔ بھارت ساڈے سوشل میڈیا اکائونٹس بند کیتے تاں اساں ہک نغمہ تیار کر تے بھارتی یوٹیوب چینلز تے بطور اشتہار چلوایا۔ اساں انفارمیشن وار وی لڑدے پئے ہئیں اتے بھارت کوں بند گلی اچ دھکیل ڈتے۔ جیویں ہی اساں پہلگام واقعے دی شفاف تحقیقات دی گالھ کیتی تاں بھارت دیاں لتّاں کنبݨ لگ گئین۔