وزیراعظم محمد شہباز شریف دی سربراہی اچ کراچی-چمن قومی شاہراہ (این۔25) دی تعمیر اتے اپ گریڈیشن بارے جائزہ اجلاس

اسلام آباد۔6مئی(اے پی پی)وزیراعظم محمد شہباز شریف آکھیے جو کراچی-چمن شاہراہ دی اپ گریڈیشن بلوچستان دی سماجی اتے معاشی ترقی اتے خوشحالی سانگے ٻہوں ضروری اے، بلوچستان دی ترقی کوں ترجیح ݙیندے ہوئے گزریل مہینے پیٹرولیم مصنوعات اچ کمی دا فیدہ عوام کوں منتقل کرݨ دی بجائے ایں بچت کوں کراچی-چمن شاہراہ دی اپ گریڈیشن تے لاوݨ دا فیصلہ کیتا ڳئے، سارے صوبیاں ایں فیصلے اچ تعاون کیتے ڄیہڑا وفاق دے اتحاد دی نشانی اے، کراچی تا چمن شاہراہ دی تعمیر نال 18 گھنٹے دا پندھ 6 توں 8 گھنٹے تئیں محدود تھی ویسی، وزیراعظم ہدایت کیتی جو سڑک دی تعمیر دے معیار تے کوئی سمجھوتہ نہ کریندے ہوئے اے منصوبہ ݙو سال اچ مکمل کیتا ونجے۔ وزیراعظم محمد شہباز شریف دی زیر صدارت کراچی-چمن قومی شاہراہ (این۔25) دی تعمیر اتے اپ گریڈیشن بارے اہم جائزہ اجلاس وزیراعظم ہاؤس اسلام آباد اچ تھئے۔ اجلاس اچ فیصلہ کیتا ڳیا جو 790 کلومیٹر لمبی کراچی-چمن شاہراہ کوں بہترین معیار دی ایکسپریس وے اچ بدلیا ویسی۔ اجلاس نال الیندے وزیراعظم ہدایت کیتی جو سڑک دی تعمیر دا معیار موٹر وے ڄھیاں ہووݨا چاھیدے، کیوں جو کراچی-چمن شاہراہ دی اپ گریڈیشن صوبہ بلوچستان دی سماجی اتے معاشی ترقی اتے خوشحالی کیتے ٻہوں ضروری اے، بلوچستان دی ترقی کوں ترجیح ݙیندے ہوئیں پچھلے مہینے پیٹرولیم مصنوعات اچ کمی دا فیدہ عوام کوں منتقل کرݨ دی بجائے ایں بچت کوں کراچی-چمن شاہراہ دی اپ گریڈیشن تے لاوݨ دا فیصلہ کیتا ڳئے، ایں فیصلے اچ سارے صوبیاں پورا ہتھ ونݙائے۔ انہاں آکھیا جو کراچی توں چمن دا پندھ 18 دی بجائے ہݨ صرف 6 توں 8 گھنٹے تئیں رہ ویسی۔ وزیراعظم محمد شہباز شریف آکھیا جو کراچی-چمن ایکسپریس وے نال نہ صرف مسافر فیدہ چیسن ٻھل ٹرانسپورٹ اتے تجارت تے وی مثبت اثرات پوسن، منصوبے دے معیار تے کوئی سمجھوتہ کائنا تھیسی اتے ایں حوالے نال کوئی کوتاہی برداشت نال کیتی ویسی۔ وزیراعظم ہدایت کیتی جو ایکسپریس وے کوں ݙو سال دی مدت اچ ہر حال اچ مکمل کیتا ونجے۔ انہاں وزیراعلیٰ بلوچستان کوں ایکسپریس وے کیتے زمین دی دستیابی پکی بݨاوݨ لو متعلقہ محکمیاں نال تعاون دی وی ہدایت کیتی۔ انہاں آکھیا جو عوام دی سہولت سانگے ایکسپریس وے تے آوݨ آلے سارے وݙے شہراں تے بائی پاس ٻݨائے ونڄن۔ وزیراعظم منصوبے دی تعمیرات اچ ماحولیاتی عنصر سامݨے رکھݨ اتے منصوبے دی تعمیر دے بعد تھرڈ پارٹی ویلیڈیشن دی وی ہدایت کیتی۔ اجلاس اچ گورنر بلوچستان جعفر خان مندوخیل اتے وزیراعلیٰ بلوچستان سرفراز بگٹی صوبہ بلوچستان دی تعمیر و ترقی خصوصاً کراچی-چمن شاہراہ دی تعمیر اتے اپ گریڈیشن اچ خصوصی دلچسپی گھنݨ تے وزیراعظم دا شکریہ ادا کیتے۔ اجلاس کوں منصوبے دی پیشرفت تے بریفنگ ݙیندے ݙسیا ڳیا جو 790 کلومیٹر لمبی کراچی-چمن شاہراہ کوں ایکسپریس وے دے طور تے تعمیر کیتا ویسی جیڑھی 4 لینز دی ݙو رویہ سڑک ہوسی، شاہراہ تے فنڈنگ دی کمی پاروں کم رکیا ہویا ہئی ٻھل حکومت دے پیٹرولیم مصنوعات دی قیمتاں اچ کمی دا فیدہ بلوچستان دی طرف منتقل کرݨ دے فیصلے دی وجہ نال فنڈنگ دے مسئلے حل تھی ڳئن۔ ݙسایا ڳیا جو منصوبے دے خضدار-مستونگ سیکشن تے کم شروع تھی ڳئے جݙاں جو کراچی توں خضدار دے پنڄ سیکشنز دی تعمیر بارے حکمت عملی ٻݨدی پئی اے۔ اجلاس اچ نائب وزیراعظم و وزیر خارجہ سینیٹر محمد اسحاق ڈار، گورنر بلوچستان جعفر خان مندوخیل، وفاقی وزیر اقتصادی امور احد خان چیمہ اتے متعلقہ اعلیٰ حکام وی شرکت کیتی۔ وفاقی وزیر برائے مواصلات عبدالعلیم خان اتے وزیر اعلیٰ بلوچستان سرفراز بگٹی اجلاس اچ بذریعہ ویڈیو لنک شریک تھیے۔