“اسلام آباد۔ 7 مئی(اے پی پی)وزیراعظم محمد شہباز شریف قومی سلامتی، مُلکی سالمیت اتے علاقائی خودمختاری دا تحفظ اتے دفاع ہر قیمت تے یقینی بݨاوݨ دا عزم دوہریندے آکھیے جو بھارت کوں اپݨی جارحیت دی وݙّی غلطی دا خمیازہ ضرور بھوڳݨا ہوسی، اساں عہد کریندے ہیں جو انہاں شہیداں دے خون دے ہک ہک قطرے دا ضرور حساب گھدا ویسی، پاکستان روائتی ہتھیاراں دی جنگ اچ اپݨی برتری دشمن تے ہک واری ول ثابت کیتی اے، اساں کئی ڳُݨا وݙّے دشمن بھارت دی جارحیت دا کرارا جواب ݙِتے، بھارت پاکستان تے حملے نال ساݙی توجہ دہشت گردی کوں انجام تئیں پچاوݨ توں نی ہٹا سڳدا، پوری قوم دفاع وطن کیتے مسلح افواج دے نال ہک وݙّا لشکر بݨ تے لڑݨ کیتے تیار کھڑی اے۔ انہاں اے ڳالھ قوم نال خطاب اچ آکھین۔ وزیراعظم آکھیا جو پچھلی رات بھارت جارحیت کر تے جیڑھی وݙّی غلطی کیتی اے ایںدا خمیازہ ہݨ اوکوں ضرور بھوڳݨا پوسی، شاید او سمجھ بیٹھے ہن جو اساں پِچھو تے ہٹ ویسوں ٻھل او بھل ڳئن جو اے بہادراں دی او قوم اے جیڑھی اپݨے عزم اچ فولادی اے جیندے پُتراں اپݨے آپ کوں میدان جنگ توں نکھاریے، جیڑھے اپݨے وطن دی عزت اتے حفاظت کیتے خون دے آخری قطرے تئیں لڑݨ کیتے تیار ہن۔ انہاں آکھیا جو پوری دُنیا ݙیکھ ڳھدے جو گݨتری دے لحاظ نال کئی ڳُݨا وݙّے دشمن کوں گوݙے ٹکاوݨ اچ صرف کڄھ گھنٹے ہی لڳن اتے اللہ تبارک و تعالیٰ دے فضل و کرم نال ساݙے شاہیناں فضاواں اچ اینجھا طوفان کھڑا کیتے جو دشمن نسݨ تے مجبور تھئے، بھارت دے پنج جنگی طیارے مار ݙِتے ڳئے جنہاں تے انہاں کوں وݙا ماݨ ہا، او سوا، ملبہ اتے عبرت دا نشان بݨ چُکین، اے ساݙا کرارا جواب ہئی جیندے اچ سکواڈرن لیڈر ایم ایم عالم دی گرج ہئی جیڑھی کَل رات ول پورے زور نال گرجی اے اتے ساݙے شاہیناں دشمن تے اینجھیاں کارگر ماراں مارین جیندا وقت وی مرہم نا رکھ سڳسی۔ انہاں آکھیا جو بھارت دے بزدلانہ حملیاں اچ 26 معصوم شہری شہید اتے 46 زخمی تھیئن، انہاں اچ ٻال اتے تریمتیں وی شامل ہن، ہک شہید ٻال ارتضیٰ عباس دے جنازے اچ شرکت کیتی اے، ایںدی عمر ست سال ہئی، اپݨی امّاں اتے بھرا نال گھر ہئی اتے حملے اچ شہید تھی ڳئے، ایویں ٻئے عظیم پاکستانی شہیداں کوں قوم خراج عقیدت پیش کریندی اے، پورا پاکستان انہاں شہیداں دے ٹبراں دے نال اے اتے زخمیاں دی تیکھے صحت یابی کیتے دعا منگدے۔ وزیراعظم آکھیا جو اساں اے عہد کریندے ہیں جو انہاں شہیداں دے خون دے ہک ہک قطرے دا ضرور حساب گھنسوں، اے او بزدل دشمن اے جیڑھا نہتے لوکاں تے وار کر تے اپݨے آپ کوں طاقتور سمجھدے۔ وزیراعظم آکھیا جو ڳئی رات اساں ثابت کیتے جو پاکستان اپݨے دفاع اچ مُنہ توڑ جواب ݙیوݨ جاݨدے، اڄ پوری قوم اپݨی بہادر فوج دی جرات اتے دلیری کوں سلام پیش کریندی اے۔ انہاں آکھیا جو لائن آف کنٹرول تے ہک گھنٹے تے مشتمل فضائی جنگ اچ پاکستانی پائلٹاں اپݨی سرحدی حدُود اچ رہندے ہوئیں اُچیچّی پیشہ ورانہ مہارت، بہادری اتے بے مثال شجاعت نال دشمن دے جہازاں دے پڑخچے اُݙا ݙِتن، ایں لڑائی اچ پاکستان رواجی ہتھیاراں دی جنگ اچ اپݨی برتری دشمن تے ہک واری ول ثابت کیتی اے۔ انہاں آکھیا جو چیئرمین جوائنٹ چیفس آف سٹاف کمیٹی جنرل ساحر شمشاد مرزا، بری فوج دے سربراہ جنرل سید عاصم منیر، پاک فضائیہ دے سربراہ ایئر مارشل ظہیر احمد سندھو اتے پاک بحریہ دے سربراہ نوید اشرف سودھے مسلح افواج پاکستان دے ہر سپاہی اتے افسر کوں سلام پیش کریندں اتے یقین ݙوینداں جو 24 کروڑ پاکستانیاں کوں تُساں تے وݙا ماݨ اتے ناز اے۔ شہباز شریف آکھیا جو پہلگام واقعے دی اݙ اچ پاکستان تے حملہ بے بنیاد اتے بلاجواز اے، امن پسند مُلک دے طور تے پاکستان ایں واقعے دی غیر جانبدارانہ، شفاف اتے معتبر تحقیقات دی پیشکش کیتی ہئی جیندی پور ڄڳ پر زور تائید کیتی ٻھل بھارت عالمی قانون اتے بین الاقوامی ضرورتاں کوں پامال کریندے ہوئیں جارحیت دا رستہ چُݨیا، عالمی قانون اتے اقوام متحدہ دی قرارداداں موجب مقبوضہ جموں و کشمیر ہک منّیا ہویا تنازعہ اے اتے اوں ویلھے تئیں رہسی جݙاں تئیں کشمیری بھیݨاں اتے بھراواں کوں اقوام متحدہ دی نگرانی وچ آزادانہ، غیر جانبدارانہ ماحول وچ حق رائے نی مِل ویندا، بھارت جِتنے ہک پاسے دے فیصلے کر ڳھنے ٻھل ایںدے نال حقیقت کݙاہیں نہ بدلسی۔ انہاں آکھیا جو ایں خطے اچ دہشت گردی توں ساریں توں ودھ متاثر تھیوݨ والا مُلک پاکستان اے، اساں دہشت گردی دے خلاف جنگ وچ 90 ہزار قیمتی جاناں پیش کیتن، 152 ارب ڈالر دے مالی نقصانات برداشت کیتن، اے بھارت دی خام خیالی اے جو ایںدی اجوکی مہم جوئی دہشت گردی دے مُکاوݨ دی جنگ توں ساݙی توجہ ہٹا سڳسی، اساں ایں جنگ کوں انجام تئیں پچا تے سَاھ گھنسوں۔ انہاں آکھیا جو پاکستان دی عزت، سالمیت اتے دفاع کیتے پاک فوج اتے عوام ہک جان اتے ݙو قالب ہن، 24 کروڑ پاکستانی اپݨی بہادر فوج دے نال رل تے ہک بہادر لشکر بݨ تے دشمن دا مقابلہ کریسن اتے باطل کوں وݙّی ہار ݙیسن، تُساݙے وطن دی سالمیت کیتے عزم و ہمت اتے جذبے کوں سلام پیش کرینداں، تُساں سچائی کیتے لڑدے پئے او۔ وزیراعظم محمد شہباز شریف اپݨے خطاب دا آغاز قرآن پاک دیاں آیتاں نال کیتا۔
