نشوم شہریاں دے ناحق خون دے چھیکڑی قطرے تئیں دا حساب گھنسوں، پاک فوج اپݨے دفاع دے دوران بھارت دے انہاں فوجی اہداف کوں نشانہ بݨائے جتھوں پاکستان تے حملے تھئن، ڈی جی آئی ایس پی آر

راولپنڈی ۔8مئی (اے پی پی) ڈائریکٹر جنرل آئی ایس پی آر لیفٹیننٹ جنرل احمد شریف چوہدری آکھیے جو کم ظرف اتے ݙرپوک دشمن فوج دا مقابلہ کرݨ دی بجائے نہتے شہریاں اتے آبادی کوں نشانہ بݨائے، پاکستان دی غیرت مند عوام دے نال عہد کریندوں جو نشوم شہریاں دے ناحق خون دے چھیکڑی قطرے دا حساب گھدا ویسی، پاکستان دی مسلح افواج اپݨے دفاع دے دوران بھارت دے انہاں فوجی اہداف کوں نشانہ بݨائے جتھوں پاکستان تے حملے تھئن، بھارت دے ݙرپوک حملے وچ 31 شہری شہید اتے 57 شہری زخمی تھئن، غیر ملکی میڈیا کوں انہاں ساریاں جاہواں دا دورہ کرایا ڳئے جتھاں بھارت حملے کیتن، میڈیا خود ݙٹھے جو اتھاں کہیں قسم دے دہشت گردی دے تربیتی کیمپ کائنی بلکہ مسیتاں ہن جنہاں کوں شہید کیتا ڳئے۔ میڈیا کوں بریفنگ ݙیندے ہوئیں ڈی جی آئی ایس پی آر ݙسائے جو بھارت دے گزریل رات شہری آبادی تے ݙرپوک اتے افسوسناک حملے وچ 31 نشوم شہری شہید اتے 57 بندے زخمی تھئن۔ بھارت دے ایں ݙرپوک حملے دی جتنی وی مذمت کیتی ونڄے او گھٹ اے، 6 اتے 7 مئی دی وچلی رات بھارت دا مکروہ چہرہ دنیا دے سامݨے ظاہر تھیندا پئے، ساݙا دشمن اتنا گھٹ ظرف اتے ݙرپوک اے جو اپݨے سامݨے مقابلے دی فوج نال لڑݨ دی بجائے رات کوں لُک تے نشوم شہریاں اتے آبادیاں کوں نشانہ بݨیندے۔ انہاں ݙسائے جو ایں حملے وچ نکی عمر دے ٻال وی شہید تھئن، انہاں نشوم ٻالاں جنہاں زندگی دیاں بہاراں ݙیکھݨیاں ہن کیا ایے ہن او دہشت گرد جنہاں کوں نشانہ بݨایا ڳئے۔ انہاں آکھیے جو بھارت اپݨیاں پراکسیز دے ذریعے پاکستان اچ دہشت گردی کریندا پئے جݙاں پاکستان انہاں کیتے زمین تنگ کرݨ شروع کیتی تاں بھارت خود اپݨی فوج نال دہشت گردی دی کارروائی تے لہہ آئے ، اے دہشت گردی نی تاں ٻیا کیا اے۔ انہاں آکھیے جو ایں ڳالھ ثابت تھی ڳئی اے جو ٹرانس نیشنل ٹیررزم اتے کلنگ وچ بھارت ملوث اے۔ اے گالھ دنیا دے سامݨے ثابت تھی ڳئی اے۔ انہاں آکھیے جو بھارت مختلف جاہواں تے مسیتاں کوں نشانہ بݨائے، قرآن پاک شہید کیتے ڳئے، بہاولپور اتے مریدکے دیاں مسیتاں پوری طرح شہید تھی ڳئیاں۔ ڈی جی آئی ایس پی آر آکھیے جو دنیا دا کیڑھا مذہب اے جیڑھا کہیں ݙوجھے دیاں عبادتاں دی جاہواں اتے قرآن پاک کوں شہید کرے۔ انہاں آکھیے جو جݙاں اے حملہ تھئے تاں پاک فوج اپݨے دفاع وچ صرف بھارت دیاں فوجی تنصیبات دا انتخاب کیتے، اے او فوجی اہداف ہن جتھاں پاکستان دی زمین اتے شہریاں تے حملے کیتے ڳئے ہن۔ انہاں آکھیے جو جݙاں دشمن حملہ کیتے تاں پاکستان دی مسلح افواج ایں دے جدید طیاریں کوں دھول چٹائی، ساݙی فوج دشمن دے پنج طیارے مار ݙھائے۔ انہاں آکھیے جو فضائی حملیں دے علاوہ لائن آف کنٹرول اتے ورکنگ بائونڈریز تے سیز فائر لائن دی خلاف ورزی تھئی۔ انہاں ݙسائے جو ساݙی افواج بھارتی فوج دے بریگیڈ ہیڈ کوارٹر، یونٹ بٹالین ہیڈ کوارٹر، جنگل ون پوسٹ، جورا پوسٹ، دھرمسال، شاہ پور پوسٹ، چکوٹھی سیکٹر، لیپہ سیکٹر، بٹل سیکٹر، سانگھڑ پوسٹ، چیڑی کوٹ سیکٹر، نیزہ پیر سیکٹر پوسٹ، سرلیا پوسٹ سودھے انہاں پوسٹاں کوں نشانہ بݨائے جتھوں بغیر اشتعال فائرنگ کیتی ڳئی ہئی۔ ڈی جی آئی ایس پی آر ݙسائے جو افواج پاکستان بھارت دے 7 چھوٹے وݙے ڈرونز مار ݙھائے اتے ݙو ڈرون قبضے وچ گھن ڳھدے ۔ انہاں ݙسائے جو اڄ تک انہاں ساریاں مصروفیات وچ پاک فوج دا کوئی جانی ضیان کائنی تھیا اتے نہ ہی پاک فضائیہ دے کہیں طیارے کوں ضیان پڄے، اے حملہ بھارت اوں ویلھے کیتے جݙاں پاکستان بین الاقوامی میڈیا کوں انہاں جاہواں تے حقائق ݙکھاوݨ کیتے گھن ونڄݨ دی منصوبہ بندی کریندا پیا ہئی جنہاں بارے بھارت دہشت گرداں دے تربیتی کیمپس دا آکھیندا پیا ہئی، 6 اتے 7 مئی دی رات انہاں جاہواں تے بھارت حملے کیتے۔ انہاں آکھیے جو ٻدھ کوں غیر ملکی میڈیا کوں بہاولپور اتے مریدکے گھن ونڄݨا ہئی انہاں کوں ݙکھاوݨا ہئی جو جو ایں جاہواں تے کہیں قسم دی دہشت گردی نی تھیندی پئی۔ انہاں آکھیے جو حکومت پاکستان 150 توں ودھ ملکی اتے غیر ملکی صحافیاں کوں بہاولپور، مریدکے، کوٹلی اتے مظفر آباد دا دورہ کرائے، سارے خیالی تربیتی کیمپس اتے دہشت گرداں دیاں خالی آماج گاہواں دی عکس بندی کیتی اے، دنیا میڈیا دے ذریعے ݙیکھدی پئی اے اتے خود فیصلہ کریندی پئی اے جو کیا اتھاں دہشت گرد ہن یا مسیتاں ہن۔ ڈی جی آئی ایس پی آر آکھیے جو 6 اتے 7 مئی دی وچلی رات عالمی اتے مقامی پروازاں کیتے وی خطرہ ہئی اوں ویلھے 57 پروازاں فضاء وچ ہن۔ انہاں آکھیے جو نیلم جہلم ہائیڈل پاور پراجیکٹ تے وی میزائل ماریے ڳئے۔ انہاں ݙسائے جو قومی سلامتی کمیٹی اجلاس وچ طے پاتے جو اقوام متحدہ دے آرٹیکل 51 دے تحت پاکستان دفاع دا حق استعمال کریندے ہوئیں مسلح افواج کوں مناسب ویلھے، جاہ اتے فیصلے دا اختیار ݙے ݙتے۔ لیفٹیننٹ جنرل احمد شریف چوہدری آکھیے جو قوم، افواج پاکستان اتے افواج کوں اپݨی بہادر قوم تے ماݨ اے، ݙوہیں بھارتی جارحیت دے خلاف ھک مٹھ ہن، اساݙی امن دی خواہش کوں کمزوری نہ سمجھیا ونڄے۔ انہاں آکھیے افواج پاکستان دی طرفوں پوری قوم کوں خراج تحسین پیش کرینداں جو کیویں بھارتی جارحیت تے ہک مٹھ تھی تے بولی اتے افواج دے نال مونڈھے نال مونڈھا رلا تے نال کھڑی اے۔ انہاں آکھیے جو پاکستان دی غیرت مند عوام، افواج اے ݙساوݨ چاہندی اے جو نشوم شہریاں دے ناحق خون دے چھیکڑی قطرے تئیں دا حساب ڳھدا ویسی۔