اسلام آباد ۔ 8 مئی (اے پی پی) وفاقی وزیر قومی صحت مصطفیٰ کمال آکھیا جو مسلح فوجاں دی طبی ضرورتاں کوں ترجیحی بنیاداں تے پورا کیتا ویسی ، وزارت صحت صورتحال دی تکڑی نگرانی کریندی پئی اے ، بلڈ سکریننگ دے نظام کوں موثر اتے بہتر بݨاوݨ اتے پولی کلینک ہسپتال اچ سڑݨ والے مریضاں دے علاج دے خصوصی انتظامات کیتے ونڄن ۔ خمیس کوں ترجمان وزارت قومی صحت ولوں جاری تفصیل موجب پاک بھارت کشیدگی دے تناظر اچ وفاقی وزیر قومی صحت مصطفیٰ کمال دی صدارت اچ قومی ادارہ صحت اچ اعلیٰ سطح دا اجلاس تھیا جئیں اچ ڈائریکٹر جنرل ہیلتھ، قومی ادارہ صحت دے سربراہ، سی ای او ڈریپ ،ساریں وفاقی ہسپتالاں دے سربراہان ، اسلام آباد ہیلتھ ریگولیٹری اتھارٹی دے سربراہ ،وزارتِ صحت دے سینئر افسران، ڈی جی ہیلتھ سندھ ،ڈی جی ہیلتھ کے پی اتے ڈائریکٹر ہیلتھ آزاد جموں تے کشمیر سودھ ساریں سٹیک ہولڈرز شرکت کیتی ۔ اجلاس دا مقصد ممکنہ ہنگامی حالات نال نبڑݨ دی تیاریاں اتے حکمت عملی دا جائزہ گھنݨ ہا ۔ اجلاس وچال وفاقی وزیرِ صحت آکھیا جو کہیں وی ناگہانی صورتحال نال نبڑݨ سانڳے وزارتِ صحت اتے ایں دے ماتحت ادارے مکمل الرٹ رہسن ۔ انہاں آکھیا جو بھارت ناقابلِ اعتبار دشمن اے ، اساکوں ہر ممکن صورتحال سانڳے تیار رہݨا ہوسی ، سی ای او ڈریپ ویکسینز دی بلا تعطل فراہمی یقینی بݨاوݨ سانڳے دوا ساز اداریاں نال وختی رابطہ کرن ، سی ای او ڈریپ بھارت توں منگوائیاں ڳئیاں دوائیاں دے متبادل انتظامات اتے جان بچاوݨ آلی دوائیاں دی بلا تعطل فراہمی کوں یقینی بݨاوݨ ۔ انہاں آکھیا جو این آئی ایچ ویکسین دی مقامی تیاری دی صلاحیت ودھاوݨ سانڳے وختی اقدامات کرے اتے وفاقی ہسپتالاں اچ روزمرہ علاج اچ کہیں قسم دی اوکھ نہ آوݨ ݙتی ونڄے ۔ مصطفی کمال ساریں صوبیاں توں درخواست کیتی جو ہسپتالاں اچ ہنگامی صورتحال پاروں ودھیکی بیڈز مخصوص کیتے ونڄن ۔ انہاں آکھیا جو قومی ادارہ صحت اچ “قومی ہیلتھ ایمرجنسی سینٹر” ٻݨا ݙتا ڳے جیڑھا ساریں صوبیاں اتے متعلقہ اداریاں نال رابطے اچ راہسی ، ساریں صوبے 24/7 کوئیک رسپانس سینٹر نال رابطے اچ رہن ، بحران دے ویلھے معلومات دا ویلھے سر تبادلہ ٻہوں اہم اے ۔ انہاں وفاقی ہسپتالاں اچ وی ودھیکی بیڈز مخصوص کرݨ دی ہدایت کیتی اتے آکھیا جو ہسپتال انتظامیہ بلڈ بینک اچ خون دے وافر ذخائر اتے دوائیں دے سٹاک کوں یقینی بݨاوے ، بلڈ سکریننگ دے نظام کوں مؤثر اتے ودھایا ونڄے ، پولی کلینک ہسپتال سَڑݨ آلے مریضاں دے علاج سانڳے خصوصی انتظامات کرے ۔ وفاقی وزیر صحت پورے ملک اچ برن سنٹرز دی گنجائش ودھاوݨ دی لوڑھ تے زور ݙتا ۔ انہاں آکھیا جو فوج دی طبی ضرورتاں کوں ترجیحی بنیاداں تے پورا کیتا ویسی ، وزارت صحت صورتحال دی تکڑی نگرانی کریندی پئی اے ۔ مصطفیٰ کمال آکھیا جو کہیں وی ہنگامی صورتحال اچ عوام کوں صحت دیاں سہولتاں دی ݙیوݨ کیتے اقدامات کوں یقینی بݨایا ویندا پئے ۔
