اساݙے شاہیناں دشمن دے رفائل طیارے ڈھاتے بھارت دا غرور مٹی اچ ملا ݙتا ، بھارت کوں سفارتی محاذ، عسکری اتے بیانیے دی جنگ اچ شکست فاش تھئی ، وفاقی وزیر اطلاعات عطاء اللہ تارڑ دی قومی اسمبلی اجلاس اچ ڳالھ مہاڑ

اسلام آباد ۔ 8 مئی (اے پی پی)  وفاقی وزیر اطلاعات تے نشریات عطاء اللہ تارڑ آکھیا جو پاک فضائیہ دے شاہیناں دشمن دے رفائل طیارے ڈھاتے بھارت دا غرور خاک اچ ملا ݙتا اے ، پوری قوم متحد اے اتے آپݨٰی مسلح فوجاں دے رلے کھڑی اے ، بھارت کوں سفارتی محاذ، عسکری اتے بیانیے دی جنگ اچ شکست فاش تھئی اے ، دشمن دے عزائم خاک اچ ملا ݙتے ڳئے ہن ۔ خمیس کوں قومی اسمبلی اچ پالیسی بیان ݙیندیں ہوئیں وفاقی وزیر اطلاعات آکھیا جو پاکستان اچ جذبہ حب الوطنی دی اعلیٰ مثال قائم تھئی اے ، ایوان توں اتحاد تے اتفاق دا سنیھا ڳئے ، اپوزیشن دے سنگتیں دا شکریہ ادا کرینداں اتے انہاں دے جذبے کوں سلام پیش کرینداں ۔ پوری دنیا اچ سنیھا ڳئے جو پاکستانی قوم متحد اے اتے اپݨیاں مسلح فوجاں نال کھڑی اے ۔ انہاں آکھیا جو بزدل دشمن رات دے اندھارے اچ حملہ کیتا ، رفائل جیٹس جنہاں تے بھارت کوں ناز ہا ، انہاں کوں پاک فضائیہ دے شاہیناں ڈھاتے دشمن دے تکبر کوں خاک اچ ملا ݙتا ۔ جئیں نیت اتے ارادے نال دشمن پاکستان آلے پاسے ݙٹھا ، اوں کوں ہزیمت چاوݨٰی پئی ۔ بھارتی قوم دا مورال وی ڈھ ڳے ۔ اساݙے شاہیناں بھارت دا غرور خاک اچ ملایا ، اساں انہاں کوں سلام پیش کریندوں ۔ انہاں آکھیا جو پچھلی واری وی بھارت کوں “فنٹاسٹک ٹی” پلائی ہائی ، ایں واری دشمن بھج ڳے اتے چاء دی “ہوم ڈلیوری” کرݨی پئی ۔ ہݨ بھارت آپݨی خفت مٹاوݨ سانڳے بغیر پائلٹ ڈرونز نال حملے شروع کیتن لیکن اساں بھارت دے 25 ڈرونز ڈھا ݙتن ، کجھ کوں سافٹ ہٹ اتے کجھ کوں ہارڈ ہٹ نال نشانہ بݨایا ڳئے ۔ اے اساݙے جدید ایئر ڈیفنس سسٹم دی کامیابی اے ۔ وفاقی وزیر آکھیا جو بھارتی میڈیا رفائل طیاراں دا ملبہ ݙکھیندا پئے ، جیڑھا اساݙی فتح دا اعتراف اے ۔ او چاہندن اے حقیقت لُکی رہوے لیکن ملبہ لُکایا نی ونڄ سڳدا ۔ ہݨ بھارت سو بہانے کرے لیکن دنیا ݙیکھ گھدے جو پاکستان انہاں دے جہاز ڈھا ݙتے ۔ اساں جیڑھے ڈرونز ڈھاتے ہن او اساݙیاں “وار ٹرافیاں” ہن جنہاں کوں اساں میوزیم اچ رکھیسوں اتے اپݨی نسلاں کوں ݙسیسوں جو دشمن دے پائلٹس جݙݨ جہاز اُݙاوݨ توں انکار کیتا تاں ایں بغیر پائلٹ ڈرونز بھیجݨ شروع کیتے جنہاں کوں مار ݙھایا ہئی ۔ انہاں آکھیا جو روایتی جنگ اچ پاکستان دی برتری نشابر تھی ڳئی اے ۔ اساݙیاں مسلح فوجاں ہر ویلھے تیار ہن ، لائن آف کنٹرول تے پاک فوجاں نہ صرف بھارت دے 40 توں 50 فوجی ہلاک کیتے بلکہ دشمن دا بریگیڈ ہیڈ کوارٹر وی اُݙا ݙتا ۔ بریگیڈ ہیڈ کوارٹر کوں اُݙاوݨ ٻہوں وݙی عسکری کامیابی اے ۔ عطاء اللہ تارڑ آکھیا جو بھارت شہری آبادی، تریمتاں اتے بالاں کوں نشانہ بݨایا پر پاکستان منہ ٻھن جواب ݙتا ۔ اساں انہاں دے جہاز ڈھاتے ، ملٹری تنصیبات تباہ کیتیاں اتے دشمن کوں فیصلہ کن نقصان تھیا ۔ ایں موقع تے پوری قوم جاڳدی پئی ہئی اتے اساں بین الاقوامی میڈیا کوں مسلسل حقائق بارے ݙسیندے پئیوں ۔ انہاں انکشاف کیتا جو جݙݨ بھارت ولوں چٹا جھنڈا لہرایا ڳیا تاں اے پاکستان دی جت ہائی ۔ دشمن دے حوصلے جواب ݙے ڳئے ہن ۔ وفاقی وزیر آکھیا جو بھارت سکھ برادری دے خلاف وی اقدامات کیتن ، اتھوں تئیں جو اپݨا ڈرون سکھاں دے گردوارے تے ماریا ۔ دنیا بھر توں سکھ برادری واضح کر ݙتا اے جو کوئی سکھ پاکستان دے خلاف نہ لڑسی ۔ بھارت اپݨی اقلیتاں کوں نشانہ بݨا تے مذموم عزائم حاصل کرݨ چاہندے لیکن ایں دے گھناؤنے عزائم دنیا توں لُکیے نی رہ سڳدے ۔ انہاں آکھیا جو بھارت پلوامہ اتے پہلگام جیئں فالس فلیگ آپریشنز کوں جواز بݨا تے پاکستان تے حملے دی کوشش کیتی لیکن ہݨ او بیانیے دی جنگ اچ مکمل طور تے ناکام تھی ڳئے ۔ او پہلگام واقعے دا کوڑا الزام پاکستان تے سٹݨ دی ناکام کوشش کریندا پئے جڈاں جو ایں دے کول کوئی ثبوت کائنی  اتے تحقیقات توں وی بھڄدا پئے ۔ انہاں آکھیا جو بھارت دے غیر قنونی زیر تسلط جموں تے کشمیر اچ 9 لکھ قابض فوج موجود اے ، سوال اے جو جنہاں دہشت گرداں دا الزام بھارت پاکستان تے لاوݨا پئے او اتنی وݙی فوج دے ہوندیں پہلگام کیویں پڄ ڳئے ؟ کیا 9 لکھ فوج صرف کشمیری مسلماناں تے ظلم کرݨ کیتے رکھی ہوئی اے؟ وفاقی وزیر آکھیا جو پاکستان دہشت گردی دے خلاف جنگ اچ صف اول دا کردار ادا کیتے ، اساں 90 ہزار جاناں دا نذرانہ پیش کیتے ۔ اساݙے شہداء دیاں فہرستاں اساݙے سانڳے اعزاز ہن ۔ جݙݨ بھارت سویلینز کوں نشانہ بݨایا تاں اے پی ایس دی یاد تازہ تھی ڳئی ۔ اساں اے واضح کریندوں جو بھارتی جارحیت دا ہر سطح تے جواب ݙتا ویسی ۔ عطاء اللہ تارڑ آکھیا جو قومی سلامتی کمیٹی مسلح فوجاں کوں بھارتی جارحیت دا منہ ٻھن جواب ݙیوݨ دا مکمل اختیار ݙے ݙتے ۔ بھارت کوں بھرپور جواب ݙتا ویسی لیکن اساں خود طے کریسوں جو کݙاں اتے کیویں ۔ بھارت نہ عسکری محاذ تے ، نہ سفارتی میدان اچ ، نہ بیانیے دی جنگ اچ کامیاب تھی سڳیے ۔ اپݨے خطاب دے چھیکڑ تے وفاقی وزیر اطلاعات جذبہ حب الوطنی نال بھرپور اشعار وی پڑھے :

باطل سے دبنے والے اے آسماں نہیں ہم

سو بار کر چکا ہے تو امتحاں ہمارا

اے ارض پاک تیری حرمت پر کٹ مرے ہم

ہے خُوں تری رگوں میں اب تک رواں ہمارا۔