اسلام آباد۔8 مئی (اے پی پی) وزیر اعظم محمد شہباز شریف نال خمیس دی شام امریکی وزیر خارجہ مارکو روبیو ٹیلی فونک رابطہ کیتا، جڈانجو وزیر اعظم ہر قیمت تے ملک دے دفاع دا پکا عزم کیتا۔ وزیر اعظم آفس دے میڈیا ونگ توں جاری پریس ریلیز موجب وزیر اعظم بھارت ولوں میزائل تے ڈرون حملیاں دی سخت مذمت کیتی، جیندے اچ 31 شہری شہید، 57 زخمی تھئے تے شہری بنیادی ڈھانچے دا ضیان تھیا۔ وزیر اعظم آکھیا جو بھارت دے حملیاں نہ صرف پاکستان دی خودمختاری تے علاقائی سالمیت دی خلاف ورزی کیتی بلکہ جنوبی ایشیا دے خطے وچ امن تے استحکام کوں وی شدید خطرے اچ پا ݙتے۔ وزیر اعظم پاکستان دی خودمختاری تے علاقائی سالمیت دا ہر قیمت تے دفاع کرن دا پکے عزم کیتا۔ انہاں آکھیا جو پاکستانی عوام بھارت دی بلااشتعال جنگی کارروائیاں نال کاوڑ اچ اے۔ وزیر اعظم ݙسایا جو پاکستان اقوام متحدہ دے چارٹر دے آرٹیکل 51 دے تحت آپݨے دفاع اچ کارروائی دا حق محفوظ رکھیندے۔ وزیراعظم جنوبی ایشیا دی اڄوکی سکیورٹی صورتحال تے صدر ٹرمپ دی تشویش کوں سراہیا۔ مارکو روبیو آکھیا جو امریکہ جنوبی ایشیا دی صورتحال تے ڳھاٹی نظر رکھی ہوئی اے کیونکہ او خطے اچ امن تے استحکام کوں ودھارا ڈیوݨ کیتے پرعزم اے۔ ایں مقصد کیتے انہاں پاکستان تے بھارت ڈونہاں کوں کشیدگی گھٹ کرݨ کیتے رل مل تے کم کرݨ دی لوڑھ تے زور ݙتا۔ ڈونہاں فریقاں رابطے وچ رہݨ تے اتفاق کیتا۔
