راولپنڈی۔ 8 مئی(اے پی پی)ڈائریکٹر جنرل آئی ایس پی آر لیفٹیننٹ جنرل احمد شریف چوہدری بھارت ولوں 15 جاہیں تے میزائل حملیاں دے الزام کوں مضحکہ خیز قرار ڈیندے آکھیے جو بھارت امرتسر اچ آپ میزائل مار تے ڈرامہ رچیے، ہک میزائل پاکستان دوی وی آئی جیکوں ڈنگہ اچ ناکارہ بݨایا ڳئے، میزائل دی نوعیت پرکھݨ کیتے فرانزک کیتا ویندا پئے، پاکستان آپݨی مرضی نال ویلھے اتے جاہ دا تعین کر تے بھارت کوں ولدا ݙیسی تاں ایندی بھارتی میڈیا کوں ݙسݨ دی لوڑھ نا پوسی ٻھل ڄق آپ ݙسیسی جو پاکستان جواب ݙتے، اتے ایندا ساکوں حق وی اے،پاکستان 8 مئی کوں اسرائیلی ساختہ 29 ڈرونز ناکارہ بݨائن، بھارتی حملیاں اچ شہادتاں دی تعداد 34 اتے زخمیاں دی تعداد 61 تھی ڳئی اے۔ او نائب وزیراعظم اتے وزیر خارجہ سینیٹر اسحاق ڈار دے کٹھے میڈیا کوں بریفنگ ݙیندے پئے ہن۔ ڈی جی آئی ایس پی آر لیفٹیننٹ جنرل احمد شریف چوہدری ݙسایا جو بھارت آپ ادھم پور توں چار میزائل مارین جنہاں اچوں ترائے میزائل امرتسر دے عمومی علاقے اچ ݙٹھن، صرف ہک پراجیکٹائل انٹرنیشنل بارڈر پار کیتے، ساݙیاں مسلح افواج مسلسل چوکس ہین اتے ایں میزائل دی مانیٹرنگ کرینداں پئن جݙاں ڈنگہ اچ اے میزائل پُڄیا تاں ایکوں مانیٹر کر تے ناکارہ کیتا ڳئے تاں جو ملبے نال کوئی نقصان نہ تھیوے، ایں ملبے دی فرانزک کیتی ویندی پئی اے۔ انہاں ݙسایا جو ترائے ایہو ڄھیں میزائلاں کوں امرتسر دے اندرو ہی ہدف بݨایا ڳئے جیندی وجہ بالکل صاف اے جو بھارت اے درامہ کیوں کرݨ چاہندے؟ بھارت دعویی کیتے جو 15 جاہیں تے پاکستان ایندے اہداف کوں نشانہ بݨائے، ایں بارے کجھ سوالات ہین جو بھارت دی حکومت اتے فوج 18 ویں صدی اچ رہندی اے یا 21 ویں صدی اچ، میزائل آندے تاں ایندے تے ڈیجیٹل سگنیچر ہوندے، ایندے تے کوڑی کہاݨی نئیں گھڑی ونڄ سڳدی، ڄیڑھے ثبوت بھارت 15 اہداف تے حملے دے ݙکھیندا پئے اے کݨک دی زمین اے، کاش او اتھاں سُکی کݨک کوں ٻھا ہی لا ڳھندے، پتہ نئیں بھارت فلم اتے تھیٹر دی دنیا توں نکل تے عملی زندگی اچ کݙاں آسی؟ انہاں آکھیا جو 6 اتے 7 مئی کوں بھارت حملہ آور تھیا تاں ایکوں پتہ ہا جو ایندا جواب وی آسی، ڄیکر انہاں دا ایئرڈیفنس اتنا چنڳا ہا تاں ول اپݨے پنج جہاز بچا گھندے، جݙاں پاکستان اپݨے ویلے، جاہ دے مطابق سٹرائیک کریسی تاں ایکوں ݙساوݨ کیتے انڈین میڈیا دی لوڑھ نہ پوسی ٻھل دنیا آپ ݙسیسی جو پاکستان سٹرائیک کیتی اے۔ ڈی جی آئی ایس پی آر آکھیا جو پاکستان آوݨ آلی ہک ہک شے تے ساݙی اکھ اے، اے چھوٹے کراس سیکشن دے ڈرونز ہن، جݙاں ڈرونز پاکستان دی حدود اچ آئن تاں انہاں نال خاص طریقے نال نمٹیا ڳئے، مناسب ہتھیاراں اتے آلات دا استعمال کیتا ڳئے کیوں جو ساݙی فضا اچ مختلف ملکاں دیاں پروازاں وی ہن۔ ڈی جی آئی ایس پی آر ݙسایا جو اڄ تئیں پاکستان 29 ڈرونز ناکارہ بݨائن، صرف ہک ڈرون فوجی تنصیب کوں جزوی نقصان پُڄائے، اڄ دے تزہ حملیاں وچ ترائے بندے شہید اتے 4 بندے زخمی تھئین۔
