جیکر بھارت کوئی وی مہم جوئی کیتی تاں ایندا تکڑا ولدا ݙتا ویسی، اپݨے عوام کوں مایوس نا کریسوں، وزیر خارجہ محمد اسحاق ڈار دی ڈی جی آئی ایس پی آر دے کٹھے پریس کانفرنس

اسلام آباد۔8 مئی(اے پی پی)نائب وزیراعظم اتے وزیر خارجہ سینیٹر محمد اسحاق ڈار آکھیے جیکر بھارت کوئی وی مہم جوئی کیتی تاں ایںدا تکڑا ولدا ݙتا ویسی، پاکستانی مطمئن رہون، پاک فوج عوام کوں مایوس نہ کریسی، پاکستان بھارتی پنجاب اچ کہیں وی شہری علاقے اچ کارروائی نئیں کیتی، بھارت کولوں سندھ طاس معاہدہ کوں معطل کرݨ دی قانونی گنجائش کائنی، ہک ذمہ دار ملک دی حیثیت نال پاکستان ہر ممکن سٹریٹجک احتیاط ݙکھائی اے۔ اے ڳالھ انہاں ڈائریکٹر جنرل انٹر سروسز پبلک ریلیشنز (آئی ایس پی آر) لیفٹیننٹ جنرل احمد شریف چوہدری دے کٹھے پریس کانفرنس اچ کیتی۔ نائب وزیراعظم محمد اسحاق ڈار آکھیے جو پاکستان بھارتی جارحیت دا اپݨے طے کردہ ویلھے اتے مقام تے جواب ݙیوݨ دا حق رکھدے۔ انہاں آکھیا جو بھارتی ڈرونز لاہور اچ فوجی تنصیب کوں نشانہ بݨاوݨ دی کوشش کیتی، بھارت کوئی ایڈونچر کیتا تاں ساݙی آرمی، نیوی اتے فضائیہ الرٹ ہین۔ نائب وزیراعظم آکھیا جو راولپنڈی کرکٹ سٹیڈیم تے حملہ کر تے بھارت پاکستانی اتے غیر ملکی کھݙاریاں دی جان خطرے اچ پا ݙتی، بھارت دا فوجی تنصیبات تے حملے دا دعویٰ چٹا کوڑ اے۔ انہاں آکھیا جو قوم مطمئن رہوے، حکومت اتے افواج پاکستان اپݨا فرض ذمہ داری نال نبھیسن۔ نائب وزیراعظم آکھیا جو پاکستان اپݨے شہریاں دے تحفظ کیتے پرعزم اے، پاکستان اچ آوݨ آلے بھارتی ڈرونز پاک فوج مار ݙھوائن، ایں توں پہلے پاکستان دی مسلح افواج بھارت دے 5 جنگی طیاریاں کوں مار ݙھوائے جیہڑا بھارت توں ہضم نئیں تھیندا پیا۔ نائب وزیراعظم اتے وزیر خارجہ آکھیا جو بھارت دے کئی ڈرونز پاکستان دی حدود دی خلاف ورزی کیتی اتے بھارتی ڈرونز لاہور اچ فوجی تنصیب کوں نشانہ بݨاوݨ دی کوشش کیتی۔ انہاں آکھیا جو بھارت کوں اپݨے 5 طیاریاں دی تباہی ہضم نئیں تھیندی پئی، او اپݨی خفت مٹاوݨ کیتے اے حرکتاں کریندا پئے۔ نائب وزیراعظم آکھیا جو پاکستانی بھیݨیں بھراواں کوں گھبراوݨ دی کوئی لوڑھ نئیں، مسلح افواج دفاع کیتے پر عزم ہن، پاک فضائیہ دے شاہیناں کامیابی نال 80 بھارتی جنگی طیاریاں دا مقابلہ کیتے۔