اسلام آباد۔ 8 مئی (اے پی پی) نائب وزیر اعظم تے وزیر خارجہ محمد سینیٹر اسحاق ڈار آکھیے جو بھارت سکھ برادری اچ پاکستان مخالف جذبات بھڑکاوݨ کیتے امرتسر کوں ڄاݨ ٻُڄھ تے پروجیکٹائل/میزائلاں نال نشانہ ٻݨائے، پاکستان بھارتی پنجاب اچ کہیں وی شہری علاقے اچ کاروائی نئیں کیتی، بھارت کوئی وی مہم جوئی کیتی تاں ایندا بھرپور جواب ݙتا ویسی، پاکستانی مطمئن رہن، پاک فوج عوام کوں مایوس نا کریسی۔ ڈائریکٹر جنرل انٹر سروسز پبلک ریلیشنز (آئی ایس پی آر) لیفٹیننٹ جنرل احمد شریف چوہدری دے نال ہک پریس کانفرنس نال خطاب کریندے انہاں آکھیا جو بھارت 8 مئی دی سویل چار میزائل فائر کیتے جیہڑے غالباً پاکستانی علاقے کوں نشانہ بݨاوݨ والے میزائل ہن۔ نائب وزیر اعظم آکھیا جو ہک انتہائی مذموم کاروائی اچ تریے پراجیکٹائل ڄآݨ ٻُڄھ تے بھارتی پنجاب دے دارالحکومت امرتسر اچ سٹیے ڳئن جݙاں جو چوتھا پاکستان دی فضائی حدود اچ آیا ڄیکوں پاکستان دے فضائی دفاع ناکارہ بݨا ݙتا اتے ایندا ملبہ ڈینگہ اچ ݙٹھا جیہڑا پاکستان اچ اے۔ انہاں آکھیا جو بھارت دی ہندو فرقہ پرست حکومت پنجاب دی سکھ آبادی اچ پاکستان مخالف جذبات بھڑکاوݨ کیتے پاکستان تے کوڑا الزام لایا، پراجیکٹائل غالباً میزائل داغݨ دے علاوہ متعدد مسلح بھارتی ڈرونز کئی ڄاہیں تے بین الاقوامی سرحد پار کر تے پاکستان دی فضائی حدود دی خلاف ورزی کیتی جیندے نال شہریاں کوں نشانہ بݨایا ڳیا، انہاں حملیاں اچ ہک شہری شہید اتے چار زخمی تھئن۔ بھارت فوجی تنصیب تے حملے دی کوشش کیتی جیندے نال چار فوجی اہلکار زخمی تھئن۔ انہاں آکھیا جو انہاں ڈرونز راولپنڈی کرکٹ سٹیڈیم کوں وی نشانہ ٻݨائے جیہڑا جاری پاکستان سپر لیگ (پی ایس ایل) دے مقام تے ملکی اتے غیر ملکی کرکٹ کھݙاریاں کوں نشانہ بݨاوݨ دی دانستہ کوشش ہئی۔ نائب وزیر اعظم آکھیا جو ول ول اشتعال انگیزی دے باوجود پاکستان ہک ذمہ دار ریاست ہووݨ دی حیثیت نال اڄ تئیں سٹریٹجک تحمل ݙکھیدا پئے اتے اینہہ پختگی دے نال کم کیتے۔ انہاں آکھیا جو پاکستان بین الاقوامی قانون اتے اقوام متحدہ دے چارٹر دے مطابق آپݨے ردعمل کوں سختی نال آپݨے دفاع تئیں محدود رکھیے، ایندے باوجود ایں سنگین اتے غیر قانونی جارحیت پاروں ممکنہ طور تے آپݨی سرزمین اچ میزائل فائر کرݨ اتے فضائی حدود دی خلاف ورزی کرݨ تے پاکستان بھارت کوں آپݨی مرضی دے وقت اتے طریقے دے مطابق ولدا ݙیوݨ دا حق محفوظ رکھدے۔ محمد اسحاق ڈار بھارتی جارحیت تے عوام کوں پرسکون رہݨ دی اپیل کریندے آکھیا جو ملک دی مسلح افواج بھارت دی کہیں وی جارحیت کوں ناکام بݨاوݨ کیتے پوری طرح تیار اے، ہک ݙینھ پہلے پاکستان دی فضائیہ پنج بھارتی طیارے مارݨ دے بعد بھارت شرمندگی پاروں اینجھی ”شرمناک“ کاروائیاں کریندا پئے، بھارت اڄ پاکستان اچ جیہڑی حرکت کیتی اے او شرمناک اتے قابل مذمت اے۔ انہاں آکھیا جو بھارت آپݨی شرمندگی لُکاوݨ کیتے ہک من گھڑت کہانی گھڑی اے جو پاکستان بھارت تے پاکستانی حملے دے جواب اچ ڈرون نال حملہ کیتے، پاکستان بھارتی جارحیت دا آپݨے طے کردہ وقت اتے مقام تے جواب ݙیوݨ دا حق محفوظ رکھدے۔ انہاں آکھیا بھارتی ڈرونز لاہور اچ فوجی تنصیب کوں نشانہ بݨاوݨ دی کوشش کیتی، بھارت کوئی ایڈونچر کیتا تاں ساݙی آرمی، نیوی اتے فضائیہ الرٹ ہن۔ نائب وزیر اعظم آکھیا راولپنڈی کرکٹ سٹیڈیم تے حملہ کر تے بھارت پاکستانی اتے غیر ملکی کھݙاریاں دی جان خطرے اچ پا ݙتی، بھارت دا فوجی تنصیبات تے حملے دا دعویٰ سراسر کوڑا اے، قوم مطمئن رہوے، حکومت اتے افواج پاکستان آپݨا فرض ذمہ داری نال نبھیسن۔ نائب وزیر اعظم آکھیا پاکستان آپݨے شہریاں دے تحفظ کیتے پر عزم اے، پاکستان اچ داخل تھیوݨ والے بھارتی ڈرونز پاک فوج مار ݙھوائن، ایں توں پہلے پاکستان دی مسلح افواج بھارت دے 5 جنگی طیارے مار ݙھوائے ہن اتے اے مار بھارت توں ہضم نئیں تھیندی پئی۔ انہاں آکھیا جو بھارت دے کئی ڈرونز پاکستان دی حدود دی خلاف ورزی کیتی اے اتے بھارتی ڈرونز لاہور اچ فوجی تنصیب کوں نشانہ بݨاوݨ دی کوشش کیتی، بھارت آپݨے 5 طیاریاں دی تباہی دی خفت مٹاوݨ کیتے اے حرکتاں کریندا پئے۔ نائب وزیر اعظم آکھیا جو پاکستانیاں کوں گھبراوݨ دی کوئی لوڑھ نئیں، مسلح افواج وطن دے دفاع کیتے پر عزم ہن، پاک فضائیہ دے شاہیناں کامیابی نال 80 بھارتی جنگی طیاریاں دا مقابلہ کیتا۔
