راولپنڈی۔8مئی(اے پی پی)ݙی جی آئی ایس پی آر لیفٹیننٹ جنرل احمد شریف چوہدری ہک پریس بریفنگ اچ ثبوت سامݨے رکھیندے ہوئیں ݙسائے جو بھارتی علاقے ادھم پور توں چار پروجیکٹائل فائر کیتے ڳئن، بھارت امرتسر دے علاقے تے پروجیکٹائل فائر کیتن، ہک پروجیکٹائل بین الاقوامی سرحد پار کر تے پاکستان اچ آئے ڄیکوں ݙینگہ اچ ناکارہ بݨا تے ݙھوایا ڳئے۔ انہاں آکھیا جو پاکستان ولوں جیہڑی شے مشرق توں آندی اے اوندے تے پاک فوج دی سخت اکھ ہوندی اے، جݙاں اے پروجیکٹائل پاکستان دو آندا پیا ہا تاں ایئر ڈیفنس سسٹم ایکوں مانیٹر کریندا پیا ہا، پروجیکٹائل دے ٹریجیکٹری کوں ݙیھدے ہوئیں ایکوں آپریشنل طریقہ کار دے تحت سٹیا ویندے۔ ایئر ڈیفنس سسٹم پروجیکٹائل کوں وݙی مہارت نال ڈینگہ اچ منڈی بہاؤالدین دے نیڑے ناکارہ بݨا تے سٹ ݙتا، اے پروجیکٹائل بظاہر ہک میزائل لڳدا پئے جیندا پتہ فرانزک دے بعد ہی لایا ویسی، پروجیکٹائل دی ساخت اتے ٻئی تفصیلات وی فرانزک دے بعد ہی سامݨے آسن۔ دفاعی ماہرین دا آکھݨ اے جو ڈی جی آئی ایس پی آر دا ثبوتاں دی بنیاد تے بھارت کوں بے نقاب کرݨ ایں ڳالھ دی نشاندہی کریندے جو بھارت سخت پریشان اے، بھارتی پروجیکٹائل (میزائل) کوں بروقت ناکارہ بݨا تے سٹݨ پاکستان دے مضبوط ایئر ڈیفنس سسٹم دا منہ ٻولیندا ثبوت اے۔ بھارت پہلگام فالس فلیگ آپریشن دے بعد آپݨے آپ ہی پروجیکٹائل امرتسر تے داغ تے الزام پاکستان تے لاوݨ دی مذموم کوشش کیتی۔
