پوری قوم پاک فوج دے مونڈھے نال مونڈھا رلا تے کھڑی اے،وفاقی وزیر ریلوے حنیف عباسی

اسلام آباد۔9 مئی (اے پی پی) وفاقی وزیر ریلوے محمد حنیف عباسی آکھیے جو پوری قوم پاک فوج دے مونڈھے نال مونڈھا رلا تے کھڑی اے تے کہیں وی جارحیت تے دشمن کوں دندان شکن جواب ݙیسوں، سرحداں دے دفاع تے ملکی سالمیت کیتے پوری قوم ھک مٹھ اے ۔ قومی اسمبلی وچ انڈیا دے پاکستان دے مختلف جہیں تے حملیں دے حوالے نال قومی اسمبلی وچ جاری بحث وچ حصہ گھندے انہاں آکھیے جو پوری دنیا دے سامݨے بھارت دا مکروہ چہرہ دنیا دے سامݨےآڳئے، انڈیا کہیں غلط فہمی وچ نہ رہے، پاکستان دی قوم باقی معاملات تے بھانویں وکھری صلاح رکھیندی ہووے تاں سرحداں دی حفاظت تے ملکی دفاع تے سالمیت تے پوری قوم ھک مٹھ اے ایندے تے کوئی سمجھوتہ نی تھی سڳدا۔ انہاں آکھیے پاکستان دی بری، فضائیہ تے بحری افواج کوں سلام پیش کرینددوں جنہاں بھارتی جارحیت دا منہ بھن تے دندان شکن جواب ݙتے۔ انہاں آکھیے جو اڄ اساں دشمن کوں سنھیا ݙیوݨا اے جو شہادت مومن کیتے مطلوب و مقصود اے۔ حنیف عباسی آکھیے جو بھارت ہر موقع تے بزدلی نال رات دے ویلھے حملہ کیتے، اڄ پوری پاکستانی قوم اپݨے شاہیناں کوں خراج تحسین پیش کریندی پئی اے، گجرات دے قصائی صرف مسلماناں دے خون نال ہتھ نی رنڳیے۔ حنیف عباسی آکھیے جو مودی مسلماناں دے نال نال عیسائیاں، سکھاں دا خون وی ونڄائے، بھارت ساݙے ٻالاں، تریمتاں کوں نشانہ بݨائے پراساں انہاں دے ملٹری اہداف کوں نشانہ بݨائے، بھارت پہلگام دا ڈرامہ وی رچایا۔ حنیف عباسی آکھیے جو بھارت دنیا دا ساریں توں وݙا دہشت گرد اے، نیپال، آسٹریلیا، کینیڈا تے برطانیہ وچ بھارت دہشت گردی کریندا پئے ۔ انہاں آکھیے بھارت بلوچستان تے خیبر پختونخوا وچ جیہڑی دہشت گردی کریندا پئے ایندے ثبوت موجود ہن، بھارت دے سہولت کاراں کوں وی چتاوݨی ݙتی ہئی ، جیہڑا وی دہشت گردی وچ ملوث تھیا ساݙے ہک سپاہی دے بدلے سو مریسوں، اڄ بھارتی فوجی بُلبلا پئے، بھارت پروپیگنڈہ کریندا پئے جو ایف 16 ݙھائے، تساں اتھوں نی لنگھ سڳدے، اساں تہیہ کیتے جو اساں بدلہ گھنݨا اے۔ انہاں آکھیے جو اساں ویلھے تے جاہ دا تعین کرتے بدلہ چکیسوں، اساں دہشت گردی دا شکار رہیوں ، دہشت گردی دے سارے الزامات مسترد کریندوں ۔ انہاں آکھیے جݙاں وی بھارت وچ بی جے پی دی حکومت ہووے، دہشت گردی تھیندی اے، اتھاں ہر الیکشن وچ ڈرامہ کیتا ویندے، اساں بھارتی سندور کوں انہاں کیتے تندور بݨائے ۔ وزیرریلوے آکھیے جو اساں 9 مئی آلے نی 28 مئی آلے ہیسے، اساں نہ شہیداں دے مجسمے ݙھائے نہ 9 مئی کیتے، جیہڑے پاکستان توں کمائی کرتے ٻاہر ٻہہ تے ملک دشمنی کریندے پئن او غدار ہن۔