اسلام آباد۔09 مئی (اے پی پی) پاکستان پیپلز پارٹی دے رکن قومی اسمبلی حاجی رسول بخش چانڈیو آکھیے جو پاک فوج ولوں موثر اتے بھرپور جواب دے بعد بھارتی وزیر اعظم نریندر مودی کہیں کوں مُنہ ݙکھاوݨ ڄوڳا نئیں ریہا، بھارت کوں اینجھا سبق سکھیسوں جیہڑا نسلاں یاد رکھسن۔ قومی اسمبلی اجلاس اچ بھارت دی جارحیت تے جاری بحث اچ الیندے انہاں آکھیا جو ساکوں صرف پاکستان اتے ایندے دفاع دی ڳالھ کرݨی چاہیدی اے، لوڑھ پئی تاں اساں اڳلے مورچیاں تے پاک فوج دے مونڈھے نال مونڈھا ڳنڈھ تے لڑسوں، ویلھا آیا تاں سینے تے بم ٻدھ تے دشمن دے ٹینکاں دے سامݨے پئے ونڄݨ توں وی نا چکسوں۔ انہاں آکھیا جو بھارت رات دے اندھارے اچ بزدلاں آلی کار حملہ کیتے، کیوں جو او ڄاݨدن جو ݙینہہ دے سوڄھلے اچ ساݙے شیر جواناں دا سامݨاں کرݨ دی اُنھاں اچ ہمت کائنی، ٻھل ساݙے شاہین اتے سپہ سالار ہر ویلھے جاڳدے پِن اتے اُنھاں بھرپور جواب ݙے تے دشمن کوں پوری دُنیا دے سامݨے بے نقاب کر ݙتے۔ حاجی رسول بخش چانڈیو آکھیا جو پوری قوم ایں ویلھے اپݨی بہادر افواج دے نال کھڑی اے، مُلک دے دفاع کیتے ہر بندہ تیار اے۔ اُنھاں آکھیا جو چیئرمین پیپلز پارٹی بلاول بھٹو زرداری وی واضح طور تے آکھ چُکین جو پارٹی پاک فوج دے نال کھڑی اے اتے بھارت کوں اینجھا جواب ݙتا ویسی جیہڑا او ہمیشہ یاد رکھیسی۔ اُنھاں ایں ڳالھ تے وی افسوس کیتا جو ایوان اچ کُجھ لوک ذاتی شکایتاں گھن تے ٻیٹھِن، حالانکہ ایں ویلے صرف مُلک دے تحفظ اتے قومی اتحاد تے ڳالھ ہووݨی چاہیدی اے۔ اُنھاں آکھیا جو بھارت مسلسل پاکستان اچ دہشت گردی ودھیندا پئے اتے جعفر ایکسپریس حملے دے بعد سندھ طاس معاہدہ معطل کرݨ دی دھمکی ݙے تے آپ کوں بے نقاب کر چُکیے، او پاکستان تے من گھڑت الزام لیندا پئے اتے خطے اچ دہشت گردی کھنڈیندا پئے، اساں سارے متحد ہیں، پاک فوج سودھا سارے ادارے ہک صفحے تے ہِن اتے کہیں کوں وی مُلک تے اُنگلی چاوݨ دی اجازت نا ݙتی ویسی۔
