اسلام آباد۔9 مئی (اے پی پی) ترجمان دفتر خارجہ شفقت علی خان پاکستان اچ دہشت گرداں دے انفراسٹرکچر کوں نشانہ بݨاوݨ دے بھارتی دعوے کوں کُوڑ قرار ݙیندے آکھیے جو بھارتی حملیاں پاروں عورتاں اتے ٻالاں سودھا عام شہری ماریے ڳئن۔ ترجمان دفتر خارجہ ہفتہ وار پریس بریفنگ اچ پاک بھارت تعلقات اچ حالیہ کشیدگی دا ݙسیندے آکھیا جو بھارت 7 مئی توں پاکستان دی خودمختاری دی خلاف ورزی کریندا پئے، پاکستان دے خلاف بھارتی حملیاں علاقائی امن و استحکام کوں خطرے اچ پا ݙتے، پاکستان اِنھاں غیر قانونی کارروائیاں دی بلاشبہ مذمت کریندے، بھارتی اقدامات اقوام متحدہ دے چارٹر، بین الاقوامی قانون اتے بین ریاستی تعلقات دے اصولاں دی کھلی خلاف ورزی ہِن، اے وݙی بدقسمتی دی ڳالھ اے جو بھارت دے لاپروا طرز عمل جوہری ہتھیاراں نال لیس ݙوہاں مُلکاں کوں ہک وݙے تنازعے دے نیڑے پُڄا ݙتے، بھارت دا جنگی جنون دُنیا کیتے سنگین چنتے آلی ڳالھ ہووݨی چاہیدی اے۔ اُنھاں آکھیا جو جنوبی ایشیا دُنیا دی آبادی دا پنڄواں حصہ اے، اے بھارت دے کیتے ونڄݨ آلے غیرذمہ دارانہ اقدامات کوں برداشت نئیں کر سڳدا۔ ترجمان آکھیا جو بھارتی قیادت پہلگام حملے دے تناظر اچ ہک واری ول دہشت گردی دی مظلومیت دی اپݨی شرمناک داستان کوں اڳو تے ودھائے۔ اُنھاں آکھیا جو بھارتی جارحیت اتے اقدامات نال علاقائی امن کوں خطرہ اے۔ ترجمان آکھیا جو اقوام متحدہ اتے اسلامی تعاون تنظیم جھیں بین الاقوامی اداریاں دے نال ڄڳ دے کئی مُلکاں گزریل ݙو ہفتیاں اچ تحمل نال کم گھِنݨ دی اپیل کیتی ہئی، اے ڳالھ افسوسناک اے جو بھارت اِنھاں مطالبیاں تے توجہ نئیں ݙتی۔ بین الاقوامی برادری کوں چاہیدے جو او بھارت کوں اُوندے غیر ذمہ دارانہ، غیر قانونی اتے جارحانہ طرز عمل کیتے جوابدہ بݨاوے۔ اُنھاں یاد ݙیوایا جو بھارت دے سیکرٹری خارجہ گزریل ݙینہہ پاکستان تے کئی الزام لائن جیہڑے من گھڑت اتے بے بنیاد ہِن۔ اُنھاں آکھیا جو اے دعویٰ جو پاکستان پہلگام حملے دے ذریعے حالات کوں مزید خراب کیتے مکمل طور تے مضحکہ خیز اے۔ اُنھاں آکھیا جو اڄ تئیں بھارت ایں دعوے کوں سچا ثابت کرݨ کیتے کوئی قابل اعتماد ثبوت پیش نئیں کر سڳیا۔ انہاں آکھیا جو پاکستان اتے آزاد کشمیر اچ بھارتی جارحیت دے دوران کُجھ مسیتاں کوں وی شہید کیتا ڳیا یا نقصان پُڄایا ڳئے، ایویں نیلم جہلم ہائیڈرو الیکٹرک پراجیکٹ دے کُجھ حصیاں کوں بھارتی گولہ باری نال نقصان پُڄے جیہڑا بین الاقوامی کنونشنز دی خلاف ورزی اے۔ اُنھاں مطالبہ کیتا جو بھارت کوں اِنھاں جرائم دا جوابدہ ہووݨا چاہیدے۔ ترجمان دفتر خارجہ پہلگام حملے کوں پاکستان نال جوڑݨ دی بھارتی کوششاں کوں وی یکسر مسترد کر ݙتا۔ اُنھاں آکھیا جو جنوبی ایشیا کئی مُلکاں دا گھر اے اتے اے خطہ بھارت دے غیر ذمہ دارانہ اقدامات دا متحمل نئیں تھی سڳدا۔ شفقت علی خان ایں ڳالھ تے حیرت ݙکھائی جو بھارتی حکومت پہلگام حملے بارے گمنام اتے مشکوک سوشل میڈیا پوسٹ کوں اہمیت ݙتی۔ اُنھاں سوال چاتا جو کیا دُنیا دے کہیں وی مُلک کوں کُجھ سوشل میڈیا پوسٹس دی بنیاد تے کہیں ٻئے مُلک تے حملہ کرݨ دی اجازت ݙتی ونڄ سڳدی اے؟ ترجمان آکھیا جو بھارت جیوری، جج اتے جلاد دے طور تے کم کرݨ دی کوشش کریندا پئے۔ اُنھاں آکھیا جو بمبئی اتے پٹھانکوٹ واقعات دی تحقیقات اچ گزریل کئی سالاں توں بھارت دے عدم تعاون دے رویے دی وجہ توں پیش رفت نئیں تھی سڳی۔ ترجمان آکھیا جو بھارت آپ کوں دہشت گردی دا شکار دے طور تے پیش کرݨ دی کوشش کریندا پئے اتے او پاکستان اچ دہشت گردی دی منصوبہ بندی، حمایت اتے اوندی حوصلہ افزائی اچ اپݨے کردار کوں آسانی نال نظر انداز کریندے۔ اُنھاں آکھیا جو بھارتی بحریہ دا حاضر سروس افسر کمانڈر کلبھوشن یادیو پاکستان اچ دہشت گردی، بغاوت اتے جاسوسی اچ بھارت دے ملوث ہووݨ دا زندہ ثبوت اے، اے کوئی راز نئیں جو بھارت دا ٹارگٹڈ قتل اتے ٻئی تخریبی سرگرمیاں دا نیٹ ورک عالمی سطح تے کھنڈ چُکیے۔ ترجمان نشاندہی کیتی جو پہلگام تے حملہ پاکستان نئیں کیتا ٻھل ایندے برعکس بھارت پاکستان دے کئی علاقیاں تے حملہ کیتا اتے پاکستان اپݨے دفاع کیتے اقوام متحدہ دے چارٹر اچ درج تمام اقدامات دا حق رکھدے۔ شفقت علی خان آکھیا جو اے دعویٰ جو پاکستان 22 اپریل دے پہلگام حملے دے ذریعے حالات کوں ٻیا خراب کیتے بالکل مضحکہ خیز اے، اڄ تئیں بھارت ایں حملے اچ پاکستان دے ملوث ہووݨ دا کوئی مصدقہ اتے قابل تصدیق ثبوت پیش نئیں کر سڳیا، ایندے برعکس بھارت دی مسلح افواج ولوں کیتی ونڄݨ آلی جارحیت دی کارروائیاں کوں اُندی پوری حکومت دی منظوری اتے حمایت حاصل اے۔ اُنھاں آکھیا جو 26 اپریل کوں وزیر اعظم پاکستان پہلگام حملے دی غیر جانبدار تفتیش کاراں دے ذریعے شفاف اتے آزاد تحقیقات دی تجویز پیش کیتی ٻھل بھارت جارحیت دا رستہ اپنائے، اساں اے ݙیکھ تے حیران ہیں جو بھارتی حکومت گمنام اتے مشکوک سوشل میڈیا پوسٹس کوں کتنی اہمیت ݙیندی اے، اُنھاں پہلگام حملے اچ ”ریزیسٹینس فرنٹ“ دے ملوث ہووݨ دا مقدمہ بݨائے۔ ترجمان آکھیا جو ایں موقع تے میکوں سانحہ سمجھوتہ ایکسپریس دے متاثرین کوں وی یاد کرݨا چاہیدے جیندے اچ ہندو انتہا پسنداں دے ہتھو 40 توں ودھ پاکستانی شہری جاں بحق تھئن، وݙے افسوس دی ڳالھ اے جو ایں سانحے دے ذمہ دار جِنھاں دا بھارت دے حکمراناں نال تعلق ہئی بری تھی ڳئے، اساں اے پُچھݨ دا حق رکھدے ہیں جو کیا سانحہ سمجھوتہ ایکسپریس متاثرین دے نال انصاف تھئے؟ اُنھاں آکھیا جو سندھ طاس معاہدہ ݙوہاں ہمسایہ مُلکاں وچال پاݨی دی تقسیم دا ہک کامیاب انتظام رہ ڳئے، اے معاہدہ جنگاں اچ وی برقرار رہ ڳیا ٻھل موجودہ بھارتی حکومت پاݨی کوں ہتھیار بݨاوݨ تے تُلّی ہوئی اے، سندھ طاس معاہدہ التوا اچ رکھݨ یکطرفہ اتے غیر قانونی اے، معاہدے اچ اینجھیاں کوئی شقاں نئیں، اے کارروائی بین الاقوامی معاہدیاں دے تقدس کیتے بھارت دی صریح بے توقیری کوں ظاہر کریندی اے اتے اے ہک خطرناک مثال قائم کریندی اے۔ اُنھاں آکھیا جو اے علاقائی اتے عالمی استحکام دے ڳوڑھے مضمرات دے نال علاقائی تعاون دے بنیادی ستون تے حملہ کریندی اے، پاکستان ہک زرعی معیشت اے، لکھاں لوک ایں معاہدے دے ذریعے ریگولیٹ کیتے ونڄݨ آلے پاݨیاں تے انحصار کریندِن۔ اُنھاں آکھیا جو بھارتی فیصلہ پاکستانی عوام اتے اُندی معیشت تے حملے دے مترادف اے، پاکستان کیتے بھارتی اعلان دی کوئی قانونی حیثیت نئیں، اے معاہدہ نافذ العمل ہے اتے فریقین ایں تے عمل کیتے مکمل طور تے پابند ہین۔ اُنھاں آکھیا جو پاکستان ولوں حکومتی مذاکرات اچ شامل تھیوݨ توں انکار دے بھارتی الزامات وی غلط ہِن، پاکستان ایں معاملے تے بھارت دے نال مسلسل رابطے اچ اے۔ شفقت علی خان آکھیا جو اساں کوں خاص کر بھارتی سیکرٹری خارجہ دے اِنھاں غیر اخلاقی اتے غیر سفارتی ریمارکس تے افسوس اے، اے انتہائی بدقسمتی دی ڳالھ اے جو اڄ کل بھارت اچ برسر اقتدار حکمران طبقہ تاریخ کوں نویں سروں لکھݨ دی کوشش اتے ٻہوں سارے لغو دعوے کریندا پئے، اساں اُنھاں کوں یاد ݙیواوݨ چاہندے ہیں جو اے بھارت ہی ہئی جئیں جموں و کشمیر دے تنازع کوں اقوام متحدہ اچ گھِن ڳیا، اڄ او اقوام متحدہ، پاکستان اتے سب توں ودھ کشمیری عوام نال کیتے ڳئے اپݨے وعدیاں توں کیویں مُکر سڳدے۔ اُنھاں آکھیا جو درحقیقت بھارت اپݨے تسلط پسندانہ عزائم دی وجہ توں خطے اچ عدم استحکام دا ہک مستقل عنصر بݨیا ہوئے، اے اپݨے چھوٹے ہمسایاں کوں غیر مستحکم کرݨ کیتے مسلسل کم کریندا پئے اتے ایں علاقائی تعاون کوں ودھارا ݙیوݨ دیاں ساریاں کوششاں کوں ناکام بݨا ݙتے۔
