آپریشن بُنْيَانٌ المَّرْصُوْص، پاکستان دے بھارتی ویب سائٹس تے کامیاب سائبر حملے

اسلام آباد۔10 مئی (اے پی پی) آپریشن بُنْيَانٌ المَّرْصُوْص دے تحت پاکستان کامیاب سائبر حملیاں اچ کئی بھارتی ویب سائٹس کوں کامیابی نال نشانہ ٻݨائے۔ سکیورٹی ذرائع دے مطابق بھارت دی حکمران جماعت بھارتیہ جنتا پارٹی (بی جے پی) دی آفیشل ویب سائٹ انہاں حملیاں اچ ہک اہم ہدف ہئی جݙاں جو کرائم ریسرچ انوسٹی گیشن ایجنسی، مہانگر ٹیلی فون نگام لمیٹڈ (ایم ٹی این ایل)، بھارت ارتھ موورز لمیٹڈ اتے آل انڈیا نیول ٹیکنیکل سپروائزری سٹاف ایسوسی ایشن سمیت ٻہوں ساری ویب سائٹس تے کامیاب حملے کیتے ڳئن جیندے بعد انہاں ویب سائٹس توں وݙی تعداد اچ ڈیٹا مٹا ݙتا ڳئے۔ سائبر حملیاں وچال ہندوستان ایروناٹکس لمیٹڈ، بارڈر سکیورٹی فورسز اتے یونیک آئیڈینٹی فیکیشن اتھارٹی آف انڈیا (یو آئی ڈی اے آئی) دے علاوہ ٻئیں مختلف اہم بھارتی اداریاں دی ویب سائٹس توں وی حساس معلومات حاصل کیتی ڳئی اے۔ سکیورٹی ذرائع آکھیا جو پاکستان دے کامیاب سائبر حملیاں اچ بھارتی فضائیہ اتے مہاراشٹر الیکشن کمیشن دے ڈیٹا بیس تائیں وی رسائی حاصل کیتی ڳئی اے۔ ایندے علاوہ پاکستانی ہیکرز پورے بھارت اچ 2500 توں ودھ نگرانی کرݨ آلے کیمریاں کوں وی اپݨے کنٹرول اچ گھن ڳھدے جیہڑا سائبر حملیاں دے وسیع آپریشن دی عکاسی کریندے۔