راولپنڈی۔ 10 مئی (اے پی پی) پاکستان دی مسلح فوج ولوں جاری آپریشن بُنْيَانٌ المَّرْصُوْص (سیسہ پلائی دیوار) دے تحت دشمن بھارت کوں بھرپور جوابی کارروائی دا سامݨا اے، جیندے اچ روایتی محاذ توں گھن تے سائبر محاذ تئیں پاکستان ہر میدان اچ دشمن دا زبردست نقصان کیتے۔ سیکورٹی ذرائع موجب پاکستان دی سائبر اٹیک ٹیم بھارتی انفارمیشن نیٹ ورک کوں ہلا تے رکھ ڈتا۔ بی جے پی دی آفیشل ویب سائٹ، کرائم ریسرچ انویسٹیگیشن ایجنسی، ہندوستان ایروناٹکس لمیٹڈ، بارڈر سیکیورٹی فورسز، آل انڈیا نیول ٹیکنیکل سٹاف ایسوسی ایشن تے یونیک آئیڈنٹیفکیشن اتھارٹی سمیت درجناں اہم ویب سائٹس ہیک کر گھدیاں گئیاں۔پاکستانی سائبر ماہرین مہاراشٹرا اسٹیٹ الیکٹرسٹی ٹرانسمیشن کمپنی کوں ہیک کر تے پورے علاقے دی بجلی منقطع کر ݙتی، جڈاں جو سارے کمرشل تے گھریلو میٹراں دا ڈیٹا مٹا ݙتا گیا۔ ایندے علاوہ، بھارتی آسام رائفل، ڈیپارٹمنٹ آف اٹامک انرجی تے انڈین ڈیفنس پروڈکشن سویں حساس ویب سائٹس دا ڈیٹا لیک کر تے ڈارک ویب تے جاری کر ݙتا گیا، جتھاں بھارت دی دہشت گردی دے ناقابل تردید ثبوت وی دنیا دے سامھے رکھے گئے۔ 2500 توں ودھ بھارتی سرویلنس کیمرے ہیک تھیوݨ نال نہ صرف بھارت دے داخلی سیکیورٹی نظام دی قلعی کھل گئی بلکہ بھارتی انفارمیشن ٹیکنالوجی دے کھوکھلے دعوے وی بے نقاب تھی ڳئے۔آپریشن بُنْيَانٌ المَّرْصُوْص اچ پاکستانی قوم تے فوج دا جذبہ شہادت، ٹیکنالوجی تے دسترس تے دشمن کوں ہر محاذ تے زیر کرݨ دا عزم پوری شدت نال نشابر تھیندا پئے۔ فضا اللہ اکبر دے نعریاں نال گونجدی پئی اے تے دنیا ڈیکھدی پئی اے جو پاکستان ہر میدان اچ دشمن دے ناپاک عزائم کوں ناکام ٻݨاوݨ دی بھرپور صلاحیت رکھیندے۔
