اسلام آباد۔ 10 مئی (اے پی پی) ترجمان دفتر خارجہ آکھیا جو پاکستان علاقائی امن اتے استحکام کیتے بھارتی جارحیت دے خلاف ٻہوں ذمے دارانہ، متناسب اتے پختہ جواب ݙتے، ݙو جوہری ملکاں وچال ٹکراؤ بین الاقوامی برادری کیتے سوچݨ دی ڳالھ اے۔ جنوبی ایشیا وچ تزویراتی عدم استحکام جموں تے کشمیر دے حل طلب مسئلے دا نتیجہ اے، عالمی برادری پائیدار امن کیتے بھارت کوں پاکستان دے خلاف نام نہاد دہشت گردی دے کوڑے بیانیے کوں استعمال کرݨ توں روکے اتے پاکستان دی حمایت کرے۔ پاکستان اتے بھارت جنگ بندی دی مفاہمت تے راضی تھی ڳئن، جڈانجو متعلقہ پیش رفت کوں صحیح تناظر وچ رکھݨ ضروری اے۔ ترجمان دفتر خارجہ توں جاری بیان دے مطابق بین الاقوامی سرحد دے پار توں کئی جاہیں تے براہموس میزائلاں دی فائرنگ دے جواب وچ پاکستان کوں اقوام متحدہ دے چارٹر دے آرٹیکل 51 دے تحت اپݨے دفاع دے حق دا استعمال کریندیں ہوئے بلا اشتعال اتے غیر قانونی بھارتی جارحیت دا جواب ݙیوݨا پیا۔ ایں مناسبت نال پاکستان ہفتے دی سویل سویرے “آپریشن بنیان المرصوص” شروع کیتا۔ بیان دے مطابق بغیر کہیں ثبوت اتے بین الاقوامی تفتیش کاراں ولوں غیر جانبدار، شفاف اتے قابل اعتماد تحقیقات دی پاکستان دی پیشکش کوں نظر انداز کریندے ہوئے بھارت 7-10 مئی 2025 دی راتیں وچ کئی حملے کیتے جیندے وچ تریمتیں، ٻال اتے وݙیرے سودھا معصوم جاناں دا ضیان تھیا۔ انہاں اندھا دھند حملیاں عبادت گاہیں سودھا انفراسٹرکچر کوں نقصان پڄاوݨ دے علاوہ درجناں لوک شدید زخمی تھئے۔ بھانویں جو 6 اتے 7 مئی دی درمیانی رات تھیوݨ والی وحشیانہ جارحیت، میزائلاں اتے کلر ڈرونز دے ذریعے پاکستان دی خودمختار فضائی حدود دی خلاف ورزی اتے اوندے نتیجے وچ تھیوݨ والے انسانی اتے مالی نقصانات پہلے ہی ٻہوں سنگین ہن، بھارت وفاقی دارالحکومت سودھا پاکستان دے دور دراز علاقیاں وچ کئی ودھیک ڈرونز بھیڄ تے علاقائی امن تے استحکام کوں ٻیا خطرے وچ پا ݙتا۔ انہاں قاتل ڈرونز، گولہ باری اتے میزائلاں کئی شہری اتے فوجی اثاثیاں کوں نشانہ بݨایا، جیندے نال ودھیک انسانی اتے مالی نقصانات تھئے اتے پاکستانی عوام وچ عدم تحفظ دا شدید احساس پیدا تھیا، جیندے نتیجے وچ اپݨے دفاع وچ فوری جواب دا عوامی مطالبہ ودھ ڳیا۔ ساݙے ایئر بیسز کوں نشانہ بݨیندے ہوئے کئی میزائل وی فائر کیتے ڳئے۔ بیان وچ آکھیا ڳیا ہے جو بھارتی جارحیت اتے مسلسل اشتعال انگیزی دا سامݨا کریندے ہوئیں وی پاکستان ٻہوں تحمل دا مظاہرہ کیتے، تاہم اینکوں اپݨے لوکاں دی حفاظت اتے سلامتی کوں یقینی بݨاوݨ کیتے جواب ݙیوݨ تے مجبور تھیوݨا پیا۔ مسلسل اشتعال انگیزی دے باوجود ساݙے جواب دانستہ شہری ہلاکت توں پرہیز کیتے اتے اے درست، متناسب، باریک بینی نال متعین اتے نشابر تے تحمل تے مبنی ہئی۔ صرف انہاں اداریاں اتے تنصیبات کوں نشانہ بݨایا ڳیا جیں پاکستان دے خلاف کھلی جارحیت کیتی۔ انہاں اہداف وچ او ہندوستانی ایئر بیس وی شامل ہن جتھوں پاکستانی ایئر بیس کوں بلا اشتعال میزائل حملیاں دا نشانہ بݨایا ڳیا ہئی۔ ایں حوالے نال ناقابل تردید ثبوت پہلے ای عالمی برادری نال شیئر کیتے ونڄ چکن۔ ترجمان دفتر خارجہ دے بیان دے مطابق ݙو جوہری ہتھیاراں نال لیس ریاستاں وچال اے خطرناک ٹکراؤ بین الاقوامی برادری دی طرفوں گہرے مشاہدے اتے ہک جامع جائزے دا متقاضی ہے۔ جنوبی ایشیا دے غیر مستحکم خطے وچ ݙو ہمسایہ ریاستاں وچال گہرے تاریخی اختلافات دا معاملہ ہووݨ توں ہٹ تے تنازعے کوں مسابقتی جغرافیائی سیاسی مفادات دے وسیع تناظر وچ ݙیکھݨا چاہیدے۔ ایں مقابلے دا منفی اثر علاقائی سلامتی دے انداز دا مستقل تغیر رہ ڳیا اے، ایں کیتے تنازعات دے کوئی وی اسباب، اختراعی یا حقیقی انہاں مسئلیاں دی ابتدا اتے بنیادی وجوہات کوں سمجھݨ بغیر کہیں وی ملک تے نیہی پاتے ونڄ سڳدے، جیں ولا ولا علاقائی تنازعات دا باعث بݨدن، جیں دا خطہ اتے دنیا متحمل نی تھی سڳدی۔ بیان وچ زور ݙتا ڳیا جو جنوبی ایشیا وچ تزویراتی عدم استحکام جموں و کشمیر دے حل طلب مسئلے دا نتیجہ اے۔ اے تنازعہ کشمیریاں دے حق خودارادیت کیتے جائز جدوجہد کوں دباوݨ اتے اینکوں دہشت گردی نال غلط طریقے نال منسوب کرݨ نال ودھ ڳیا ے۔ چیلنجاں دے باوجود پاکستان سرد جنگ دی تباہ کاریاں توں ہک ایجھیں پرعزم ریاست اتے معاشرے دے طور تے ول ابھریے جیں دہشت گردی اتے انتہا پسندانہ نظریے دے پھیلاؤ دے خلاف ہک مضبوط کندھ بݨ ڳئی، بھانویں جو ایندی قیمت ٻہوں بھاری اے، دہشت گردی دے خلاف عالمی جنگ بالخصوص نائن الیون دے بعد پاکستان دی قربانیاں اتے خدمات بے مثال ہن۔ بیان دے مطابق بھارت مغربی سرحداں دے نال دہشت گردی دے خلاف جنگ کیتے پاکستان دے زبردست عزم کوں محسوس کریندے ہوئے پاکستان دے خلاف ہک شدید ہائبرڈ مہم چلا تے اتے اینکوں غیر مستحکم کرݨ کیتے پراکسیز دے ذریعے دہشت گردی دا منصوبہ بݨا تے ایں سمجھی ونڄݨ والی کمزوری توں فائدہ چاوݨ دی بار بار کوشش کریندا ریہے۔ 9/11 دے بعد بھارت دی فوجی اشتعال انگیزیاں کوں ایں روشنی وچ ݙیکھݨا چاہیدے۔ دہشت گردی دا شکار ہووݨ دے باوجود ایں طرح دے مکروہ ہتھکنڈیاں دے ذریعے پاکستان کوں مسلسل ݙو محاذیں دی صورت حال دا نشانہ بݨایا ویندا پئے تاں جو او اندرونی مسئلیاں وچ الجھیا رہے اتے اپݨی ترقی دے نال نال اپݨے معاشرے دی بحالی تے توجہ مرکوز نہ کر سڳے۔ حیرت دی ڳالھ اے ہے جو جݙاں وی پاکستان دہشت گردی دی لعنت کوں فیصلہ کن طور تے ختم کرݨ دے نیڑے ہوندا اے تاں ہندوستان دہشت گردی دے ‘مرکز’ دے طور تے پاکستان دے خلاف بے بنیاد پروپیگنڈا شروع کر ݙیندا ہے۔ ݙو دہائیاں توں جاری اے شیطانی چکر ہݨ ختم تھیوݨا چاہیدے۔ پاکستان عالمی برادری تے زور ݙیندا ہے جو او پائیدار امن دے حصول کیتے بھارت کوں پاکستان توں نام نہاد دہشت گردی دے کوڑے بیانیے کوں استعمال کرݨ توں روکے۔ مستقبل دے حوالے نال پاکستان کوں عالمی برادری دی لاتعلقی نی بلکہ حمایت دی ضرورت ہے۔ بیان دے مطابق بھارت کوں اے وی سمجھݨا چاہیدا ہے جو ایندی ہک اندرونی مسئلے کوں خارجی شکل ݙیوݨ دیاں کوششاں، یعنی اقلیتاں تے ریاستی منظم ظلم و ستم دے خلاف مقامی مزاحمت اتے ہک بیرونی مسئلے یعنی جموں و کشمیر تنازعے کوں اندرونی شکل ݙیوݨ دیاں کوششاں خطرناک اتے عدم استحکام دا باعث ہن۔ بھارت کوں پالیسی اہداف کوں حاصل کرݨ کیتے دہشت گردی دے رجحان کوں ہک محرک دے طور تے استعمال نی کرݨا چاہیدا جیویں جو بھارت دے غیر قانونی طور تے مقبوضہ جموں و کشمیر دی ریاست دی خصوصی حیثیت ختم کرݨ اتے سندھ طاس معاہدے کوں غیر قانونی طور تے معطل کرݨ نال پاکستان کوں ایجھیں ہتھکنڈیاں نال مجبور نی کیتا ونڄ سڳدا۔ پاکستان بھارت دے نال تعمیری سفارت کاری اتے جامع مذاکرات وچ شامل تھیوݨ اتے جموں و کشمیر تنازعے سودھا سارے مسئلیاں کوں پرامن طریقیاں نال حل کرݨ دا خواہشمند اے، کشیدگی کوں ٻیا ودھݨ توں روکوݨ کیتے عالمی برادری کوں وی اپݨا کردار ادا کرݨا چاہیدے۔ بیان دے مطابق قومی طاقت دے سارے عناصر پاکستان دی خودمختاری اتے علاقائی سالمیت کوں یقینی بݨاوݨ کیتے پرعزم ہن، ساݙیاں مسلح افواج مادر وطن، ایندے شہریاں دے دفاع اتے پاکستان دے اہم قومی مفادات دے تحفظ کیتے سارے اقدامات کرݨ دی ذمہ داری دی حامل ہن۔ اے فریضہ پاکستان دے قابل فخر، پرعزم، بہادر اتے غیور عوام دی ہک مقدس امانت ہے۔ علاقائی امن اتے استحکام کیتے پاکستان ٻہوں ذمے دارانہ، متناسب اتے پختہ جواب ݙتے کیوں جو ݙو ایٹمی ریاستاں وچال مزید کشیدگی توں تباہ کن نتائج سامݨے آ سڳدن لہٰذا ایں طرح دے خطرناک نقطہ نظر توں پرہیز کرݨا چاہیدے۔
