شہید قوم دے اصل ہیرو ہن، دشمن پاکستان ݙے میلی اکھ نال ݙیکھݨ دی جرات نئیں کر سڳدا، محسن نقوی

لاہور۔ 12 مئی (اے پی پی) وفاقی وزیر داخلہ محسن نقوی آکھیا جو شہید قوم دے اصل ہیرو ہن، بھارت دے خلاف کامیابی انہاں شہیداں دے خون نال ملی اے، ساݙی فوج دشمن کوں ایجھا سبق سکھائے جو ہݨ او پاکستان ݙے میلی اکھ نال ݙیکھݨ دی جرات نئیں کر سڳدا، شہیداں دیاں قربانیاں رائیگاں نئیں ویسن، حکومت شہیداں دے گھراں آلیاں کوں کلہا نئیں چھوڑیسی۔ انہاں خیالات دا اظہار انہاں ٻئے ݙینھ ڈرون حملے وچ شہید تھیوݨ والے علی حیدر دی رہائش گاہ چونگی امر سدھو تے میڈیا نال غیر رسمی ڳالھ مہاڑ کریندے ہوئے آکھی۔ ایں موقع تے سی سی پی او لاہور بلال کمانہ اتے ٻئے وی موجود ہن۔ وفاقی وزیر داخلہ آکھیا جو پوری قوم فوج دے مونڈھے نال مونڈھا رَلا تے دشمن کوں دندان شکن جواب ݙتا، بھارت ہݨ کوئی وی ایڈونچر کرݨ توں پہلے سو واری سچیسی۔ انہاں آکھیا جو اساں کوں بھارت توں کامیابی ساݙے شہیداں دے خون نال ملی اے، انہاں شہیداں دیاں قربانیاں کوں ضائع نہ ونجݨ ݙتا ویسی۔ ایں توں پہلے وفاقی وزیر داخلہ علی حیدر شہید دے والد محمد اسلم اتے والدہ شمیم بی بی نال تعزیت کیتی اتے شہید دے درجات دی بلندی اتے مغفرت کیتے فاتحہ خوانی کیتی۔ وفاقی وزیر داخلہ محسن نقوی شہید علی حیدر دے والدین کوں دلاسہ ݙتا اتے دلجوئی کیتی اتے آکھیا جو حکومت شہیداں دے گھراں آلیاں کوں کلہا نہ چھوڑیسی، اساں شہید دے گھراں آلیاں دے نال کھڑے ہوسوں، تہاݙا اکلوتا سہارا ٹر ڳئے، اللہ تعالیٰ تساں کوں صبر جمیل عطا فرماوے، حکومت تہاݙے گھر دا سہارا بݨیسی۔ واضح رھاوے جو شہید علی حیدر 8 بھیݨاں دا ہکلوتا بھرا ہئی اتے پنڈی کرکٹ سٹیڈیم دے ٻاہر برگر دا کاروبار کریندا ہئی جیہڑا پچھلے ݙینھاں راولپنڈی سٹیڈیم وچ بھارت ولوں کیتے ڳئے ڈرون حملے وچ شہید تھی ڳیا ہئی۔