اسلام آباد۔12 مئی(اے پی پی)وزیراعظم محمد شہباز شریف جنوبی ایشیا اچ اڄوکی کشیدگی اچ پاکستان نال یکجہتی ݙکھاوݨ تے صدر رجب طیب اردوان اتے ترک عوام دا دلوں شکریہ ادا کریندے اے عزم دوہرائے جو پاکستان ہمیشہ جنوبی ایشیا اچ امن چاہندے ٻھل او اپݨی خود مختاری اتے علاقائی سالمیت دی خلاف ورزی کݙاہیں وی قبول نہ کریسی۔ وزیراعظم محمد شہباز شریف نال پاکستان اچ جمہوریہ ترکیہ دے سفیر عرفان نذیر اوغلو ملین۔ وزیراعظم آکھیا جو اپݨی مستقل حمایت نال صدر اردوان ہک واری ول پاکستانی عوام دے دل جیت گھدن۔ وزیراعظم ترکیہ دے برادر عوام دا وی شکریہ ادا کیتا جنہاں ایں اوکھے ویلھے اچ اپݨے پاکستانی بھینڑیں اتے بھراواں دا ساتھ نئیں چھوڑیا اتے پاکستان اتے ترکیہ دے برادرانہ تعلقات دی تاریخ اچ ہک نواں اتے شاندار باب لکھیے۔ وزیراعظم پاکستان دی بہادر مسلح افواج کوں شاندار خراج تحسین پیش کریندے آکھیا جو پاکستان دی مسلح افواج’’آپریشن بنیان مرصوص‘‘ دے ذریعے دشمن کوں منہ توڑ جواب ݙتے اتے اوندے مذموم عزائم کوں ناکام بݨایا۔ وزیراعظم آکھیا جو ایں تاریخی فتح تے پوری قوم اللہ تعالیٰ دی شکر گزار اے، پاکستان ہمیشہ جنوبی ایشیا اچ امن چاہندے ٻھل او اپݨی خود مختاری اتے علاقائی سالمیت دی خلاف ورزی کݙاہیں وی قبول نہ کریسی۔ انہاں آکھیا جو ایں مفاہمتی پالیسی دے تحت پاکستان بھارت نال جنگ بندی کوں قبول کرݨ تے رضامندی ظاہر کیتی ہئی۔ ݙوطرفہ تعلقات دے حوالے نال وزیراعظم پاکستان اتے ترکیہ دے برادرانہ تعلقات دی مثبت رفتار تے اطمینان کیتے، جو ایں سال فروری اچ صدر رجب طیب اردوان دے اسلام آباد دے تاریخی دورے دے بعد توں تیزی نال اڳو تےودھدے پئن۔ اپݨے حالیہ دورہ انقرہ کوں یاد کریندے وزیراعظم ݙوہیں ملکاں وچال اعلیٰ سطح ملاقاتاں دے کیتے ڳئے سارے اہم فیصلیاں تے ویلھے تے عمل درآمد کوں یقینی بݨاوݨ تے زور ݙتے۔ انہاں آکھیا جو ݙوہیں ملکاں دے وزرائے خارجہ دی سطح تے جوائنٹ کمیشن جلد توں جلد سݙوایا ونڄے۔ ترک سفیر فوجی اتے سفارتی کامیابی تے وزیراعظم اتے پوری پاکستانی قوم کوں مبارکباد ݙتی۔ انہاں آکھیا جو ترکیہ دے عوام پاکستان دی کامیابی تے خوش ہن اتے جنوبی ایشیا وچ امن کیتے اوندیاں کوششاں اتے عزم دی تعریف کریندن۔ انہاں آکھیا جو صدر اردوان ݙوہیں ملکاں وچال ہر شعبے اچ مضبوط برادرانہ تعلقات کوں ٻیا تکڑا کرݨ چاہندن اتے ایں سانڳے اعلیٰ سطح ادارہ جاتی سرگرمیاں جاری رہسن۔
