راولپنڈی۔ 13 مئی (اے پی پی) بھارت دے حملیاں اچ سکواڈرن لیڈر عثمان یوسف سودھے 11 جواناں سودھے 51 شہری شہید تھئے۔ پاک فوج دے شعبہ تعلقات عامہ موجب معرکہ حق اتے وطن دا تحفظ کریندیں ہوئیں 11 جواناں جام شہادت نوش کیتا جݙاں جو بھارتی جارحیت دا جواب ݙیندیں ہوئیں 78 اہلکار زخمی تھئے۔ بھارتی حملیاں وچ شہید تھیوݨ آلیاں اچ پاک فضائیہ دے سکواڈرن لیڈر عثمان یوسف، چیف ٹیکنیشن اورنگزیب، سینئر ٹیکنیشن نجیب، کارپورل ٹیکنیشن فاروق اتے سینئر ٹیکنیشن مبشر، نائیک عبدالرحمن، لانس نائیک دلاور خان، لانس نائیک اکرام اللہ، نائیک وقار خالد، سپاہی محمد عدیل اکبر اتے سپاہی نثار شہید تھیے۔ بھارتی فوج 6 اتے 7 مئی کوں بلااشتعال حملے شروع کیتے۔ انہاں حملیاں وچ 40 شہری شہید تھئے جنہاں وچ 7 تریمتیں اتے 15 ٻال وی شامل ہن جݙاں جو 121 معصوم شہری زخمی وی تھئے۔ حملیاں وچ تریمتیں، ٻالاں اتے بزرگاں سودھے معصوم شہراں کوں نشانہ بݨایا ڳیا، زخمیاں وچ 10 تریمتیں اتے 27 ٻال وی شامل ہن، سنگین جارحیت دے جواب وچ پاک افواج معرکہ حق دے جھنڈے تلے بھرپور جواب ݙتے، آپریشن بنیان مرصوص نال درست اتے نمایاں جوابی حملے کیتے ڳئے۔ آئی ایس پی آر موجب شہداء دی عظیم قربانی اتے حب الوطنی ہک لازوال علامت اے، شہداء دی قربانی کوں ہمیشہ یاد رکھیا ویسی، قوم جارحیت دے سامݨے پُرعزم اے۔ آئی ایس پی آر دا آکھݨ اے جو ایندے وچ کوئی ابہام نئیں ہووݨا چاہیدا جو پاکستان دی خودمختاری یا علاقائی سالمیت کوں چیلنج کرݨ دی کہیں وی کوشش دا بھرپور اتے فیصلہ کن جواب ݙتا ویسی۔
