لاہور۔ 13 مئی (اے پی پی) وزیر اطلاعات پنجاب عظمیٰ بخاری آکھیے جو آپریشن ”سندور” ہݨ تندور بݨ ڳئے، مودی سرکار کنے ہݨ کوئی جواب باقی کائنی رہیا۔ دشمن کوں اپݨے طیاریں، ایئر ڈیفنس سسٹم اتے میزائلاں تے ناز ہئی، اساں ساریں کوں مٹی اچ رلا ݙتے ۔ اے ڳالھ انہاں سنوار دے ݙینھ ڈی جی پی آر اچ وزیر زراعت سید عاشق کرمانی دے رلے ہک سانجھی پریس کانفرنس نال خطاب کریندے آکھی۔ وزیراطلاعات عظمیٰ بخاری آکھیے جو آپریشن ’’بنیان مرصوص‘‘ کامیابی نال پورا تھی ڳئے۔ انہاں آکھیے جو ایں آپریشن دے کامیاب طریقے نال مُکݨ تے وزیراعظم دی ہدایت تے یوم تشکر منایا ڳئے جݙاں جو وزیراعلیٰ مریم نواز دی طرفوں سارے سکولاں اچ اسمبلی دے دوران ایں ݙینھ کوں خراج تحسین پیش کرݨ دی ہدایت جاری کیتیاں ڳئن ۔ عظمیٰ بخاری ݙسائے جو وزیراعلیٰ پنجاب خود زخمیاں دی عیادت کیتے سی ایم ایچ تشریف گھن ڳئیاں اتے شہیداں دے گھر آلیں نال ہمدری کیتی۔ انہاں آکھیے جو قوم اپݨےشہیداں کوں سلام پیش کریندی اے جنہاں بھارتی جارحیت اچ جامِ شہادت نوش کیتے۔ عظمیٰ بخاری بھارتی وزیراعظم نریندر مودی دی اڄوکی تقریر کوں ہری ہوئی اتے بے بنیاد قرار ݙیندے آکھیے جو “مودی صاحب فلماں وانڳوں سمجھدے پئے ہن جو پاکستان کوں ہرا گھنسن، لیکن اے جنگ حقیقت ہئی، کوئی فلمی سین کائناں ہئی۔” انہاں بھارتی میڈیا تے وی تنقید کیتی اتے آکھیے جو او پروپیگنڈا کھنڈاوݨ دی بجائے حقائق دا سامݨا کرِن۔ وزیر اطلاعات پنجاب آکھیے وزیراعلیٰ پنجاب وختی شہیداں دے گھرآلیں سانڳے امدادی پیکج دا اعلان کریسن۔ اساں اپݨی دھرتی اتے شہیداں تے سارا کجھ قربان کرݨ سانڳے تیار ہیسے۔ عظمیٰ بخاری مسلم لیگ (ن) دی قیادت کوں خراج تحسین پیش کریندے آکھیے جو نواز شریف صرف ہک لیڈر کائنی بلکہ ہک وژنری ہن۔ 10 مئی کوں وی انہاں وزیراعظم محمد شہباز شریف دے رلے ملک کوں بچاوݨ اچ تاریخی کردار ادا کیتا۔ ایں موقع تے وزیر زراعت و لائیو سٹاک پنجاب سید عاشق حسین کرمانی آکھیے جو بھارتی جارحیت دے خلاف جیویں پوری قوم ہک مٹھ تھئی اتے انہاں پاک فوج دا حوصلہ ودھائے او ڈیکھݨ دے لائق ہئی۔ ساݙی فوج، چیف آف آرمی سٹاف، وزیراعظم پاکستان اتے وزیراعلیٰ پنجاب قوم دا سر فخر نال اُچا کرڈتا۔ انہاں آکھیے میں ایں موقع تے پاکستانی میڈیا کوں وی خراج تحسین پیش کریندی ہاں جنہاں دے مثبت کردار اتے بردباری اساکوں کامیابی نال ہمکنار کیتے۔ انہاں مزید آکھیے جو زراعت دا ساݙی معیشت اچ ٻہوں اہم کردار اے، جیندے اچ 60 فیصد حصہ لائیو سٹاک دا اے۔ وزیراعلیٰ مریم نواز شریف دی قیادت اچ ہک سال دے تھوڑے عرصے اچ زرعی شعبے دے سارے سیکٹرز دی تبدیلی تے پوری توجہ رکھی ڳئی اتے آوݨ آلے چار سال دا وی ہک عملی منصوبہ وی ݙتا ڳئے۔ سیڈ ٹیکنالوجی، میکنائزیشن اتے ہائی ایفیشنسی ایریگیشن سسٹم کوں متعارف کراوݨ کیتے اقدامات کیتے ڳئے۔ کسان کارڈ توں 6 لکھ کاشتکاراں فیدہ چاتا اتے انہاں اچ 65 ارب روپے دی رقم ونڈی ڳئی۔ کاشتکاراں ہݨ تئیں 23 ارب روپے دا بغیر سود دے قرض واپس کرڈتے۔ کسان کارڈ دے اڳلے فیز کیتے کاشتکاراں دی تعداد ساڈھے ست لکھ توں ݙاہ لکھ تئیں ہوسی اتے ہݨ او سیڈ، فرٹیلائزر اتے پیسٹی سائیڈز دے علاوہ ڈیزل دی سہولت توں وی فیدہ چا سڳسن، قرض دی رقم 1.5 لکھ توں ودھ تے ترائے لکھ روپے کر ݙتی ڳئی اے، سروس چارجز کوں وی مُکایا ویندا پئے۔ کسان کارڈ ہولڈرز دے علاوہ ٻئے کساناں کوں وی کݨک سپورٹ پروگرام دے تحت 5 ہزار روپے فی ایکڑ دے حساب نال ݙتے ویندے پِن۔ انہاں آکھیے جو وزیراعلیٰ گرین ٹریکٹرز پروگرام دے تحت آوݨ آلے مالی سال اچ 20 ہزار ٹریکٹرز ݙتے ویسن، وزیراعلیٰ زرعی گریجوایٹس انٹرن شپ پروگرام دے تحت آوݨ آلے سال 2 ہزار گریجوایٹس کوں بھرتی کیتا ویسی جݙاں جو 10 ایگری مالز تعمیر کیتے ویسن۔ انہاں آکھیے محکمہ زراعت دا ٹوٹل بجٹ 64 ارب روپے توں ودھ تے 85 توں 95 ارب روپے تئیں ودھایا ویندا پئے۔ پچھلے سال حکومت پیداواری لاڳت کوں گھٹ کریندے ہوئیں یوریا، سیڈ اتے ڈی اے پی دی گھٹ قیمتاں اچ ودھ مقدار اچ ݙیوݨ یقینی بݨائے۔ وزیراعلیٰ پنجاب وفاقی حکومت نال زرعی ان پٹس اتے مشینری دی درآمد تے لڳݨ آلی ڈیوٹی کوں گھٹ کرݨ یا مُکاوݨ اتے نویں سیڈ ٹیکنالوجی متعارف کراوݨ کیتے رابطہ کیتے اتے ایں حوالے نال وزیراعظم کوں خط وی لکھیے ۔ میکنائزیشن دے عمل دے ذریعے کساناں کوں مقامی مشینری ݙیوݨ دی تعداد اچ وی ودھارا کیتا ویندا پئے، ایں سلسلے اچ کساناں اتے سروس پروائیڈرز کوں بغیر سود دے قرض ݙتا ویسی جے 2 سو توں 3 سو نویں ہارویسٹرز آونڄن تاں انقلاب آویسی۔ ایں واری 9 لکھ ایکڑ تے اگاتری کاٹن کاشت کیتی ڳئی اے اتے ایں واری 35 لکھ ایکڑ رقبے دے کاٹن دے ہدف اچوں ہݨ تئیں 22 لکھ ایکڑ توں ودھ رقبے تے کپاہ کاشت تھی چکی اے۔
