اسلام آباد۔13 مئی(اے پی پی)وزیراعظم محمد شہباز شریف زیر تعمیر دانش سکولاں اتے دانش یونیورسٹی تے کم تیکھا کرݨ، اعلیٰ معیار دی تعمیر، تھرڈ پارٹی ویلیڈیشن اتے دانش اتھارٹی ٻݨآوݨ سانڳے تجاویز ݙیوݨ دی ہدایت کیتی اے۔ انہاں اے ہدایات اسلام آباد اچ دانش سکولز تے یونیورسٹی دی تعمیر بارے امور دے جائزہ اجلاس نال خطاب اچ آکھی۔ اجلاس اچ پورے ملک اچ 15 نویں دانش سکولاں دی تعمیر دی پیشرفت، مختلف علاقیاں اچ زیر تعمیر دانش سکولاں تے دانش یونیورسٹی، اسلام آباد تے بریفنگ ݙتی ڳئی۔ ݙسایا ڳیا جو دانش سکول، اسلام آباد دا 41 فیصد کم مکمل کر گھدا ڳئے، ایکوں دسمبر 2025 اچ مکمل کر ݙتا ویسی۔ گلگت بلتستان اچ دانش سکول، سلطان آباد، گھانچے اتے استور کوں 30 جون 2026 تک مکمل کر ݙتا ویسی، بھمبر اتے باغ دے دانش سکول جون 2026 اچ مکمل تھیسن، شاردہ، سبی، موسیٰ خیل اتے ژوب دے دانش سکولاں دی فزیبلٹی اتے ڈیزائن مکمل تھی ڳئے، حب، کراچی اتے چترال دے دانش سکولاں بارے زمین ڳھنݨ کیتے کم تھیندا پئے۔ وفاقی کابینہ دی منظوری نال دانش یونیورسٹی کیتے زمین مختص کرݙتی ڳئی اے۔ اجلاس یونیورسٹی دی فزیبلٹی، ڈیزائن دی پری کوالیفکیشن کیتے ماہر کنسلٹنٹ لاوݨ دا عمل شروع کرݨ دی منظوری ݙتی۔ وزیراعظم زیر تعمیر دانش سکولاں تے دانش یونیورسٹی تے کم تکھا کرݨ دی ہدایت کریندے دانش سکولاں اتے یونیورسٹی دی اعلیٰ معیار دی تعمیر تے تھرڈ پارٹی ویلیڈیشن دی وی ہدایت کیتی۔ وزیراعظم آکھیا جو دانش سکولاں اتے یونیورسٹی ملک دے مستحق لائق طلباء کوں اعلیٰ معیار دی تعلیم ݙیوݨ کیتے حکومت دے ترجیحی منصوبے ہین۔ انہاں دانش سکولاں دے سارے کلاس رومز اچ سمارٹ بورڈ لاوݨ اتے ہر دانش سکول اچ ڈیجیٹل لائبریری بݨاوݨ دا وی آکھیے، اتے آکھیا جو دانش سکول اچ اساتذہ دی تعیناتی دا عمل میرٹ تے اتے شفاف ہووݨا چاہیدے اتے مقامی اساتذہ کوں ترجیح ݙتی ونڄے۔ وزیراعظم دانش اتھارٹی دے قیام کیتے تجاویز وی منڳین۔ اجلاس اچ وفاقی وزیر منصوبہ بندی احسن اقبال، وفاقی وزیر تعلیم ڈاکٹر خالد مقبول صدیقی، وفاقی وزیر اقتصادی امور احد خان چیمہ، چاراں صوبیاں، گلگت بلتستان، آزاد جموں و کشمیر دے چیف سیکرٹریز، اسلام آباد کیپٹل ٹیریٹری دے چیف کمشنر تے ٻئے متعلقہ اعلیٰ سرکاری افسران شرکت کیتی۔
