اسلام آباد۔13 مئی(اے پی پی)پاکستان آکھیے جو پاکستان دہشت گردی دا شکار اے جیندی براہ راست سرپرستی بھارت کریندا پئے، پاکستان بھارتی وزیراعظم دا اشتعال انگیز خطاب یکسر مسترد کرݙتے، اڳو تے وی جارحیت دا ایویں تکڑا ولدا ݙتا ویسی۔ ترجمان دفتر خارجہ آکھیے جو علاقائی امن اتے استحکام کیتے بین الاقوامی کوششاں اچ بھارتی وزیراعظم دا خطاب غلط معلومات، سیاسی موقع پرستی اتے بین الاقوامی قانون دی صریح بے توقیری اچ جُڑے خطرناک ودھارے دی نمائندگی کریندے، اے بیان جارحیت دا جواز پیش کرݨ کیتے گمراہ کن کہانیاں گھڑݨ دا وی رجحان ݙسیندے، پاکستان حالیہ جنگ بندی، مفاہمت اتے کشیدگی اچ کمی اتے علاقائی استحکام کیتے ضروری اقدامات سانڳے پرعزم اے، اے جنگ بندی کئی دوست ملکاں دی سہولت پاروں تھئی اے، ڄئیں ساݙے نال کشیدگی ڳھٹاوݨ کیتے رابطہ کیتے۔ انہاں آکھیا جو مایوسی اتے بدحواسی اچ اے آکھݨ جو جنگ بندی دی خواہش پاکستان کیتی ہئی ہک ٻیا صریح کُوڑ اے، پہلگام حملے تے پاکستان کوں بدنام کرݨ، فوجی مہم جوئی دا جواز پیش کرݨ، ملکی سیاسی مقاصد کوں پورا کرݨ، ودھدی فرقہ وارانہ کشیدگی توں توجہ ہٹاوݨ، بھارت دے غیر قانونی طور تے زیر تسلط جموں و کشمیر اچ انسانی حقوق دی خلاف ورزیاں اتے ہر پاسے ڳھڑیے دھمکی آمیز بیانیے کوں ودھاوݨ کیتے مصدقہ ثبوتاں دے بغیر فائدہ چاتا ویندا پئے۔ ترجمان آکھیے جو بھارت دہشت گردی دے کُوڑے بہانے معصوم پاکستانی شہریاں دے خلاف غیر قانونی اتے بلا اشتعال بھارتی جارحیت دے بعد اتے پاکستان دے تحمل دے باوجود ڄاݨ ٻُجھ تے پاکستان دے فوجی اݙیاں کوں نشانہ بݨا تے صورتحال کوں ٻیا بھڑکا ݙتے جیندے نال آقرتحال بے قابو تھیوݨ دا چنتا اے۔ ترجمان آکھیا جو بھارتی اقدامات جارحیت دی ہک خطرناک مثال قائم کیتی اے اتے او پورے خطے کوں تباہی دی کندھی تے گھن ڳئے، اے ہک ترمیم پسند اداکار دی ذہنیت دی عکاسی کریندے جیہڑا نتائج دی پرواہ کیتے بغیر جنوبی ایشیا اچ سٹریٹجک عدم استحکام کوں برقرار رکھݨ چاہندے، بھارت معصوم شہریاں بشمول وݙی تعداد اچ تریمتیں اتے ٻالاں دے ناحق خون اتے قتل کوں جواز بݨیندا پئے اتے آپݨی ایں انتہائی غیر ذمہ دارانہ روش کوں خطے کیتے “نویں معمول” دے طور تے پیش کریندا پئے۔ ترجمان دفتر خارجہ آکھیا جو پاکستان دعوے کوں یکسر مسترد کریندے، ”معمول“ اے ہے جو کہیں کوں وی اقوام متحدہ دے چارٹر دے اصولاں اتے مقاصد کوں چیلنج کرݨ دی اجازت نہ ݙتی ویسی، جیویں پاکستان آپݨی خودمختاری اتے علاقائی سالمیت دے نال نال آپݨے عوام دی سلامتی دے دفاع دا بھرپور مظاہرہ کیتے۔ انہاں آکھیا جو بھارت کوئی غلطی نہ کرے، اساں آوݨ آلے ڈینھاں اچ بھارت دے اقدامات اتے رویے تے کڑی اکھ رکھسوں اتے عالمی برادری توں وی ایہا امید رکھدے ہیں۔ انہاں آکھیا جو بھارتی جارحیت دے ولدے اچ پاکستان آپݨے دفاع دے حق نال ہم آہنگ جوابی کارروائی کیتی اتے فوجی تنصیبات کوں نشانہ بݨائے، پاکستان بھارتی فوجی صلاحیت اتے اہداف دے خلاف آپݨی طاقت ثابت کیتی، ہݨ اے ہک ناقابل تردید حقیقت اے جیکوں غلط معلومات اتے پروپیگنڈے نال جھٹلایا نئیں ونڄ سڳدا۔ انہاں آکھیا جو بھارت دے غیر قانونی اتے یکطرفہ اقدامات دی عکاسی ایںندے کولو سندھ طاس معاہدہ جھیں پابند معاہدیاں دے تقدس دی صریح نظر اندازی نال وی تھیندی اے جئیں کئی ڈھاکیاں توں مشترکہ آبی وسائل دا نظام چلائے۔ انہاں آکھیا جو پاکستان معاہدے دے تحت آپݨے حقوق دے تحفظ کیتے سارے ضروری اقدامات کریسی۔ ترجمان آکھیا جو پاکستان دہشت گردی دا شکار اے جیندی براہ راست سرپرستی بھارت کریندا پئے، دہشت گردی دی لعنت توں اساں ٻہوں نقصان چاتے۔ انہاں آکھیا جو دہشت گردی دے خلاف عالمی جنگ اچ ساݙیاں خدمات اتے قربانیاں سب ڄاݨدن۔ ترجمان آکھیے جو پاکستان ہمیشہ اقوام متحدہ دی سلامتی کونسل دی قرارداداں اتے کشمیری عوام دیاں امنگاں دے مطابق تنازعہ جموں و کشمیر دے پرامن حل دی حمایت کیتی اے، ایں سانڳے ساں صدر ٹرمپ دیاں کوششاں کیتے آپݨی حمایت ݙویندے ہیں جیندا مقصد ایں تنازعے کوں حل کرݨ اے جیہڑا جنوبی ایشیا اچ عدم استحکام دی وݙی وجہ اے۔ بیان اچ آکھیا ڳئے جو پاکستان ہک خودمختار ملک اے جیندے اچ ریزیلینٹ ادارے، ہک پرعزم آبادی اتے امن و سلامتی کوں برقرار رکھݨ اچ عالمی سطح تے تسلیم شدہ کردار اے، امن کیتے ساݙے عزم کوں کݙاہیں کمزوری نہ سمجھیا ونجے، آوݨ والے ویلھے اچ کہیں وی جارحیت دا بھرپور عزم نال مقابلہ کیتا ویسی، امید اے جو بھارت علاقائی استحکام اتے آپݨے شہریاں دی بھلائی کوں تنگ نظر اتے سیاسی طور تے محرک جنگی خارجہ پالیسی تے ترجیح ݙیسی۔
