اسلام آباد۔ 14 مئی (اے پی پی) قومی ایئر لائنز مارچ 2024 توں منافع اچ چلدی پئی اے، ماضی اچ ہاؤس دے فلور تے پی آئی اے دے حوالے نال غیر ذمہ وارانہ بیان نال قومی ایئر لائنز کوں ضیان پُڄا، مڈل ایسٹ، نارتھ افریقہ اتے ٻئے منافع بخش روٹس تے پروازاں دے آغاز کیتے کم تھیندا پئے۔ قومی اسمبلی دے اجلاس اچ سوالاں دے وقفے اچ شرمیلا فاروقی دے سوال تے زیب جعفر ایوان کوں ݙسائے جو ماضی اچ ہاؤس دے فلور تے پی آئی اے دے حوالے نال غیر ذمہ وارانہ بیان نال قومی ایئر لائنز کوں ضیان پُڄا ، ایں بیان دے نتیجے پاکستان کوں بھوڳݨے پئن ، پی آئی اے یورپی یونین کیتے پروازاں شروع کرݙتن، پیرس سودھے ݙو یورپی جہیں سانڳے پی آئی اے دیاں پروازاں چلدیاں پئن ۔ انہاں آکھیے جو مارچ 2024 توں ایئر لائنز منافع اچ اے۔ اساں یورپی یونین دے ایوی ایشن سیفٹی یونین نال ڳالھ مہاڑ کیتی جیندے بعد پیرس کیتے پروازاں شروع کیتیاں ڳئیاں، ایویں برطانیہ دے متعلقہ حکام نال وی ڳالھ مہاڑ دا سلسلہ جاری اے۔ ترکیہ دی ایئر لائنز دے نال وی ساݙی ڳالھ مہاڑ تھیندی پئی اے جیں توں پاکستان دے مسافراں کوں فیدہ تھیسی۔ انہاں آکھیے جو مڈل ایسٹ، نارتھ افریقہ اتے ٻئے منافع بخش روٹس تے پروازاں دے آغاز کیتے کم تھیندا پئے۔ انہاں آکھیے جو پی آئی اے کوں مزید منافع بخش بݨاوݨ سانڳے اقدامات دا سلسلہ جاری اے جیندے اثرات سامݨے آسن
