پاکستان دا بچاؤ مضبوط ہتھاں اچ اے، ساری قوم پاک فوج دے نال سیسہ پلائی کندھ وانڳ کھڑی اے، خواجہ محمد آصف

سیالکوٹ۔ 14 مئی (اے پی پی) وفاقی وزیر دفاع خواجہ محمد آصف آکھیا جو پاکستان دا بچاؤ مضبوط ہتھاں اچ اے، ساری قوم پاک فوج دے نال سیسہ پلائی کندھ وانڳ کھڑی اے اے۔ میݙے کیتے وݙے ماݨ تے فخر دی ڳالھ ہے جو میں اُنھاں بہادر فوجی جواناں دے کول آیاں جنہاں وطن دی حفاظت کریندے ہوئیں زخم کھادے تے ایں ویلھے سی ایم ایچ سیالکوٹ اچ زیر علاج ہن، اللہ دے فضل نال ٹھیک تھیندے پئن۔ اے ڳالھیں اُنھاں سی ایم ایچ سیالکوٹ اچ بھارتی فائرنگ نال زخمی تھیوݨ آلے فوجی جواناں دی عیادت دے موقع تے آکھی۔ اُنھاں ٻیا آکھیا جو میکوں ݙسیا ڳئے جو اے زخمی جوان بجوات دے علاقے اچ جئیں بہادری دے نال لڑیے ہن، اُتھاں صرف ہک ہک چیک پوسٹ تے سینکڑاں مارٹر گولے ماریے ڳئے۔ اِنھاں زخمی جواناں دیاں ہمتاں جوان ہن، او آکھدے پئے ہن جو اساں ٹھیک تھی تے ول اوں پوسٹ تے ونج تے اونویں بہادری نال دشمن دا مقابلہ کریسوں۔ اساݙے فوجی جوان تے افسر ساݙی آزادی دی ضمانت ہن، ساݙی دھرتی دی حفاظت دی ضمانت ہن، اے ہک قوم دی عزت تے آبرو دے رکھوالے ہن، پاکستان دیاں آوݨ والیاں نسلاں اِنھاں دا احسان کݙاہیں نہ بھُلسن۔ اِنھاں جواناں پاروں اللہ تعالیٰ ٧٨ سالاں اچ پہلی واری پاکستان کوں ہک پوری تے فیصلہ کن فتح عطا کیتی اے۔ اُنھاں آکھیا جو اِنھاں جواناں دی کمان بابرکت لوک کریندے پئن، جݙاں ساݙیاں ترائیں فوجاں دے سپہ سالار دیاں ہمتاں جوان ہوون تے اُنھاں دا وطن دے نال پکا وعدہ ہووے تاں اُنھاں دی کمان اچ لڑݨ آلے جوان اپݨی جان دی پرواہ کیتے بغیر اپݨی زمین دے چپے چپے دی حفاظت کریندن۔ اُنھاں آکھیا جو ایں جنگ دا میں اکھیں ݙیکھݨ آلا شاہد ہاں، اوں رات ایمان ودھاوݨ آلے ویلھے ہن، ایمان تازہ تھی ڳیا تے میکوں ایں ڳالھ دا یقین اے جو اگر ول بھارت ایں طرحاں دی کوئی جارحیت کیتی تاں او پہلے توں وی ودھ ذلیل تے خوار تھیسی۔ اُنھاں آکھیا جو میݙی دعا اے جو جتنے وی جوان اِتھاں یا ٻئے ہسپتالاں اچ زخمی ہن، اللہ تعالیٰ اُنھاں کوں پوری صحت عطا فرمائے۔ اِنھاں بہادر فوجی جواناں کوں، بھانویں او سیالکوٹ اچ ہوون یا کہیں ٻئے محاذ تے، اُنھاں کوں اے احساس ہووݨا چاہیدے جو اے قوم اُنھاں دی احسان مند اے۔ وزیر دفاع آکھیا جو حملے توں پہلے سپہ سالار خود فجر دی نماز دی امامت کروائی، جئیں ہک روحانی تے جذبے نال بھرپور ویلھا ہا۔ اُنھاں آکھیا جو ساری قوم پاک فوج دے نال سیسہ پلائی کندھ بݨ تے کھڑی اے تے اساں آپݨے بہادر سپاہیاں دے احسان مند ہیسے۔ ایندے توں پہلے وزیر دفاع خواجہ محمد آصف پاک بھارت اڄوکی کشیدگی وچال زخمی تھیوݨ آلے فوجی جواناں دی سی ایم ایچ سیالکوٹ اچ عیادت کیتی۔ اُنھاں دے نال جی او سی ١٥ ڈویژن میجر جنرل عمران خان بابر وی موجود ہن۔ وزیر دفاع کوں زیر علاج زخمیاں دی صحت تے علاج دی صورتحال تے بریفنگ ݙتی ڳئی۔