اسلام آباد۔ 15 مئی (اے پی پی) وزیرِ اعظم محمد شہباز شریف کساناں کوں سوکھی شرطاں تے زرعی قرضے ݙیوݨ، دیسی پیداوار ودھاوݨ کیتے زرعی تحقیق تے توجہ ݙیوݨ، تے زرعی شعبے دی ترقی کیتے رَل تے حکمتِ عملی بݨاوݨ دی ہدایت کریندیں ہوئیں آکھیا جو زرعی خود کفالت ڳھنݨ کیتے زراعت دے شعبے کوں نویں اصولاں تے استوار کیتا ویندا پئے، معیشت دی تکھے ترقی کیتے زرعی شعبے دی وسیع استعداد کوں ورتیا ویسی۔ بُدھ دے ݙینھ وزیرِ اعظم آفس دے میڈیا ونگ ولوں جاری بیان موجب وزیرِ اعظم محمد شہباز شریف دی صدارت زرعی شعبے اچ اصلاحات بارے اجلاس تھیا۔ وزیرِ اعظم اجلاس توں خطاب کریندیں ہوئیں آکھیا جو اللہ تعالیٰ پاکستان کوں زرخیز زمین تے قابل زرعی ماہرین نال ݙتن، اساݙے کسان محنتی ہِن۔ وزیرِ اعظم ہدایت کیتی جو کساناں کوں سوکھی شرطاں تے زرعی قرضے ݙیوݨ دا نظام سوکھا بݨایا ونڄے، مُلک دی پیداوار ودھاوݨ کیتے زرعی تحقیق تے توجہ ݙتی ونڄے، اُنھاں پائیدار تے لمبی مُد دی زرعی صنعتی ترقی دیاں پالیسیاں بݨاوݨ دی لوڑھ تے زور ݙتا تاں جو مُلک اچ زراعت دے نال نال جنگلات کوں وی ودھارا ملے جیڑھے جو ماحولیاتی تبدیلیاں دا مقابلہ کرݨ کیتے ٻہوں اہم ہِن۔ وزیرِ اعظم ہدایت کیتی جو زرعی شعبے دی ترقی کیتے متعلقہ اداریاں نال صلاح مشورہ کر تے رَل تے حکمتِ عملی بݨائی ونڄے، ایں بارے صوبیاں نال وی صلاح مشورہ سوکھا بݨایا ونڄے، وزیرِ اعظم زرعی شعبے بارے نیشنل ایگری انوویشن پلان پیش کرݨ، زرعی سرٹیفیکیشن دے نظام اچ جاری اصلاحات اچ بارے مؤثر لائحہ عمل تیار کرݨ دی وی ہدایت کیتی، وزیرِ اعظم آکھیا جو زرعی شعبے اچ جدید ٹیکنالوجی دا ودھارا ساݙی ترجیح ہے، اُنھاں زرعی شعبے بارے جامع ریگولیٹری فریم ورک ٻݨاوݨ دی ہدایت کیتی، اجلاس اچ زرعی شعبے اچ اصلاحات بارے بݨائی ڳئی ورکنگ گروپ ولوں تجاویز پیش کیتی ڳئی، اجلاس اچ وفاقی وزیر قومی غذائی تحفظ تے تحقیق رانا تنویر حسین، وفاقی وزیر اقتصادی امور احد خان چیمہ، وفاقی وزیر خزانہ تے محصولات محمد اورنگزیب، وفاقی وزیر موسمیاتی تبدیلی مصدق ملک اتے متعلقہ سرکاری افسر شریک تھئے۔
