اسلام آباد۔ 15 مئی(اے پی پی)قومی اسمبلی کوں ݙسایا ڳئے جو نیشنل کمیشن فار دی سٹیٹس آف ویمن دی چیئرپرسن کیتے سمری بھجوا ݙتی ڳئی اے، کمیشن دی جینڈر پیریٹی رپورٹ شائع تھی چکی اے۔ قومی اسمبلی اچ وقفہ سوالاں اچ ولدا ݙیندے پارلیمانی سیکرٹری صبا صادق ایوان کوں ݙسایا جو تریمتیں ملکی آبادی دا ادھا حصہ ہین، آئین اتے قرآن و سنت اچ انہاں دے حقوق ݙتے ڳئن، نیشنل کمیشن آن دی سٹیٹس آف ویمن دی چیئرپرسن کیتے سمری بھجوا ݙتی ڳئی اے، ایں ویلھے عبوری بنیاداں تے چیئرپرسن کم کریندی پئی اے، نویں تعیناتی دا عمل تیکھے مکمل تھی ویسی، کمیشن دا بورڈ کم کریندا پئے اتے ایندے اجلاس باقاعدگی نال تھیندے پئن۔ انہاں آکھیا جو این سی ایس ڈبلیو دا کم وسیع پیمانے تے اے، ادارے دا کم تریمتاں دے مسئلیاں کوں حل کرݨ اے، تریمتیں تے ہر قسم دا تشدد روکݨ وی کمیشن دی ذمہ داری اے، کمیشن دیاں متعلقہ صوبائی وزارتاں نال وی باقاعدگی نال میٹنگز تھیندن، سارے صوبے ایندے نال ڈیٹا شیئر کریندے پئین، ایں ادارے دی تشہیر اچ تیزی گھن آوݨی چاہیدی اے اتے تریمتیں کوں وی علم ہووݨا چاہیدے جو انہاں دے حقوق دے تحفظ کیتے ہک ادارہ موجود اے، کمیشن ولوں ہیلپ لائن وی ٻݨا ݙتی ڳئی اے۔ نفیسہ شاہ دے ضمنی سوال تے انہاں آکھیا جو وفاقی حکومت اچ تریمتیں دے کوٹہ نال متعلق اعداد و شمار دا ایوان کوں ݙسا ݙتا ویسی، تریمتیں کوں انہاں دا حق ملݨا چاہیدے۔ زرتاج گل دے ضمنی سوال تے انہاں آکھیا ڄیکر کوئی وی پاکستانی شہری ٻھاویں او مرد ہوون یا تریمتیں قانون دی خلاف ورزی کریسی تاں ایندے خلاف قانونی کارروائی ہوسی۔ نزہت صادق دے ضمنی سوال تے انہاں آکھیا جو کمیشن دے اراکین جیلاں دا دورہ کریندے ہن اتے اتھاں مقیم تریمتیں نال ملاقاتاں کریندن، تریمت قیدیاں کوں قانونی معاونت دے علاوہ سہولتاں ݙیوݨ کیتے وی اقدامات کیتے ویندے پئین۔ انہاں آکھیا جو کمیشن ولوں جینڈر پیریٹی رپورٹ شائع تھئی اے جیندے اچ سارا ڈیٹا موجود اے، اے رپورٹ تیکھے پارلیمان اچ پیش کیتی ویسی۔
