لاہور۔ 16 مئی (اے پی پی) وفاقی وزیرِ داخلہ محسن نقوی یومِ تشکر تے جمعے کوں پاکستان رینجرز (پنجاب) ہیڈ کوارٹرز دا دورہ کیتا۔ ڈائریکٹر جنرل پاکستان رینجرز (پنجاب) میجر جنرل محمد عاطف بن اکرم وزیرِ داخلہ محسن نقوی دا استقبال کیتا۔ وزیرِ داخلہ یادگار شہداء تے حاضری ݙتی، یادگار شہداء تے پُھل رکھے تے فاتحہ خوانی کیتی۔ وزیرِ داخلہ محسن نقوی شہداء دے درجات دی بلندی کیتے دعا کیتی تے شہداء دی عظیم قربانیاں کوں شاندار الفاظ اچ خراجِ عقیدت پیش کیتا۔ وفاقی وزیرِ داخلہ محسن نقوی شہداء دے ٹٻراں نال ملاقات کیتی تے انہاں دے بلند حوصلے دی تعریف کیتی۔ وزیرِ داخلہ شہداء دے ٹبراں دے مسئلے سُݨیے اتے انہاں دے حل کیتے موقع تے ہدایات ݙیندیں ہوئیں آکھیا جو شہداء دے خانداناں دے مسئلے حل کرݨ اساݙی ذمہ واری اے، شہداء اساݙے متھے دا جھومر ہن۔ انہاں آکھیا جو پوری قوم شہداء دے خانداناں کوں سلام پیش کریندی اے۔ انہاں ایں ڳالھ تے زور ݙتا جو شہداء دی قربانیاں دی کوئی مثال نئی ملدی، پوری قوم شہداء دے ٹٻراں نال کھڑی اے۔ انہاں ٻیا آکھیا جو پاکستان رینجرز پنجاب دے افسراں تے جواناں جرات تے دلیری دی تاریخ لکھی اے، قوم کوں آپݨے بہادر سپوتاں تے فخر اے۔ وزیرِ داخلہ محسن نقوی پاکستان رینجرز (پنجاب) دی پیشہ ورانہ کارکردگی تے عزم تے حوصلے دی تعریف کیتی۔ بعد اچ انہاں مزماناں دی کتاب آچ آپݨے تاثرات لکھیے۔
