اسلام آباد، 16 مئی(اے پی پی)وزیراعظم دے “ڈیجیٹل پاکستان” وژن دے تحت، پاکستان اچ شفاف، مؤثر اتے عالمی معیار دی سرکاری خریداری دے نظام دے قیام دو ہک بئی اہم پیش رفت تھئی اے، پبلک پروکیورمنٹ ریگولیٹری اتھارٹی (پیپرا) نیشنل یونیورسٹی آف سائنسز اینڈ ٹیکنالوجی (نسٹ) دے اشتراک نال خریداری اتے کانٹریکٹ منیجمنٹ دے شعبے اچ مہارت ودھاوِݨ کیتے ہک جامع تربیتی پروگرام شروع کیتے۔ وزیراعظم دے سرکاری خریداری دے نظام کوں شفاف، مؤثر اتے احتسابی بنیاداں تے کھڑا کرݨ سانڳے پیپرا پہلے ای عالمی بینک اتے ملک دیاں ممتاز جامعات نال مل تے کم کریندا پئے۔ ایں اشتراک دا مقصد صرف خریداری دے نظام کیتے ہک جدید فریم ورک دی تشکیل ہی نئیں ٻھل یونیورسٹی دے نصاب اچ پروکیورمنٹ بارے تعلیمی مواد رلا تے پیشہ ور افراد کوں عالمی تقاضیاں نال ڄوڑݨ وی اے جیندے تحت، پیپرا اتے نسٹ دے پروفیشنل ڈیولپمنٹ سینٹر ولوں شروع کیتے ونڄݨ آلے ڈوجھے بیچ اچ چار مہینے دے خصوصی ڈپلومہ پروگرام دا باقاعدہ آغاز 18 مئی 2025 کوں اسلام آباد اچ کیتا ویندا پئے۔ ایں پروگرام دا مقصد سرکاری اتے نجی شعبے دے ماہرین، قانونی مشیراں، کنسلٹنٹس اتے ترقیاتی شعبے دے ماہرین کوں جدید خریداری قوانین، معاہداتی نظم و نسق اتے عالمی معیار دی عملی تربیت ݙیووݨ اے۔ پیپرا دے منیجنگ ڈائریکٹر حسنات احمد قریشی آکھیے جو اے پروگرام صرف تربیت نئیں ٻھل خریداری نظام اچ ہک نویں دور دی شروعات اے، اے اقدام سرکاری افسران، نجی شعبے دے ماہرین، سپلائرز، کاروباری اداریاں اتے ترقیاتی شعبے دے ماہرین کوں خریداری دے ضوابط، بہترین عملی طریقیاں اتے معاہدہ سازی دے حوالے نال تربیت ݙیوݨ اچ ہتھ ونݙیسی۔ انہاں سارے متعلقہ فریقین بشمول حکومتی اداریاں تے زور ڈتے جو ایں تربیتی پروگرام اچ ودھ شرکت کرن تاں جو شفافیت، جوابدہی اتے کارکردگی دے مطلوبہ اہداف پورے کیتے ونڄن۔ ایں تربیتی پروگرام دے کورس اچ شفاف عوامی خریداری دے اصول، قانونی و ریگولیٹری فریم ورک، کانٹریکٹ منیجمنٹ، ای پروکیورمنٹ بذریعہ ای پیڈز، بین الاقوامی منصوبیاں دی خریداری، پبلک پرائیوٹ پارٹرنرشپ ماڈلز اتے جدید خریداری دیاں حکمت عملیاں دا جائزہ جھیں موضوعات شامل ہن۔ ایم ڈی پیپرا، حسنات احمد قریشی ݙسایا جو وزیراعظم دیاں ہدایات تے وفاقی اداریاں اچ خصوصی پروکیورمنٹ سیلز قائم کیتے ونج چکن اتے ای پیڈز دے ذریعے خریداری دا نظام نافذ تھی چکیے، انہاں سیلز اچ تعینات افسران کوں مسلسل تربیت ڈتی ویندی پئی اے تاں جو شفافیت، جوابدہی اتے کارکردگی اچ بہتری کیتے مؤثر اقدامات کوں یقینی بنڑایا ونج سگے۔
