لاہور۔17 مئی (اے پی پی) وزیراعظم محمد شہباز شریف دی ہدایت تے وفاقی وزیر نیشنل فوڈ سکیورٹی اینڈ ریسرچ رانا تنویر حسین دی صدارت اچ “زرعی شعبے اچ قومی سطح تے جدت اتے گروتھ ایکشن پلان” کوں حتمی شکل ݙیوݨ کیتے پاسکو ہیڈ آفس لاہور اچ اہم اجلاس تھیا۔ اجلاس اچ وزیر زراعت و لائیو سٹاک پنجاب سیدعاشق حسین کرمانی، وفاقی سیکرٹری نیشنل فوڈ سکیورٹی اینڈ ریسرچ وسیم اجمل چوہدری، سیکرٹری زراعت پنجاب افتخار علی سہو، سیکرٹری لائیو سٹاک پنجاب ثاقب علی عطیل، سیکرٹری فاریسٹ، وائلڈ لائف اینڈ فشریز پنجاب مدثر ریاض ملک، سیکرٹری کموڈٹیز اینڈ پرائس کنٹرول پنجاب محمد اجمل بھٹی جݙاں جو چیف سیکرٹری پنجاب زاہد اختر زمان بذریعہ ویڈیو لنک شریک تھئے۔ اجلاس اچ ممبر پلاننگ اینڈ ڈویلپمنٹ بورڈ اسلم پرویز اتے ڈائریکٹر جنرل زرعی اطلاعات پنجاب نوید عصمت کاہلوں سودھے ٻئے افسران وی موجود ہن۔ ایں موقع تے وفاقی وزیر نیشنل فوڈ سکیورٹی اینڈ ریسرچ رانا تنویر حسین آکھیے جو وزیراعظم دا وژن زرعی شعبے دی گروتھ کوں بہتر بݨا تے 2030ء تئیں ایندی برآمدات کوں 125 ارب امریکی ڈالر تئیں ودھاوݨا اے۔ انہاں آکھیے جو وزیراعظم قومی سطح تے سبز انقلاب دوم گھن آوݨ چاہندن۔ ایں مقصد کیتے زراعت، لائیو سٹاک اتے فشریز جیہے اہم شعبیاں اچ 28 ٹرانسفارمیشن اقدامات چاوݨن تاں جو انہاں شعبیاں دی ویلیو چین کوں بہتر کر تے ملکی زر مبادلہ اچ خاطر خواہ ودھارا کیتا ونڄ سڳے۔ وزیراعظم دے ݙتے ڳئے ٹاسک دے مطابق انہاں شعبیاں اچ بہتری کیتے 6 ورکنگ گروپس دے تحت انہاں سارے سیکٹرز اچ بہتری گھن آئی ویسی۔ انہاں گروپس دے تحت سارے شعبیاں اچ ٹیکنالوجی اینڈ آئی ٹی، ریسرچ و کاشتکاراں دی استعداد کار اچ ودھارا، زرعی میکانائزیشن دا ودھارا، کاشتکاراں دی مالی خود مختاری، قانونی و ریگولیٹری فریم ورک دی تشکیل اتے زرعی ترقی اچ ودھارے کیتے اقدامات شامل ہن۔ ایں موقع تے وفاقی وزیر پنجاب اچ زراعت و لائیو سٹاک دے شعبیاں اچ ترقی دی تعریف کیتی اتے وزیراعلیٰ پنجاب دے کسان دوست اقدامات دی تعریف کیتی۔ انہاں مزید آکھیے جو کاشتکاراں کوں ڈیجیٹل بااختیار بݨاوݨ کیتے اقدامات کوں یقینی بݨایا ویسی تاں جو انہاں کوں انہاں دی دہلیز تے ساریاں سہولتاں مل سگن۔ ایں موقع تے وزیر زراعت و لائیو سٹاک پنجاب سید عاشق حسین کرمانی آکھیے جو صوبہ اچ وزیراعلیٰ پنجاب دی قیادت اچ 400 ارب روپے توں ودھ دے زرعی ٹرانسفارمیشن پلان تے عملدرآمد جاری اے۔ انہاں آکھیے جو وزیراعلیٰ پنجاب دی اولین ترجیحات اچ فصلاں دی پیداوار اچ ودھارے کیتے نویں سیڈ ٹیکنالوجی اتے ہائی ٹیک میکانائزیشن دا ودھارا شامل اے۔ جئیں کیتے موجودہ سال 4 ایگری مالز دا قیام عمل اچ گھن آیا ویندا پئے جنھاں دی تعداد اڳلے مالی سال مزید 10 تئیں ودھائی ویسی۔ ایندے علاوہ کاشتکاراں کوں تحصیل دی سطح تے جدید زرعی مشینری کرائے تے حاصل کرݨ دی سہولت ݙیوݨ کیتے اقدامات چاتے ویندے پئن۔ کاشتکاراں کوں معاشی خود انحصاری کیتے وزیراعلیٰ پنجاب کسان کارڈ دا اجرا کیتا ڳیا اتے ایندے تحت کاشتکاراں کوں 55 ارب روپے دے بلا سود زرعی قرضہ جات ݙتے ڳئن ۔ ایندے علاوہ ملکی تاریخ اچ پہلی واری 9500 کاشتکاراں کوں 10 لکھ روپے سبسڈی دے تحت گرین ٹریکٹرز ݙتے ڳئے۔ زرعی توسیع سروسز اچ بہتری کیتے 1 ہزار نینگر زرعی گریجویٹس بھرتی کیتے ڳئے تاں جو کاشتکاراں کوں فنی رہنمائی ݙتی ونڄ سڳے۔ صوبائی وزیر مزید آکھیے جو اڳلے مالی سال ہر یونین کونسل اچ ایکسٹینشن موبائل آفس اتے لیبارٹری دا قیام عمل اچ گھن آیا ویندا پئے جتھاں کاشتکاراں کوں فنی رہنمائی ملسی اتے مٹی و پاݨی دے تجزئیے دی مفت سہولت میسر ہوسی۔ ایں توں انڄ حکومت پنجاب کلین ائیر پروگرام دے تحت صوبہ اچ 5 ہزار سپر سیڈرز ݙیندی پئی اے تاں جو دھان دی باقیات کوں سائنسی طور تے کارآمد بݨایا ونڄ سڳے۔ چیف سیکرٹری پنجاب زاہد اختر زمان آکھیے جو صوبہ اچ وزیراعلیٰ پنجاب دے کسان دوست اقدامات دے تحت زراعت اتے لائیو سٹاک دے شعبیاں اچ بہتری گھن آئی ویندی پئی اے۔ انہاں مزید آکھیے جو کپاہ دی پیداوار اچ ودھارے کیتے بج دی جدید پیداواری ٹیکنالوجی پاکستان اچ متعارف کراوݨ ویلھے دی اہم لوڑھ اے۔ ایں موقع تے سیکرٹری زراعت پنجاب افتخار علی سہو آکھیے جو مقامی مشینری دی درآمد تے 25 فیصد جݙاں جو امپورٹڈ مشینری تے 35 فیصد ڈیوٹی نافذ العمل اے۔ ملک اچ زرعی میکانائزیشن دے ودھارے کیتے ایندے اچ کمی گھن آوݨ ضروری اے۔
