اسلام آباد۔9 جون(اے پی پی)وفاقی وزیر خزانہ و محصولات سینیٹر محمد اورنگزیب آکھیے جو پاکستان دی معیشت اچ مثبت پیشرفت تھئی اے، جولائی 2024 توں مئی 2025 دے دوران ٹیکس وصولی اچ 26 فیصد ودھارا ریکارڈ کیتا ڳئے جیڑھا ٹیکس نظام دی بہتری اتے محصولاں اچ وسعت دی غمازی کریندے۔ اکنامک سروے پیش کریندے ہوئیں وزیر خزانہ ݙسایا جو ٹیکس فائلرز دی تعداد ݙو ڳݨی تھئی چکی اے جیںدے نال ٹیکس نیٹ اچ وسعت اتے مالیاتی شفافیت دے حکومتی اقدامات دی کامیابی ظاہر تھیندی اے۔ ایںدے علاوہ ریٹیلرز دی رجسٹریشن اچ وی 74 فیصد ودھارا تھئے جیڑھا نِکیاں اتے درمیانے درجے دے کاروباراں دی معیشت اچ شمولیت دی عکاسی کریندے۔ انہاں آکھیا جو حکومت معاشی اصلاحات، محصولاں اچ بہتری اتے شفافیت دے فروغ کیتے پرعزم اے، ایں کوششاں دا مقصد پاکستان کوں ہک مضبوط، خود کفیل اتے ترقی پذیر معیشت دی طرف گامزن کرݨ اے۔
