اسلام آباد۔ 11 جون(اے پی پی)وفاقی وزیر خزانہ سینیٹر محمد اورنگزیب آکھیے جو او تنخواہ دار طبقے کوں ودھ توں ودھ ریلیف ݙیوݨ چاہندن، اَتے تنخواہواں اچ وادھے نال خزانے تے28 توں 30 ارب روپے دا اضافی ٻوڄھ پئے۔ پوسٹ بجٹ پریس کانفرنس اچ وزیر خزانہ آکھیا جو وزیراعظم اَتے انہاں دی کوشش ہئی جو تنخواہ دار طبقے کوں ودھ توں ودھ سوکھ ݙتا ونڄے، ٻھل اساں اپݨی مالی پوزیشن دے مطابق ہی ریلیف ݙے سڳدے ہاسے، ایویں ہی درمیانے درجے دے کارپوریٹ شعبے کیتے سپر ٹیکس اچ 0.5 فیصد دی کمی کیتی ڳئی اے۔ انہاں آکھیا جو تعمیراتی شعبے اچ ٹیکس گھٹ نئیں تھیا ٻھل کوشش کیتی ڳئی اے جو ٹرانزیکشن دی لاگت اَتے اخراجات اچ کمی ڳھن آئی ونجے،5 مرلہ گھر بݨاوݨ آلیاں کوں مارگیج فنانسنگ اچ سہولتاں ݙتیاں وینداں پین، ایں سانڳے سٹیٹ بینک نال اساݙی ڳالھ مہاڑ جاری اے اَتے اے سلسلہ بتدریج اڳوں ودھایا ویسی، تنخواہواں اَتے پنشن دے حوالے نال بنچ مارک ہووݨا چاھیدے، پوری دنیا اچ مہنگائی دے تناسب نال وادھا ہوندے، حکومت ٹیکساں اچ زیادہ وادھا نئیں کیتا۔ وزیر خزانہ آکھیا جو مالی سال 2022 اچ اخراجات اچ 15.9 فیصد، مالی سال 2023 اچ 23.6 فیصد اَتے 2024 اچ 12.2 فیصد وادھا تھیا۔ انہاں دا آکھݨ ہئی جو سیکرٹری خزانہ ݙسایا جو تنخواہواں اچ 10 فیصد وادھے نال خزانے تے 28 توں 30 ارب روپے دا اضافی بوجھ پووݨے۔
