اسلام آباد۔ 17 جون (اے پی پی) وفاقی وزیر خزانہ تے محصولات سینیٹر محمد اورنگزیب آکھیا اے جو ڈھانچہ جاتی اصلاحات تے پائیدار بنیاداں تے عملدرآمد کیتا ویندا پئے، امریکی ٹیرف دے حوالے نال پاکستان ہک مسابقتی مارکیٹ اے، بجٹ اچ پنشن کیتے فنڈز دا حجم ہک ٹریلین روپے توں ودھ ڳئے جیہڑا ترقیاتی بجٹ توں ودھ اے۔ منگل کوں سکیورٹیز اینڈ ایکسچینج کمیشن آف پاکستان ولوں تھیوݨ آلی تقریب توں خطاب کریندیں ہوئیں وزیر خزانہ آکھیا جو خطے اچ کشیدگی دی صورتحال اتے ایں ملک تے ایندے ممکنہ معاشی اثرات دے حوالے نال اقدامات کیتے ویندے پئن، گزریل ڈینھ ایں بارے سارے شراکت داراں نال اساڈی مفید گالھ مہاڑ تھئی اے، ایں دا مقصد توانائی دے معقول ذخائر اتے انہاں دی قیمتاں دی نگرانی کوں یقینی ٻݨاوݨ اے، حکومت صورتحال نال نبڑݨ کیتے تیار اے، اساں کوں امید اے جو صورتحال وچ بہتری امسی۔ وزیر خزانہ آکھیا جو گزریل رات انہاں دی امریکی وزیر تجارت نال مفید گالھ مہاڑ تھئی اے، ڈوہیں ملک درست سمت وچ اقدامات کریندے پئن، امریکی ٹیرف بارے پاکستان ہک مسابقتی مارکیٹ اے، ڈوہیں ملک تزویراتی شراکت دار ہن۔ وزیر خزانہ آکھیا جو ڈھانچہ جاتی اصلاحات تے پائیدار بنیاداں تے عملدرآمد کیتا ویسی، ٹیکس، ایس او ایز اتے توانائی سودھے قومی معیشت دے اہم شعبیاں وچ اصلاحات دا عمل جاری رہسی، سرکاری اخراجات وچ ڳھٹکی اتے قرضیاں دے منظم انتظام وانصرام کیتے وی اقدامات کیتے ویندے پئن، پنشن سودھے بئے شعبیاں اچ اصلاحات دا عمل جاری اے اتے اساں کوں اینکوں اگو ودھاوݨاں اے۔ انہاں آکھیا جو بجٹ اچ پنشن کیتے فنڈز دا حجم ہک ٹریلین روپے توں ودھ ڳئے جیہڑا ترقیاتی بجٹ توں ودھ اے۔ اساں کوں بئے شعبیاں کیتے وسائل دی فراہمی کوں یقینی بنڑاونڑاں اے، بجٹ وچ 10 ملین روپے توں ودھ پنشن تے 5 فیصد ٹیکس دی تجویز ݙتی گئی اے۔ انہاں آکھیا جو پبلک پرائیویٹ پارٹنرشپ اتے پنشن کنٹری بیوشن دے حوالے نال بالترتیب سندھ اتے خیبر پختونخوا دے تجربات توں فائدہ چاوݨاں چاہیدے۔ وزیر خزانہ آکھیا جو ٹیرف اصلاحات بنیادی تبدیلیاں ہن، ایندے نال بعض صنعتاں متاثر تاں تھیسن جیں کیتے وزیر اعظم کمیٹی ٻݨائی اے جئیں وچ سارے متعلقہ شراکت دار شامل ہن، کمیٹی تبدیلیاں دے عمل وچ معاونت فراہم کریسی۔
