اسلام آباد۔ 17 جون (اے پی پی) وفاقی وزیر اطلاعات تے نشریات عطاء اللہ تارڑ آکھیا جو آزادی صحافت جمہوری نظام دی روح اے، پیکا قانون مستند صحافیاں کوں تحفظ ݙیندے، اڄوکی پاک بھارت کشیدگی اچ میڈیا قومی سلامتی اتے ریاستی موقف دے تحفظ اچ بالغ نظری دا مظاہرہ کیتا جو قابل تعریف اے، جرنلسٹس پروٹیکشن کمیشن وختی کم شروع کر ݙیسی، باقاعدگی نال شائع نہ تھیوݨ آلے اخباراں سانگے کمیٹی ٻݨا ݙتی ڳئی اے۔ اے گالھ انہاں منگل کوں اتھاں کونسل آف پاکستان نیوز پیپرز ایڈیٹرز (سی پی این ای) دے صدر کاظم خان دی قیادت اچ ملاقات سانگے آوݨ آلے سی پی این ای دے وفد نال گالھ مہاڑ کریندیں ہوئیں آکھی۔ ایں موقع تے وزیراعظم دے میڈیا کوآرڈینیٹر بدر شہباز وڑائچ اتے پرنسپل انفارمیشن آفیسر مبشر حسن وی موجود ہن۔ ملاقات اچ پیکا ایکٹ، باقاعدگی نال شائع نہ تھیوݨ آلے نیوز پیپرز دے خاتمے، پرنٹ میڈیا کوں ادائیگیاں، جرنلسٹس پروٹیکشن کمیشن سودھے ٻئے اہم معاملیاں تے گالھ مہاڑ تھئی۔ وفد نال گالھ مہاڑ کریندیں ہوئیں وفاقی وزیر اطلاعات عطاء اللہ تارڑ آکھیا جو پیکا قانون مستند صحافیاں کوں تحفظ ݙیندے۔ پیکا ایکٹ دا اصل مقصد صحافت دے لبادے اچ لکے ہوئے نام نہاد اتے جعلی صحافیاں کوں قانون دے دائرے اچ گھن آوݨ اے۔انہاں آکھیا جو مشاورت اتے ٻئی بہتری تے یقین رکھینداں، پیکا قانون تے صحافتی تنظیماں نال مشاورت سانگے تیار ہاں۔ رولز دے بارے اچ تجویزاں دا خیر مقدم کیتا ویسی۔ وفاقی وزیر آکھیا جو پیکا قانون بارے صحافیاں اتے متعلقہ وزارت وچال غلط فہمیاں کوں دور کیتا ویسی۔ انہاں ݙسایا جو باقاعدگی نال شائع نہ تھیوݨ آلے اخباراں دے خاتمے سانگے کمیٹی قائم کر ݙتی ڳئی اے۔ انہاں آکھیا جو پرنٹ میڈیا کوں ایں سال واجبات دی مد اچ ادائیگیاں کیتیاں ویسن۔ عطاء اللہ تارڑ آکھیا جو جرنلسٹس پروٹیکشن کمیشن وختی کم شروع کر ݙیسی۔ وفاقی وزیر اطلاعات حالیہ پاک بھارت کشیدگی دے دوران قومی مفاد اچ میڈیا دے کردار دی تعریف کریندے ہوئیں آکھیا جو میڈیا قومی سلامتی اتے ریاستی موقف دے تحفظ اچ بالغ نظری دا مظاہرہ کیتا۔ انہاں آکھیا جو پاکستانی میڈیا درست معلومات دی ترسیل اتے افواہواں دے بیخ کنی اچ ذمہ وارانہ کردار ادا کیتا اتے اوکھے حالات اچ قومی یکجہتی دا سنیہا ݙتا جو قابل تعریف اے۔ انہاں آکھیا جو آزادی صحافت جمہوری نظام دی روح اے اتے حکومت صحافیاں دے تحفظ، فلاح و بہبود اتے پیشہ ورانہ سہولتاں سانگے مؤثر اقدامات کریندی پئی اے۔ انہاں دا آکھݨ ہا جو میڈیا ریاست دا چوتھا ستون اے اتے حکومت چاہندی اے جو میڈیا کوں درپیش چیلنجز دا ادارہ جاتی حل کݙھیا ونڄے۔ سی پی این ای دے وفد وزارت اطلاعات و نشریات اتے پاک فوج دے شعبہ تعلقات عامہ (آئی ایس پی آر) ولوں بروقت اتے مصدقہ معلومات دی فراہمی تے انہاں دے مؤثر کردار دی تعریف کیتی۔ وفد آکھیا جو وزارت اطلاعات معلومات دی بروقت اتے مستند فراہمی یقینی بݨا تے اطلاعات دی روانی کوں مؤثر اتے مربوط رکھیا جو قابل تعریف اے۔ سی پی این دے وفد صحافیاں دے تحفظ، معلومات تئیں رسائی اتے صحافت دے پیشہ ورانہ ماحول دی بہتری بارے تجویزاں پیش کیتیاں۔ وفاقی وزیر اطلاعات وفد دیاں تجویزاں تے سنجیدگی نال غور کرݨ دی یقین دہانی کروائی۔ انہاں آکھیا جو صحافیاں دے مسئلیاں دے حل سانگے ہر ممکن تعاون فراہم کریسوں، میڈیا نمائندیاں دے نال مشترکہ ورکنگ گروپ ٻݨا تے درپیش مسئلیاں کوں ترجیحی بنیاداں تے حل کریسوں۔
