استور، 18 جون (اے پی پی) وفاقی وزیر صحت مصطفیٰ کمال آکھیے جو پاکستان کوں پولیو توں پاک بݨاوݨ کیتے حکومت سارے وسائل استعمال کریندی پئی اے۔ گلگت وچ میڈیا نال ڳالھ مہاڑ کریندے انہاں آکھیے جو وزیراعظم پاکستان میاں محمد شہباز شریف دی خصوصی ہدایت تے او گلگت آئے ہن تاں جو ضلع دیامر وچ ہݨے ہی رجسٹرڈ تھیوݨ آلے پولیو کیس دے حقائق دا جائزہ گھدا ونڄ سڳے۔ انہاں حکومت گلگت بلتستان، چیف سیکریٹری اتے محکمہ صحت دی طرفوں صحت دے شعبے وچ کیتے ونڄݨ آلے اقدامات دی تعریف کریندے آکھیے جو اے کوششاں لائق تحسین ہن۔وفاقی وزیر ݙسائے جو اڄوکے سال پاکستان پولیو دے 11 کیسز رجسٹرڈ تھئن، جݙاں جو عالمی سطح تے صرف پاکستان اتے افغانستان وچ اے مرض ہݨ وی موجود اے۔ انہاں آکھیے جو پولیو ہک سنگین بیماری اے جیڑھی جو ٻالاں کوں پوری عمر سانڳے معذور کر سڳدی اے، لیکن ایں توں بچݨ ممکن اے۔ والدین توں اپیل کریندے انہاں آکھیے جو او اپݨے ٻالاں کوں پولیو توں بچݨ دے قطرے ضرور پلاون تاں جو انہاں کوں ایں خطرناک مرض توں محفوظ رکھیا ونڄ سڳے۔ حکومت پاکستان صحت دے شعبے کوں اولین ترجیح ݙیندی اے، خاص طور تے ٻالاں دی صحت اتے بیماریاں توں بچاوݨ کیتے، وفاقی وزیر آکھیے جو پولیو مکاوݨ کیتے قومی مہمان کوں مزید مؤثر بݨاوݨ کیتے حکمت عملی بݨائی ڳئی اے اتے عوام توں اپیل کیتی ویندی اے جو او صحت عامہ دے حوالے نال حکومتی کوششاں دا ساتھ ݙیون۔ وفاقی وزیر مزید آکھیے جو گلگت بلتستان دے ضلع دیامر وچ پولیو کیس دے بعد حکومت وختی اقدامات چاتن۔ وفاقی وزیر ݙسایا جو متاثرہ علاقیں وچ اضافی ویکسینیشن راؤنڈز دا آغاز کیتا ڳئے، جݙاں جو مقامی رہنماواں اتے مذہبی شخصیات توں تعاون حاصل کیتا ویندا پئے تاں جو ویکسین دے خلاف غلط فہمیاں کوں مکایا ونڄ سڳے۔ انہاں آکھیے جو گلگت بلتستان دی حکومت اتے محکمہ صحت ایں سلسلے وچ بھرپور تعاون کریندے پئن۔
